વોટર આઈડી કાર્ડને આધારથી લિંક કરવાની તૈયારી, ચૂંટણી પંચે બોલાવી મહત્વની બેઠક

Aadhaar-Voter ID Card Linking: વોટર આઈડી કાર્ડ સાથે આધારને લિંક કરવા અંગે ચૂંટણી પંચ આગામી સપ્તાહે કેન્દ્રીય ગૃહ મંત્રાલય, કાયદા મંત્રાલય અને UIDAIના ઉચ્ચ અધિકારીઓ સાથે બેઠક કરશે. ડુપ્લીકેટ વોટર આઈડી કાર્ડના મુદ્દે સંસદમાં તાજેતરમાં થયેલા વિવાદના પગલે આ પગલું લેવામાં આવી રહ્યું છે. ચૂંટણી પંચના સૂત્રોએ ઈન્ડિયન એક્સપ્રેસને આ માહિતી આપી છે.

જનપ્રતિનિધિત્વ અધિનિયમ 1951માં સુધારા પછી 2021માં આધારને ઇપીઆઈસી સાથે જોડવાની મંજૂરી આપવામાં આવી હતી. ચૂંટણી પંચે સ્વૈચ્છિક ધોરણે મતદારો પાસેથી આધાર નંબર એકત્રિત કરવાનું શરૂ કર્યું છે. જોકે ચૂંટણી પંચે હજુ સુધી આ બંને ડેટાબેઝને લિંક કર્યા નથી. આ કવાયતનો હેતુ ચૂંટણી પંચને મતદાર યાદીને સાફ કરવા માટે ડુપ્લિકેટ નોંધણીઓ શોધવામાં મદદ કરવાનો હતો. જોકે આધારને લિંક કરવું ફરજિયાત ન હતું.

ચૂંટણી અધિકારીઓની મોટી બેઠક

મુખ્ય ચૂંટણી કમિશનર જ્ઞાનેશ કુમાર, ચૂંટણી કમિશનર સુખબીર સિંહ સંધુ અને વિવેક જોશી 18 માર્ચે કેન્દ્રીય ગૃહ સચિવ ગોવિંદ મોહન, વિધાનસભા વિભાગના સચિવ રાજીવ મણિ અને યુઆઇડીએઆઇના સીઇઓ ભુવનેશ કુમારને મળીને ઇપીઆઇસી સાથે આધારને જોડવા અંગે ચર્ચા કરશે.

આ બેઠક એવા સમયે યોજાઈ રહી છે જ્યારે તૃણમૂલ કોંગ્રેસે પશ્ચિમ બંગાળ અને અન્ય રાજ્યોમાં વોટર્સ પાસે એક જ ઇપીઆઈસી નંબર હોવાનો મુદ્દો ઉઠાવ્યો છે. આના કારણે ચૂંટણી પંચે સ્વીકાર્યું છે કે કેટલાક રાજ્યોના મુખ્ય ચૂંટણી અધિકારીઓએ ઇપીઆઇસી નંબર જારી કરતી વખતે ખોટી અલ્ફાન્યૂમેરિક શ્રેણીનો ઉપયોગ કર્યો હતો.

રાહુલ ગાંધીએ લોકસભામાં ચર્ચાની માંગ કરી હતી

કોંગ્રેસ સાંસદ રાહુલ ગાંધીએ પણ લોકસભામાં મતદાતાઓની યાદી પર ચર્ચા કરવાની માંગ કરી હતી. રાહુલ ગાંધીએ કહ્યું હતું કે દરેક રાજ્યમાં મતદાર યાદી પર પ્રશ્નો ઉભા થઈ રહ્યા છે. મહારાષ્ટ્રમાં બ્લેક એન્ડ વ્હાઈટ વોટર્સ લિસ્ટને લઈને સવાલો ઉભા થયા હતા. સમગ્ર વિપક્ષ માત્ર એટલું જ કહી રહ્યો છે કે, મતદાર યાદી પર ચર્ચા થવી જોઈએ.

ચૂંટણી પંચે તાજેતરમાં જાહેરાત કરી હતી કે તે ત્રણ મહિનાની અંદર ડુપ્લિકેટ નંબરોવાળા મતદારોને નવા ઇપીઆઈસી નંબરો જારી કરશે. પંચે કહ્યું કે ડુપ્લિકેટ નંબર હોવાનો અર્થ એ નથી કે તેઓ નકલી મતદારો છે અને ફક્ત કોઈ ચોક્કસ મત વિસ્તારમાં નોંધાયેલા લોકો જ ત્યાં મત આપી શકે છે.