લાલમની વર્મા : ગુરુવારે પોતાના વિશ્વાસપાત્ર સંજય સિંહને રેસલિંગ ફેડરેશન ઓફ ઇન્ડિયા (ડબ્લ્યુએફઆઇ)ના અધ્યક્ષ તરીકે ચૂંટાયા બાદ ભાજપના કેસરગંજના સાંસદ બ્રિજ ભૂષણ શરણ સિંહે તેમના દિલ્હી નિવાસસ્થાને સમર્થકો સાથે ઉજવણી કરી હતી. આ દરમિયાન તેમણે નારા લગાવ્યા હતા કે “દબદબા તો હૈ, દબદબા તો રહેગા.” આ તો ભગવાને આપ્યું છે. તેમના પુત્ર અને ગોંડા સદરના ધારાસભ્ય પ્રતિક ભૂષણ સિંહ પણ આ ઉજવણીમાં જોડાયા હતા અને તેમણે સ્લોગન લખેલું પોસ્ટર પકડ્યું હતું.
જોકે હવે તેઓ રેસલિંગ ફેડરેશન ઓફ ઇન્ડિયાના પ્રમુખ નથી, પરંતુ તેમના વફાદારની ચૂંટણી જીતથી ખબર પડે છે કે બ્રિજ ભૂષણ સંગઠનને કેવી રીતે ચલાવવામાં આવે છે તે અંગે પોતાનો અભિપ્રાય ચાલુ રાખશે. આ વર્ષની શરુઆતમાં મહિલા કુસ્તીબાજોએ બ્રિજ ભૂષણ સિંહ સામે મૂકેલા જાતીય સતામણીના આક્ષેપો અંગે દેશવ્યાપી હોબાળો મચ્યો હોવા છતાં તેમણે પાર્ટીના કાર્યક્રમો અને સંસદની કાર્યવાહીમાં હાજરી આપવાનું ચાલુ રાખ્યું હતું.
કોણ છે બ્રિજ ભૂષણ સિંહ?
છ વખત સાંસદ રહી ચૂકેલા બ્રિજ ભૂષણ સિંહ પાંચ વખત ભાજપની ટિકિટ પર અને એક વખત સપાની ટિકિટ પર જીત્યા હતા. એક મજબૂત નેતા છે, જેમનો પૂર્વી યુપીના રાજકારણમાં મોટો પ્રભાવ છે. તેઓ એન્જિનિયરિંગ, ફાર્મસી, શિક્ષણ, કાયદા અને અન્ય 50થી વધુ શૈક્ષણિક સંસ્થાઓ સાથે સક્રિયપણે સંકળાયેલા છે. જેની સ્થાપના તેમણે બહરાઇચ, ગોંડા, બલરામપુર, અયોધ્યા અને શ્રાવસ્તી જિલ્લાઓમાં કરી હતી.
નાનપણથી જ અયોધ્યાના અખાડાઓમાં કુસ્તીમાં સમય પસાર કરવા ઉપરાંત, બ્રિજ ભૂષણ સિંહ રામ જન્મભૂમિ ચળવળ સાથે પણ સંકળાયેલા હતા. તેમના 2019ની ચૂંટણીના સોગંદનામા મુજબ બાબરી મસ્જિદ વિધ્વંસ કેસમાં તેમના નામનો ઉલ્લેખ કરવામાં આવ્યો હતો. તેમને અયોધ્યામાં પુજારીઓના મોટા વર્ગનો ટેકો મળ્યો છે. જાતીય સતામણીના આક્ષેપો છતાં તે આ સમર્થન અતૂટ રહ્યું છે.
