રાહુલના ‘વોટ ચોરી’ કેમ્પેઇન પર ભાજપનો વળતો પ્રહાર, કહ્યું - નાગરિકતા મળ્યા પહેલા વોટર લિસ્ટમાં જોડાયું સોનિયા ગાંધીનું નામ

Bihar Voter List : બિહારમાં મતદાર યાદીમાં સુધારાને લઈને ચાલી રહેલા વિવાદ વચ્ચે વિપક્ષી નેતા રાહુલ ગાંધીએ ચૂંટણી પંચ અને ભાજપ પર 'વોટ ચોરી'નો આરોપ લગાવ્યો છે. તેના જવાબમાં ભારતીય જનતા પાર્ટીએ વળતો પ્રહાર કરતા આરોપ લગાવ્યો કે કોંગ્રેસ નેતા સોનિયા ગાંધીનું નામ નાગરિકતા મળ્યા પહેલા જ મતદાર યાદીમાં નોંધવામાં આવ્યું હતું. આ મુદ્દે ભાજપના આઈટી સેલના વડા અમિત માલવિયએ ટ્વિટ કર્યું તો બીજી તરફ લોકસભાના સાંસદ અને પૂર્વ કેન્દ્રીય મંત્રી અનુરાગ ઠાકુરે પ્રેસ કોન્ફરન્સ કરી હતી. આ દરમિયાન તેમણે તેજસ્વી યાદવથી લઈને મમતા બેનર્જી સુધીના આરોપોનો પણ જવાબ આપ્યો છે.

અનુરાગ ઠાકુરે દિલ્હીમાં ભાજપના મુખ્યાલયમાં પ્રેસ કોન્ફરન્સ દરમિયાન કહ્યું કે જ્યારે એસઆઈઆર લગાવવામાં આવી કે નકલી મતોની સફાઈ થઈ શકે છે અને પાકા નાગરિકોના અધિકારો ના છીનવાય, કોંગ્રેસ પાર્ટી તેનો વિરોધ કરી રહી છે. અનુરાગ ઠાકુરે કોંગ્રેસ પર ગંભીર આરોપ લગાવતા કહ્યું કે કોંગ્રેસ ભારતની જનતાના વોટને અપમાનિત કેમ કરવા માંગે છે. તેમણે કહ્યું કે જો ભારતના મતદારોએ વારંવાર કોંગ્રેસને નકારી છે, તો હવે કોંગ્રેસ પોતાની ઘૂસણખોરી વોટબેંક સુધી સીમિત રહેવા માંગે છે.

તેમની પાસે ચૂંટણી માટે કોઈ મુદ્દા બચ્યા નથી

ભાજપના સાંસદ અનુરાગ ઠાકુરે કોંગ્રેસ અને રાહુલ ગાંધી પર આકરા પ્રહારો કર્યા છે. તેમણે કહ્યું કે તે હારે છે અને દોષનો ટોપલો ચૂંટણી પંચ (ઇસીઆઈ) અને ભાજપ પર ઢોળી દે છે. ધૂળ તેમના ચહેરા પર હતી અને તે અરીસાને સાફ કરતા રહ્યા. ગઈ કાલે કોંગ્રેસના કોઇ નેતાએ કહ્યું હતું કે રાહુલ ગાંધીએ 'ભયંકર' કર્યું છે, હું કહીશ કે ભયંકર નહીં, પણ 'બ્લન્ડર' કર્યું છે. ચૂંટણી સમયે બંધારણ અંગે ભ્રમ ફેલાવ્યો અને હવે તેઓ ફરીથી જૂઠું બોલી રહ્યા છે. તેમની પાસે ચૂંટણી માટે કોઈ મુદ્દા બચ્યા નથી.

