હોળી રમતા પહેલા નકલી કેમિકલવાળા કલરની ઓળખ કરવી જરૂરી, સ્કિન અને આંખોનું ધ્યાન રાખવાની ટિપ્સ આ રહી!

જીવનશૈલી | હોળી (Holi) એ આનંદ, રંગો અને સ્વાદિષ્ટ ખોરાકનો તહેવાર છે. હોળીના રંગોમાં રંગાઈ જવાનું કોને ન ગમે ? પરંતુ આજકાલ, બજારમાં ઉપલબ્ધ કલરના તેજસ્વી રંગો અને ચમક પાછળ ખતરનાક રસાયણો છુપાયેલા છે. 

હોળી દરમિયાન લગાવતા કલર નકલી પણ હોઈ શકે છે, જે તમારી સ્કિનને  જ નહીં પરંતુ તમારી આંખો અને શરીરના અન્ય ભાગોને પણ નુકસાન પહોંચાડી શકે છે. પરંતુ તમે કલર કેમિકલ વાળા છે કે નહિ તેની ઓળખ કરી શકો છો? અહીં જાણો અસલી અને નકલી કલર ઓળખવાની ટિપ્સ 

કેમિકલ વાળા કલર લગાવાના ગેરફાયદા

સસ્તા,આર્ટિફિશ્યલ કલરમાં ઘણીવાર સીસું, પારો, ક્રોમિયમ અને બારીક કાચના કણો હોય છે. આનાથી સ્કિનમાં બળતરા, ફોલ્લીઓ અને આંખોમાં બળતરા થઈ શકે છે. કેટલાક લોકોને શ્વાસ લેવામાં પણ તકલીફ થઈ શકે છે. 

અસલી અને નકલી કલર ઓળખવાની ટિપ્સ

પાણીમાં ઓગાળો : તમે કલરની ગુણવત્તા પાણીમાં ઓગાળીને ચકાસી શકો છો. એક ગ્લાસ પાણીમાં થોડી માત્રામાં રંગ રેડો. જો રંગ સંપૂર્ણપણે ઓગળી જાય અને કોઈ કચરો કે ભારે કણો તળિયે સ્થિર ન થાય, તો તે સુરક્ષિત હોવાની શક્યતા છે. જો કલર સપાટી પર તરે છે અથવા નીચે સ્થિર થઈ જાય છે, જેમ કે કાચનો ટુકડો, તો તેને તાત્કાલિક ફેંકી દો.

ગંધ દ્વારા : કલરને સુગંધથી ઓળખી શકાય છે. ઓથેન્ટિક કે ઓર્ગેનિક કલરમાં ખૂબ જ હળવી અને ફૂલોની સુગંધ હોય છે. જો કલરમાં પેટ્રોલ, કેરોસીન અથવા કોઈ મજબૂત રસાયણની ગંધ આવે છે, તો તે ભેળસેળયુક્ત હોવાની શક્યતા છે.

લેબલ : પેકેજ ખરીદતી વખતે, ખાતરી કરો કે તેમાં હર્બલ અથવા ઓર્ગેનિક, તેમજ ઘટકો લખેલા હોય. જો તેમાં હળદર, ચંદન અથવા ફૂલો હોય તો જ તેને ખરીદો.

રચના : કલરને તમારા હથેળીઓ વચ્ચે ઘસો. અસલી કલર ખૂબ જ નરમ અને બારીક લાગશે. જો તે ખરબચડું લાગે અથવા તેમાં ચમકદાર, બારીક કણો હોય, તો તે ત્વચાને બળતરા કરી શકે છે.

હોળી તહેવારમાં બનાવો ટેસ્ટી અને રિફ્રેશિંગ સ્પેશિયલ વેલકમ ડ્રિંક્સ

હોળી રમતી વખતે શું ધ્યાન રાખવું?

આંખોનું ધ્યાન રાખો : હોળી રમતી વખતે કોન્ટેક્ટ લેન્સ પહેરવાનું ટાળો. સનગ્લાસ પહેરો; તે ફક્ત સ્ટાઇલ ઉમેરશે જ નહીં પણ તમારી આંખોને સીધા સૂર્યપ્રકાશથી પણ સુરક્ષિત કરશે.

આખા કપડાં પહેરો : હોળી રમતી વખતે શક્ય તેટલું તમારા શરીરને ઢાંકીને રાખો. આખી બાંયના કપડાં અને લાંબા પેન્ટ પહેરો. 

તેલ લગાવો : હોળી રમતા પહેલા તમારી સ્કિન અને વાળ પર નાળિયેર અથવા સરસવનું તેલ લગાવો. આનાથી કલર વધુ ઊંડાણમાં પ્રવેશતા અટકશે.