જો એકનાથ શિંદે સત્તાપલટામાં નિષ્ફળ ગયા હોત તો તેમણે પોતાને ગોળી મારી દીધી હોત, મહારાષ્ટ્રના મંત્રીનો ચોંકાવનારો ખુલાસો

Maharashtra Politics : એકનાથ શિંદે જ્યારથી મહારાષ્ટ્રના મુખ્યમંત્રી બન્યા છે ત્યારથી ઉદ્ધવ જૂથ અને શિંદે જૂથ વચ્ચે આક્ષેપો અને પ્રતિઆક્ષેપોનો દોર ચાલી રહ્યો છે. બંને તરફથી નેતાઓના નવા નવા નિવેદનો પણ સામે આવી રહ્યા છે. જેના કારણે રાજકીય માહોલમાં અસમંજસની સ્થિતિ છે. મહારાષ્ટ્રના શિવસેનાના સ્કૂલ શિક્ષણ મંત્રી દીપક વી.કેસરકરે સનસનીખેજ દાવો કર્યો છે.

દીપક વી કેસરકરે કહ્યું હતું કે જો જૂન 2022 માં ઉદ્ધવ ઠાકરેની આગેવાની હેઠળની તત્કાલીન મહા વિકાસ આઘાડી (એમવીએ) સરકારને પાડવાનો 40 ધારાસભ્યો અને અન્ય અપક્ષોનો પ્રયાસ નિષ્ફળ ગયો હોત તો બળવાખોર નેતા (હાલના મુખ્ય પ્રધાન) એકનાથ શિંદેએ પોતાને ગોળી મારી દીધી હોત.

કેસરકરે કહ્યું - તેઓ એકનાથ શિંદેની ખૂબ જ નજીક છે

કેસરકરે સનસનાટીભર્યો દાવો કરતાં કહ્યું હતું કે તેઓ શિંદેની ખૂબ જ નજીક છે અને તેઓ નિયમિતપણે નોટોની આપ-લે કરતા હતા. તેથી તેમને તેની જાણ હતી. તેમણે કહ્યું કે શિંદેએ અમારી સાથે બળવાનું પગલું ભર્યું હતું. જોકે તેઓ ખૂબ જ સ્પષ્ટ હતા અને કહ્યું હતું કે જો તે નિષ્ફળ જશે તો તેઓ અમને બધાને પાર્ટીમાં પાછા મોકલી દેશે. ઠાકરેને ફોન કરશે અને સોરી કહેશે. અમને (40 ધારાસભ્યોને) સંપૂર્ણપણે મુક્ત કરશે અને તેની સંપૂર્ણ જવાબદારી લઇ લેશે. આ પછી તે પોતાના માથામાં ગોળી મારી દેશે.

આ પણ વાંચો - આગળ વધતું ભારત આસુરી શક્તિઓને પસંદ નથી, સ્વાર્થ માટે લોકોને લડાવવા માંગે છે : મોહન ભાગવત

એકનાથ શિંદે સરકારને 30 જૂને એક વર્ષ પૂર્ણ થશે

એકનાથ શિંદેએ કેસરકરને એમ પણ કહ્યું હતું કે તેઓ સુનિશ્ચિત કરશે કે કોઈપણ બળવાખોર ધારાસભ્યની રાજકીય સંભાવનાઓ ખતમ ન થાય. બાદમાં શિંદેના મુખ્યમંત્રી બનવાની સાથે બળવો સફળ સાબિત થયો હતો. શિંદે મહારાષ્ટ્રના મુખ્યમંત્રી તરીકેનો એક વર્ષનો કાર્યકાળ 30 જૂને પૂર્ણ કરશે.

મંગળવારે ધારાસભ્યોના બળવાની પ્રથમ વરસીના પ્રસંગે મંત્રીએ મીડિયાને આ માહિતી આપી હતી. એમવીએના સહયોગી રાષ્ટ્રવાદી કોંગ્રેસ પાર્ટી-શિવસેના (ઉદ્ધવ જૂથ)એ આ દિવસને ગદ્દાર દિવસ તરીકે ઉજવ્યો હતો. કેસરકરે કહ્યું કે તેઓ સાચા શિવસૈનિક છે. શું તમે તેમને દેશદ્રોહી કહી રહ્યા છો? હવે જો આપણે તેમને ટેકો ન આપીએ તો અમે બીજા કોને ટેકો આપી શકીએ?

સંજય રાઉતે વળતો જવાબ આપ્યો

રાજ્યસભાના સાંસદ રાઉતે કહ્યું કે કેસરકર જે કહી રહ્યા છે તે ગંભીર બાબત છે. પોલીસે તેમને તાત્કાલિક ઉપાડી લેવા જોઈએ. તેઓ મંત્રી છે. તે કોઈના આત્મહત્યા કરવાના ઇરાદા વિશેની માહિતી દબાવી રહ્યા છે.