ગોંડામાં ભાજપના એક નેતાએ જણાવ્યું હતું કે તેઓ તેમની ‘દબંગ નેતા’ છબીને કારણે લોકપ્રિય છે અને હંમેશાં તે છબી જાળવી રાખે છે. તેમણે આ જિલ્લાઓમાં સામ્રાજ્ય વિકસાવ્યું છે. તે ઘણી કોલેજો ચલાવે છે અને તેની કોલેજોમાં નોંધાયેલા ગરીબ વિદ્યાર્થીઓને ફીમાં છૂટ આપે છે. તેથી તે તેમના પ્રભાવ અને સદ્ભાવના બંનેને કારણે ચૂંટણી જીતે છે. દર વર્ષે 8 જાન્યુઆરીએ 67 વર્ષીય બ્રિજ શરણ સિંહ પોતાનો જન્મદિવસ ભવ્ય રીતે ઉજવે છે. તે સ્ટુડન્ટ ટેલેન્ટ સર્ચ ટેસ્ટ યાજે છે, જેમાં વિજેતાઓને રોકડ રકમ ઉપરાંત ઇનામ તરીકે મોટરબાઈક અને સ્કૂટર આપવામાં આવે છે.
તેમની પાસેથી ભાજપને શું મળ્યું?
યુપી ભાજપના એક નેતાએ જણાવ્યું હતું કે બ્રિજ ભૂષણ સિંહ માત્ર કેસરગંજમાં જ પાર્ટીની જીત સુનિશ્ચિત નથી કરતા, પરંતુ ગોંડા અને બહરાઇચની આસપાસના લોકસભા મતવિસ્તારોમાં પણ નોંધપાત્ર પ્રભાવ ધરાવે છે. પાર્ટીના આંતરિક સૂત્રોનું કહેવું છે કે આ કારણોસર પાર્ટીએ તેમને લાંબી જવાબદારી સોંપી છે. યુપી ભાજપના એક વરિષ્ઠ નેતાએ કહ્યું કે હજી સુધી કેન્દ્રીય નેતૃત્વએ તેમને કોઈ સૂચના જારી કરી નથી. તેમને માત્ર આ મુદ્દે મીડિયા સાથે વાત ન કરવા માટે કહેવામાં આવ્યું છે. તેમના મતવિસ્તાર અને આસપાસની બેઠકો પર તેમનો પ્રભાવ છે. તેની અવગણના ન કરી શકાય. પાર્ટીના અન્ય એક નેતાએ કહ્યું કે જો ભાજપ બ્રિજ ભૂષણ સિંહને ટિકિટ આપવાનો ઇનકાર કરે છે, તો તે તેમના પરિવારના સભ્યને મેદાનમાં ઉતારી શકે છે.
આ પણ વાંચો – રેસલર સાક્ષી મલિકની નિવૃત્તિ બાદ બજરંગ પુનિયાએ ઉઠાવ્યું મોટું પગલું, પદ્મશ્રી એવોર્ડ પરત કર્યો
1996માં તેઓ જેલમાં હતા ત્યારે તેમની પત્ની લોકસભા ચૂંટણી જીત્યા હતા
તેમણે કહ્યું કે 1996માં જ્યારે તેઓ ટાડા કેસમાં જેલમાં હતા ત્યારે ભાજપે લોકસભાની ચૂંટણીમાં તેમની પત્ની કેતકી દેવી સિંહને મેદાનમાં ઉતાર્યા હતા અને તે જીતી ગયા હતા. યુપીમાં આરએસએસના એક કાર્યકર્તાએ કહ્યું કે આ વિવાદ બાદ બ્રિજ ભૂષણ સિંહ ભાજપ માટે ગળામાં હાડકું બની ગયા છે. જો ભાજપ તેમને ટિકિટ નહીં આપે તો તેઓ જીતવા માટે અન્ય કોઇ પક્ષમાં જોડાઇ શકે છે અને ભાજપ એક બેઠક ગુમાવશે. તે કેસરગંજ, શ્રાવસ્તી, બસ્તી અને અયોધ્યા લોકસભા મતવિસ્તારોમાં પ્રભુત્વ ધરાવે છે. તેની અવગણના ન કરી શકાય.
સાંસદ સામેના કેસોની સ્થિતિ શું છે?
