ઉત્તરાખંડની મદરેસાઓમાં 10 ટકા બાળકો બિન-મુસ્લિમ છે, મદરેસા બોર્ડના રિપોર્ટ પર હોબાળો, કોંગ્રેસે ભાજપના હિન્દુત્વ મોડલ પર ઉઠાવ્યા સવાલ

અવનિશ મિશ્રા |Uttarakhand Madrasa : નેશનલ કમિશન ફોર પ્રોટેક્શન ઓફ ચાઈલ્ડ રાઈટ્સ (NCPCR) એ ઉત્તરાખંડ મદરેસા એજ્યુકેશન બોર્ડના એક અહેવાલ સામે વાંધો ઉઠાવ્યો છે, જેમાં કહેવામાં આવ્યું છે કે, રાજ્યની 30 મદરેસાઓમાં અભ્યાસ કરતા 7,399 વિદ્યાર્થીઓમાંથી લગભગ 10 ટકા મુસ્લિમ નથી. હવે NCPCR ઇચ્છે છે કે, લઘુમતી કલ્યાણ વિભાગ સ્પષ્ટ કરે કે, આ બાળકોને શિક્ષણ અધિકાર કાયદા હેઠળ "શાળાઓ" માં શા માટે નોંધવામાં આવ્યા નથી.

કોંગ્રેસે ભાજપ સરકાર પર આકરા પ્રહારો કર્યા

વિપક્ષ કોંગ્રેસે આ મામલે ભાજપ પર પ્રહારો કર્યા છે. કોંગ્રેસે કહ્યું છે કે, રાજ્યમાં મદરેસામાં 749 બિન-મુસ્લિમ બાળકો અભ્યાસ કરે છે. આ ઉત્તરાખંડની વાસ્તવિકતા દર્શાવે છે, ખાસ કરીને હિન્દુત્વ મોડેલની. ઉત્તરાખંડ કોંગ્રેસના પ્રમુખ ગરિમા મેહરા દસૌનીએ કહ્યું કે, બિન-મુસ્લિમ પરિવારો તેમના બાળકોને સરકારી શાળાઓને બદલે મદરેસામાં મોકલવાથી સરકાર અને શિક્ષણ વ્યવસ્થા પર મોટા સવાલો ઉભા થાય છે.

ભાજપે શું કહ્યું?

રાજ્યમાં ભાજપના મીડિયા પ્રભારી મનવીર સિંહ ચૌહાણે કહ્યું કે, પુષ્કર સિંહ આ બાબતથી વાકેફ છે. આ બાળકોને સરકારી શાળાઓમાં પ્રવેશ અપાવવાના પ્રયાસો કરવામાં આવશે. તેમણે કહ્યું કે, આ બાળકોએ મદરેસામાં કયા સંજોગોમાં પ્રવેશ લીધો તેની તપાસ કરવામાં આવશે. સરકાર આ અંગે જાગૃત છે અને છેતરપિંડીથી ચાલતા અનેક મદરેસાઓ બંધ કરી દેવામાં આવ્યા છે. અન્ય ઘણા લોકો તપાસ હેઠળ છે.

મદરેસામાં ભણતા બિન-મુસ્લિમ બાળકોનો મામલો કેવી રીતે સામે આવ્યો?

વક્ફ બોર્ડને આપવામાં આવેલી સૂચનાને પગલે NCPCR દ્વારા મદરેસાઓમાં બિન-મુસ્લિમ બાળકોનો ડેટા એકત્રિત કરવામાં આવ્યો હતો. અગાઉ ઉત્તરાખંડ વક્ફ બોર્ડે NCERT અભ્યાસક્રમ લાગુ કરવાની જાહેરાત સાથે મદરેસાઓના આધુનિકીકરણની જાહેરાત કરી હતી. આ અભ્યાસક્રમમાં વૈજ્ઞાનિક શિક્ષણની સાથે માળખાકીય સુવિધાઓનો ઘણો વિકાસ થયો હતો. રાજ્યમાં ઉત્તરાખંડ વક્ફ બોર્ડ હેઠળ મદરેસા ચલાવવામાં આવે છે.

તમને જણાવી દઈએ કે, ગયા વર્ષે મદરેસાઓમાં યુનિફોર્મ ડ્રેસ કોડ લાગુ કરવામાં આવ્યો હતો. એટલું જ નહીં, અન્ય શાળાઓની જેમ મદરેસાઓમાં પણ સવારે 8 થી 2 વાગ્યા સુધીના વર્ગનો સમય નક્કી કરવામાં આવ્યો હતો. વકફ બોર્ડના અધ્યક્ષ શાદાબ શમ્સ (ભાજપ સભ્ય)નું કહેવું છે કે, તેઓ સંસ્થા સાથે નોંધાયેલા મદરેસાઓમાં સંસ્કૃત લાગુ કરશે અને રાજ્યની તમામ મદરેસાઓનું સર્વેક્ષણ કરવા માટે એક સમિતિની રચના કરશે.

શાદાબ શમ્સ કહે છે કે, હિંદુ પાદરીઓને સંસ્કૃત શીખવવા માટે આમંત્રિત કરવામાં આવશે. તેઓ ગરીબ મદરેસાઓ પણ અપનાવી શકે છે. તેનાથી બે ધર્મો વચ્ચેનું અંતર ઘટશે. તેમણે કહ્યું કે, ઉત્તરાખંડ દેવભૂમિ હોવાથી આપણે સંસ્કૃતિનું પાલન કરવું જોઈએ.

આ પણ વાંચો - Bihar Caste Census | બિહાર જાતિ વસ્તીગણતરી : બિહારમાં અનામતનો વ્યાપ વધીને 75 ટકા થશે, જાણો કોને કેટલી અનામત અપાશે?

ધ ઈન્ડિયન એક્સપ્રેસ સાથે વાત કરતા શમ્સે કહ્યું કે, આ મદરેસાઓમાં શું શિક્ષણ આપવામાં આવે છે તે જોવાની જરૂર છે. મદરેસા બોર્ડનો એક નિશ્ચિત અભ્યાસક્રમ છે અને દરેક મહત્વપૂર્ણ વિષય ત્યાં ભણાવવામાં આવે છે. જો આ મદરેસાઓમાં આવું જ હોય અને અહીં માત્ર ધાર્મિક શિક્ષણ જ ન અપાય તો કોઈ સમસ્યા ન હોવી જોઈએ. તેથી, કોઈપણ નિષ્કર્ષ પર પહોંચતા પહેલા, આપણે તપાસ કરવી પડશે કે આ મદરેસાઓ શું શીખવે છે. તેમણે કહ્યું કે, રાજ્યમાં 415 રજિસ્ટર્ડ મદરેસા છે, જેમાંથી 117 વક્ફ બોર્ડ હેઠળ છે અને બાકીના ઉત્તરાખંડ મદરેસા શિક્ષણ બોર્ડ હેઠળ છે.