પ્રાથમિક શાળાના બાળકોએ PM મોદી પર કરી ખોટી ટિપ્પણી, શાળા સામે રાજદ્રોહનો કેસ, હાઈકોર્ટે કર્યો ન્યાય

કર્ણાટક : એક શાળા મેનેજમેન્ટ સામેના રાજદ્રોહના કેસને રદ કરતા, કર્ણાટક હાઈકોર્ટે અવલોકન કર્યું કે, વડા પ્રધાન વિરુદ્ધ ઉપયોગમાં લેવાતા બિનસંસદીય શબ્દો અપમાનજનક અને બેજવાબદાર હતા, પરંતુ તે રાજદ્રોહ સમાન નથી. આવા કિસ્સામાં નોંધાયેલા કેસનું કોઈ કારણ નથી.

કલબુર્ગી બેન્ચના જસ્ટિસ હેમંત ચંદનગૌદારે બિદરના ન્યૂ ટાઉન પોલીસ સ્ટેશનમાં શાહીન સ્કૂલના સંચાલકો અલાઉદ્દીન, અબ્દુલ ખાલિક, મોહમ્મદ બિલાલ ઇનામદાર અને મોહમ્મદ મહેતાબ વિરુદ્ધ નોંધાયેલા કેસને રદ કર્યો હતો. કોર્ટે કહ્યું કે, આ કેસમાં IPCની કલમ 153 (A) (ધાર્મિક જૂથો વચ્ચે દુશ્મનાવટને પ્રોત્સાહન આપવો) હેઠળ કોઈ કેસ કરવામાં આવતો નથી.

નાટકમાં કરાયેલી ટિપ્પણીને કોર્ટે ખોટી ગણાવી હતી

જસ્ટિસ ચંદનગૌદરે પોતાના ચુકાદામાં કહ્યું હતું કે, વડાપ્રધાનને ચપ્પલથી મારવામાં આવે તેવા અસંસદીય શબ્દોનો ઉપયોગ માત્ર અપમાનજનક જ નહીં પરંતુ બેજવાબદાર પણ છે. સરકારની નીતિઓની રચનાત્મક ટીકા કરવાની છૂટ છે. પરંતુ નીતિવિષયક નિર્ણયો લેવા માટે બંધારણીય અધિકારીઓને અપમાનિત કરી શકાય નહીં.

કોર્ટે પૂછ્યું- સ્કૂલની અંદરના ડ્રામાથી લોકો કેવી રીતે ગુસ્સે થઈ શકે છે

કોર્ટે કહ્યું કે, બાળકો દ્વારા રજૂ કરવામાં આવેલા નાટકમાં સરકારના અનેક કાયદાઓની ટીકા કરવામાં આવી હોવાના આરોપો છે. નાટકમાં કહેવામાં આવ્યું હતું કે, જો આવા કાયદા લાગુ કરવામાં આવશે તો મુસ્લિમોને દેશ છોડવો પડી શકે છે. શાળા પરિસરમાં નાટક રજૂ કરવામાં આવ્યું હતું. બાળકોએ એવા કોઈ શબ્દોનો ઉપયોગ કર્યો ન હતો, જે લોકોને હિંસા માટે ઉશ્કેરે કે અવ્યવસ્થા ફેલાવે.

હાઈકોર્ટે કહ્યું કે, લોકોને આ ડ્રામા વિશે ત્યારે ખબર પડી, જ્યારે એક આરોપીએ આ ડ્રામાનો વીડિયો સોશિયલ મીડિયા પર શેર કર્યો. કોર્ટે તેના ચુકાદામાં કહ્યું હતું કે, તેથી તે દૂરથી કલ્પના પણ કરી શકાય તેમ નથી કે, અરજદારો દ્વારા લોકોને સરકાર વિરુદ્ધ હિંસા માટે ઉશ્કેરવા માટે નાટકનું આયોજન કરવામાં આવ્યું હતું.

શાળાના વર્ગ IV, V અને VI ના વિદ્યાર્થીઓએ 21 જાન્યુઆરી, 2020 ના રોજ સુધારેલા નાગરિકતા અધિનિયમ અને નાગરિકોના રાષ્ટ્રીય રજિસ્ટર વિરુદ્ધ નાટકનું આયોજન કર્યું હતું, જેના પગલે શાળા પ્રશાસન સામે રાજદ્રોહની FIR દાખલ કરવામાં આવી હતી. શાળાએ તેને હાઈકોર્ટમાં પડકાર્યો હતો અને તેને બરતરફ કરવાની માંગ કરી હતી.