Gujarat Rain : રાજ્યમાં વરસાદનો વિરામ, ફક્ત 5 તાલુકામાં જ મેઘમહેર

Gujarat Rain Weather Forecast Update : ગુજરાતમાં વરસાદના ધમાકેદાર રાઉન્ડ બાદ હવે એકદમ વિરામ જોવા મળી રહ્યો છે. મંગળવારને 9 સપ્ટેમ્બરના રોજ સવારના 6.00 થી સાંજના 6.00 વાગ્યા સુધીમાં ફક્ત 5 તાલુકામાં વરસાદ નોંધાયો છે. જેમાં સૌથી વધારે કચ્છના નખત્રાણામાં 1.18 ઇંચ વરસાદ વરસ્યો છે.

5 તાલુકામાં વરસાદ

સ્ટેટ ઇમરજન્સી ઓપરેશન સેન્ટર, ગાંધીનગરના આંકડા પ્રમાણે રાજ્યમાં મંગળવારને 9 સપ્ટેમ્બરના રોજ સવારના 6 થી સાંજના 6 વાગ્યા સુધીમાં ફક્ત 5 તાલુકામાં વરસાદ વરસ્યો છે. એક જ તાલુકામાં એક ઇંચથી વધારે વરસાદ જોવા મળ્યો છે. નખત્રાણામાં 30 મીમી, લખપતમાં 6 મીમી, રાધનપુરમાં 3 મીમી, ખંભાતમાં 2 મીમી અને ઉમરેઠમાં 1 મીમી વરસાદ વરસ્યો છે.

હવામાન વિભાગની આગાહી

હવામાન વિભાગની આગાહી પ્રમાણે 14 સપ્ટેમ્બર સુધીમાં રાજ્યના તમામ જિલ્લાના છૂટછાવાયા સ્થળોએ ગાજવીજ સાથે હળવાથી મધ્યમ વરસાદ થવાની શક્યતા છે. આ સિવાય ક્યાંક ભારે વરસાદની ચેતવણી જાહેર કરાઇ નથી. રાજ્યમાં વરસાદ વિરામ લે તેવી શક્યતા છે.

આ પણ વાંચો - મેં ક્યારેય આટલું સુરક્ષિત નથી અનુભવ્યું… ફ્રેન્ચ મહિલાએ અમદાવાદના વખાણ કર્યા

રાજ્યમાં સિઝનનો 107.92 ટકા વરસાદ

9 સપ્ટેમ્બર 2025 સુધીમાં રાજ્યમાં સિઝનનો કુલ 107.92 ટકા વરસાદ નોંધાયો છે. જેમાં કચ્છમાં 134.38 ટકા, ઉત્તર ગુજરાતમાં 118.72 ટકા, પૂર્વ મધ્ય ગુજરાતમાં 110.10 ટકા, સૌરાષ્ટ્રમાં 93.36 ટકા અને દક્ષિણ ગુજરાતમાં 110.70 ટકા વરસાદ વરસ્યો છે.

સરદાર સરોવર નર્મદા નિગમ લી. માં 9 સપ્ટેમ્બરના રોજ સાંજના 4 વાગ્યા સુધીમાં પાણીનો સંગ્રહ 303465 mcft છે. જે કુલ સંગ્રહ ક્ષમતાના 90.84% જેટલી છે. રાજ્યના અન્ય 206 જળાશયોમાં સંગ્રહ 488007 mmcft છે. જે કુલ સંગ્રહ ક્ષમતાના 87.47% છે. 100 ટકા ભરાયેલ ડેમોની સંખ્યા 104 છે. 137 ડેમ હાઇ એલર્ટ પર અને 20 ડેમ એલર્ટ પર છે.