Karnataka: કર્ણાટક સિદ્ધારમૈયા સરકારે SBI અને PNBને આપ્યો ઝટકો, સરકારી વિભાગોને બેંક ખાતા બંધ કરવા આદેશ

Karnataka Government Suspends SBI PNB Bank Account: કર્ણાટકની સિદ્ધારમૈયા સરકારે દેશની બે મોટી સરકારી બેંકો વિશે મહત્વપૂર્ણ આદેશ જાહેર કર્યો છે. કર્ણાટક સરકારે તેના તમામ વિભાગોને પીએનબી એટલે કે પંજાબ નેશનલ બેંક અને સ્ટેટ બેંક ઓફ ઇન્ડિયા એટલે કે એસબીઆઇના એકાઉન્ટમાંથી તેમની તમામ નાણાકીય લેવડ દેવડ બંધ કરવાનો આદેશ આપ્યો છે. તેમજ રાજ્ય સરકારના આ આદેશ બાદ હવે તમામ વિભાગોએ આ બંને બેંકોમાં જમા કરાવેલા પોતાના પૈસા ઉપાડવા પડશે અને બેંક એકાઉન્ટ સંપૂર્ણપણે બંધ કરવું પડશે.

હકીકતમાં કર્ણાટક સરકાર દ્વારા જારી કરવામાં આવેલો આ આદેશ મુખ્યત્વે રાજ્યના નાણાં વિભાગના સચિવ જાફર દ્વારા કરવામાં આવ્યો છે. આ મુજબ રાજ્ય સરકારના વિભાગોએ એસબીઆઈ અને પીએનબી બંને બેંકોમાં પોતાના પૈસા જમા ન કરાવવા જોઈએ. આ બંને બેંકોમાંથી કોઈ પણ પ્રકારની લેવડ દેવડ ન થવી જોઈએ.

એસબીઆઈ અને પીએનબી પર ગંભીર આરોપ

કર્ણાટકના નાણાં સચિવે જારી કરેલા આદેશ મુજબ આ બંને બેંકોમાં જમા સરકારી નાણાંના દુરુપયોગના કિસ્સા સામે આવ્યા છે, જે અંગે બેંકોને ચેતવણીઓ પણ આપવામાં આવી હતી, આમ છતાં બંને બેંકોએ નાણાંના ઉપયોગને લઈને કોઈ પણ પ્રકારની કાર્યવાહી કરી ન હતી, જેના કારણે હવે બંને બેંકોને રાજ્ય સરકારના તમામ વિભાગોના ખાતા બંધ કરવાનો આદેશ આપવામાં આવ્યો છે.

સરકારી વિભાગ તમામ પૈસા ઉપાડી લે

એસબીઆઇ - પીએનબી ને આપવામાં આવેલી સૂચના અનુસાર કર્ણાટક રાજ્ય સરકારની તમામ સરકારી સંસ્થાઓ અને નિગમો અને સ્થાનિક સંસ્થાઓ અને અન્ય સંસ્થાઓએ સ્ટેટ બેંક ઓફ ઇન્ડિયા અને પંજાબ નેશનલ બેંકના ખાતા બંધ કરી તેમાં જમા સંપૂર્ણ પૈસા ઉપાડવા પડશે.

આ પણ વાંચો | હવે ચીન અને પાકિસ્તાનનો પરસેવો છૂટી જશે, ભારત અમેરિકા પાસેથી ખરીદવા જઈ રહ્યું છે આ ઘાતક ‘હન્ટર કિલર’

અત્રે નોંધનીય છે કે રાજ્યની મોટાભાગની નાણાકીય કામગીરી આ બે બેંકો એટલે કે એસબીઆઇ અને પંજાબ નેશનલ બેંક દ્વારા કરવામાં આવે છે, પરંતુ રાજ્ય સરકારે આરોપ લગાવ્યો છે કે બંને બેંકોએ સરકારના નાણાંનો દુરુપયોગ કર્યો છે.