હેમંત સોરેન ધરપકડની આશંકા વચ્ચે રાંચી પરત ફર્યા, પત્નીની હાજરીમાં ધારાસભ્યો સાથે મીટિંગ

Money Laundering Case : ઝારખંડના મુખ્યમંત્રી હેમંત સોરેન 40 કલાકથી ‘લાપતા’ હોવાની અટકળો વચ્ચે મંગળવારે સવારે અચાનક રાંચી પહોંચી ગયા હતા. તેમણે પોતાની પાર્ટી જેએમએમ અને ગઠબંધન કોંગ્રેસ અને આરજેડીના તમામ ધારાસભ્યોને રાંચી બોલાવ્યા છે અને તેમને પરિસ્થિતિ પર નજર રાખવા જણાવ્યું છે. એવી સંભાવના છે કે ઇડી તેમની ધરપકડ કરી શકે છે. એન્ફોર્સમેન્ટ ડિરેક્ટોરેટ કથિત જમીન કૌભાંડ અને મની લોન્ડરિંગ કેસના આરોપી હેમંત સોરેનની પૂછપરછ કરવા માંગે છે. હેમંત સોરેને ઇડીને એક ઇ-મેઇલ મોકલ્યો હતો. જેમાં માહિતી આપવામાં આવી હતી કે તેઓ બુધવારે બપોરે 1 વાગ્યે પોતાના નિવાસસ્થાને પોતાનું નિવેદન નોંધવા માટે તૈયાર છે.

રાજભવનમાં પણ હલચલ તેજ

રાંચી પહોંચ્યા બાદ તરત જ સીએમ હેમંત સોરેને પોતાના ઘરે ધારાસભ્યો સાથે મુલાકાત શરૂ કરી દીધી હતી. આ બેઠકમાં તેમના પત્ની કલ્પના પણ હાજર હતા. દરમિયાન રાજભવનમાં પણ હલચલ તેજ થઇ ગઇ છે. રાજ્યપાલે મુખ્ય સચિવ અને ડીજીપીને ફોન કરીને સમગ્ર મામલાની જાણકારી માંગી છે. મંગળવારે સવારે રાંચીમાં ઝારખંડના સીએમ આવાસ, રાજભવન અને ઈડીની ઓફિસથી 100 મીટરની અંદર કલમ 144 લાગુ કરી દેવામાં આવી છે.

અધિકારીઓએ જણાવ્યું હતું કે રાંચીના મુખ્ય વિસ્તારોમાં સવારે 10 વાગ્યાથી રાત્રે 10 વાગ્યા સુધી પ્રતિબંધિત આદેશો લાદવામાં આવ્યા છે. જેમાં મુખ્યમંત્રી નિવાસસ્થાન, રાજભવન અને ઇડીની ઓફિસ 100 મીટરના ક્ષેત્રમાં કલમ 144 લગાડી દેવામાં આવી છે.

સોમવારે ઈડીએ સોરેનના દિલ્હી સ્થિત નિવાસસ્થાને તલાશી લીધી હતી

હેમંત સોરેનની પૂછપરછ કરવા માટે તેમને ઇડી તરફથી અત્યાર સુધીમાં 10 વખત સમન્સ પાઠવવામાં આવ્યું છે. હાલમાં જ રાંચીમાં તેમની પૂછપરછ કરવામાં આવી હતી. ઈડીએ તેમને આગામી પૂછપરછ માટે સમય આપવા કહ્યું હતું. પરંતુ સોરેને વ્યસ્ત બજેટ સત્રને કારણે સમય આપવાની મજબૂરીનો હવાલો આપીને મળવાનો ઈનકાર કરી દીધો હતો.

આ પણ વાંચો – કયા કેસમાં ઇડી હેમંત સોરેનને શોધી રહી છે? તપાસ એજન્સીએ અત્યાર સુધીમાં 14 લોકોની કરી છે ધરપકડ

આ દરમિયાન દિલ્હી આવવાની સૂચના પર ઈડી સોમવારે તેમના નિવાસ સ્થાને પહોંચી હતી. પરંતુ 13 કલાકની તપાસ બાદ સોરેન મળી શક્યા ન હતા. સર્ચ દરમિયાન હરિયાણા રજિસ્ટ્રેશન નંબરવાળી BMW કાર, 36 લાખ રૂપિયા રોકડા અને અનેક દસ્તાવેજો ઈડીના અધિકારીઓએ જપ્ત કર્યા હતા. પૂછપરછ માટે કાર ચાલકને પણ સાથે લઈ જવામાં આવ્યો હતો.

એવું કહેવામાં આવી રહ્યું છે કે સીએમ હેમંત સોરેન કાનૂની નિષ્ણાંતોને મળી રહ્યા છે અને પોતાનો બચાવ કરવાના રસ્તાઓ શોધી રહ્યા છે. આ ઉદ્દેશ્ય સાથે તેમની દિલ્હી મુલાકાત પર પણ ચર્ચા કરવામાં આવે છે.

7,000 વધારાના પોલીસ કર્મચારીઓને તૈનાત કરવામાં આવ્યા

રાજ્યપાલ સી પી રાધાકૃષ્ણને રાજભવનમાં મુખ્ય સચિવ લાલબિયાકત્તાલુઆંગા ખીયાંગ્તે અને અધિક મુખ્ય સચિવ (ગૃહ) અવિનાશ કુમાર અને અન્ય અધિકારીઓ સાથે સુરક્ષાની સ્થિતિની સમીક્ષા કરવા માટે બેઠક યોજી હતી. ડીજીપીએ જણાવ્યું હતું કે કાયદો અને વ્યવસ્થા જાળવવા માટે રાજ્યભરમાં વિસ્તૃત સુરક્ષા વ્યવસ્થા કરવામાં આવી છે અને 7,000 વધારાના પોલીસ કર્મચારીઓને તૈનાત કરવામાં આવ્યા છે.