Gujarat Rain Weather Forecast Update : ગુજરાતમાં ફરી એક વખત વરસાદનો ધમાકેદાર રાઉન્ડ જોવા મળી રહ્યો છે. સોમવારને 8 સપ્ટેમ્બરના રોજ સવારના 6.00 થી સાંજના 4.00 વાગ્યા સુધીમાં 66 તાલુકામાં વરસાદ નોંધાયો છે. જેમાં સૌથી વધારે કચ્છના લખપતમાં 5.12 ઇંચ વરસાદ વરસ્યો છે.
18 તાલુકામાં એક ઇંચથી વધારે વરસાદ
સ્ટેટ ઇમરજન્સી ઓપરેશન સેન્ટર, ગાંધીનગરના આંકડા પ્રમાણે રાજ્યમાં સોમવારને 8 સપ્ટેમ્બરના રોજ સવારના 6 થી સાંજના 4 વાગ્યા સુધીમાં 66 તાલુકામાં વરસાદ વરસ્યો છે. 18 તાલુકામાં એક ઇંચથી વધારે વરસાદ જોવા મળ્યો છે. જેમાં લખપતમાં 5.12 ઇંચ, રાપરમાં 4.72 ઇંચ, ભાભરમાં 4.29 ઇંચ, ભચાઉમાં 4.13 ઇંચ, નખત્રાણા, ગાંધીધામમાં 3.58 ઇંચ, ભૂજમાં 3.19 ઇંચ, સાંતલપુરમાં 2.95 ઇંચ, અંજારમાં 2.76 ઇંચ અને રાધનપુરમાં 2.28 ઇંચ વરસાદ નોંધાયો છે. આ સિવાય અન્ય 56 તાલુકામાં 1 થી લઇને 55 મીમી સુધી વરસાદ વરસ્યો છે.
હવામાન વિભાગની આગાહી
હવામાન વિભાગની આગાહી પ્રમાણે 9 સપ્ટેમ્બરે કચ્છમાં છૂટાછવાયા સ્થળોએ ભારે વરસાદની ચેતવણી સાથે યલ્લો એલર્ટ જાહેર કર્યું છે. આ સિવાય ક્યાંક ભારે વરસાદની ચેતવણી જાહેર કરાઇ નથી.
આ પણ વાંચો – યાત્રાધામ પાવાગઢમાં મોટી દુર્ઘટના, રોપ વે તૂટી પડતા 6 લોકોના મોત
રાજ્યમાં સિઝનનો કુલ 106.94 ટકા વરસાદ
8 સપ્ટેમ્બર 2025 સુધીમાં રાજ્યમાં સિઝનનો કુલ 106.94 ટકા વરસાદ નોંધાયો છે. જેમાં કચ્છમાં 116.12 ટકા, ઉત્તર ગુજરાતમાં 117.03 ટકા, પૂર્વ મધ્ય ગુજરાતમાં 110.07 ટકા, સૌરાષ્ટ્રમાં 93.00 ટકા અને દક્ષિણ ગુજરાતમાં 110.68 ટકા વરસાદ વરસ્યો છે. છેલ્લા ચાર વર્ષથી રાજ્યમાં 100 ટકાથી વધારે વરસાદ પડી રહ્યો છે. 2022માં 1037.88 મીમી સાથે 122.09 ટકા વરસાદ વરસ્યો હતો. 2023માં 948.06 મીમી સાથે 108.16 ટકા વરસાદ નોંધાયો હતો. જ્યારે 2024માં 1263.90 મીમી સાથે 143.14 ટકા વરસાદ વરસ્યો હતો.
સરદાર સરોવર નર્મદા નિગમ લી. માં 8 સપ્ટેમ્બરના રોજ સાંજના 4 વાગ્યા સુધીમાં પાણીનો સંગ્રહ 304013 mcft છે. જે કુલ સંગ્રહ ક્ષમતાના 91.00% જેટલી છે. રાજ્યના અન્ય 206 જળાશયોમાં સંગ્રહ 480022 mmcft છે. જે કુલ સંગ્રહ ક્ષમતાના 86.04% છે. 100 ટકા ભરાયેલ ડેમોની સંખ્યા 101 છે. 132 ડેમ હાઇ એલર્ટ પર અને 19 ડેમ એલર્ટ પર છે.