એપ્રિલમાં સાંસદ સામે બે એફઆઈઆર નોંધાઈ હતી. તેમાંથી એક 6 મહિલા કુસ્તીબાજોની ફરિયાદના આધારે અને બીજી એક સગીર, જે કુસ્તીબાજ પણ છે, અને તેના પિતાની ફરિયાદના આધારે દાખલ કરવામાં આવી હતી. દિલ્હી પોલીસે 15 જૂને બ્રિજ ભૂષણ સિંહ સામે કથિત યૌન ઉત્પીડન, મારપીટ અને છ મહિલા પહેલાવાનોનો પીછો કરવાના આરોપમાં 1,500 પાનાની ચાર્જશીટ દાખલ કરી હતી. તે જ દિવસે સગીર અને તેના પિતાએ તેમના આરોપો પાછા ખેંચી લીધા પછી પોલીસે બ્રિજ ભૂષણ સિંહ સામેના પોક્સો કેસને રદ કરવાની વિનંતી કરતો વધુ એક 550 પાનાનો અહેવાલ દાખલ કર્યો હતો. ઓગસ્ટમાં યુવતીના પિતાએ એક બંધ સુનાવણી દરમિયાન કોર્ટને જણાવ્યું હતું કે તે બંને પોલીસ તપાસથી સંતુષ્ટ છે જેમાં ભૂષણ સામે કોઈ પુરાવા મળ્યા નથી.
આ કેસની સુનાવણી અગાઉ એડિશનલ ચીફ મેટ્રોપોલિટન મેજિસ્ટ્રેટ હરજીતસિંહ જસપાલના કોર્ટમાં થઈ હતી. પરંતુ તેમને બઢતી આપવામાં આવી હતી અને હવે જાન્યુઆરીથી જસ્ટિસ પ્રિયંકા રાજપૂતની કોર્ટમાં નવી દલીલો સાંભળવામાં આવશે.
શું ભાજપને હરિયાણામાં પ્રતિક્રિયાનો ડર છે?
જોકે વિરોધ કરી રહેલા મોટા ભાગના કુસ્તીબાજો હરિયાણાના હતા. જોકે હરિયાણાના ભાજપના એક નેતાએ કોઈ પણ પ્રકારની રાજકીય પ્રતિક્રિયાની શક્યતાને નકારી કાઢી હતી. તેમણે કહ્યું કે જ્યાં સુધી જાટોની ભાવનાઓની વાત છે ત્યાં સુધી ભાજપે જગદીપ ધનખડને ઉપપ્રમુખ તરીકે ચૂંટીને સમુદાયનું સન્માન કર્યું છે. જોકે વિપક્ષે ઉપરાષ્ટ્રપતિની મિમિક્રી કરીને સોશિયલ મીડિયા પર વીડિયો વાયરલ કરીને તેમનું અપમાન કર્યું હતું. ભાજપ જાટોને આ વાત જણાવશે. જાટોની સારી એવી વસ્તી ધરાવતા રાજસ્થાનમાં પણ બ્રિજ ભૂષણનો કોઈ મુદ્દો ન હતો.
પરંતુ ભાજપના અન્ય એક નેતા આશ્વત દેખાયા ન હતા. જાટ-પ્રભુત્વવાળા હરિયાણામાં લગભગ દરેક ગામમાં પહેલવાન છે. બ્રિજ ભૂષણ સામે કાર્યવાહીના અભાવે સમાજમાં ભાજપ વિરુદ્ધ લાગણી પ્રવર્તી રહી છે. હવે ડબ્લ્યુએફઆઈ પોસ્ટ પર તેના સાથીદારની જીત બાદ, ડબલ્યુએફઆઈમાં બ્રિજ ભૂષણ સિંહનો પ્રભાવ હોઈ શકે છે. હરિયાણાના લોકોને આ પસંદ નહીં આવે અને જો વિપક્ષ આ મુદ્દાને યોગ્ય રીતે ઉઠાવશે તો આ સ્થિતિ આવતા વર્ષે યોજાનારી વિધાનસભા ચૂંટણીમાં પાર્ટીને નુકસાન પહોંચાડી શકે છે.” હરિયાણાની લગભગ 28 ટકા વસ્તી (મતદાતાઓનો એક ચતુર્થાંશ ભાગ) જાટ છે. ઉત્તરીય હરિયાણાને બાદ કરતા રાજ્યમાં દરેક જગ્યાએ જાટોનો ગઢ છે.