ગાંધી પરિવાર પર ગંભીર આરોપ

અનુરાગ ઠાકુરે કહ્યું કે ઇન્દીરા ગાંધીએ કહ્યું હતું કે મતદાતાઓ મૂર્ખાઓનો સમૂહ છે. રાજીવ ગાંધી જ્યારે ચૂંટણી હારી ગયા ત્યારે તેમણે બેલેટ પેપરને જવાબદાર ઠેરવ્યું હતું. રાહુલ ગાંધીના પિતા કહેતા હતા કે વોટિંગ મશીનથી ચૂંટણી કરાવો અને રાહુલ ગાંધી કહે છે કે બેલેટ પેપરથી ચૂંટણી કરાવો. આ લોકો બીજા પર દોષનો ટોપલો ઢોળતા રહે છે, તેથી હવે પરિવારે નક્કી કરવું જોઈએ કે કોને રાખે અને કોને નહીં.

બિહાર ચૂંટણી વિશે કહી આ વાત

અનુરાગ ઠાકુરે પ્રેસ કોન્ફરન્સમાં એમ પણ કહ્યું હતું કે બિહારની ચૂંટણીમાં હાર્યા બાદ કોંગ્રેસે વિપક્ષી પાર્ટીઓ સાથે મળીને ખોટા આરોપ લગાવવાનું શરૂ કરી દીધું હતું. અનુરાગ ઠાકુરે કહ્યું કે કોંગ્રેસ કહે છે કે ભાજપ માટે ઇવીએમમાં ગરબડ કરવામાં આવી છે. પછી તે કહેશે કે ઇવીએમ પર પ્રતિબંધ મૂકો અને બેલેટ પેપર્સ પાછા લાવો. તે પછીથી કહે છે કે ઇવીએમને દૂરથી હેક કરી શકાય છે. તેમણે એમ પણ કહ્યું હતું કે કોંગ્રેસ દરેક હાર બાદ આત્મમંથન કરવાને બદલે ઇવીએમ, ચૂંટણી પંચ અને બંધારણીય સંસ્થાઓને જવાબદાર ઠેરવતી રહે છે.

આ પણ વાંચો - હરભજન સિંહની અપીલ, કહ્યું – એશિયા કપમાં પાકિસ્તાન સામે ન રમે ભારત

રાયબરેલીની મતદાર યાદીનો મુદ્દો ઉઠાવ્યો

અનુરાગ ઠાકુરે કહ્યું કે રાયબરેલીમાં મોહમ્મદ કૈફ ખાન, બૂથ નંબર 83, 151, 218 દરેક જગ્યાએ તેમનું નામ છે. ઘર નંબર 189 ના પોલિંગ 131 પર 47 મતદાર આઈડી રજિસ્ટર થયા છે. બંગાળના ડાયમંડ હાર્બરમાં બૂથ નંબર 0011, બૂથ નંબર 103 પર ઘણા ધર્મોના મતદારોની નોંધણી કરવામાં આવી છે. રાયબરેલીમાં એક જ ઘરમાં 47 મતદાતાઓની નોંધણી કેવી રીતે થઈ, રાહુલજી અને સોનિયાજીએ આ નામો ક્યારેય દેખાયા નહીં.

અમિત માલવિયાએ લગાવ્યા ગંભીર આરોપ

ભાજપના આઇટી સેલના વડા અને બંગાળ ભાજપના સહ-પ્રભારી અમિત માલવિયાએ એક્સ પર એક પોસ્ટ દ્વારા આરોપ લગાવ્યો છે કે સોનિયા ગાંધીનું નામ 1980 અને 1983 માં બે વખત મતદાર યાદીમાં સામેલ કરવામાં આવ્યું હતું, જ્યારે બંને વખત તેમની પાસે ભારતીય નાગરિકત્વ ન હતું. અમિત માલવિયાએ કહ્યું કે આ આખો મામલો ચૂંટણી કાયદાના સ્પષ્ટ ઉલ્લંઘનનું ઉદાહરણ છે અને કદાચ આ જ કારણ છે કે રાહુલ ગાંધી પણ આવા મતદારોને કાયદેસર કરવાની તરફેણમાં છે, જે અયોગ્ય અથવા ગેરકાયદેસર છે અને "સ્પેશિયલ ઇન્ટેન્સિવ રિવિઝન" (એસઆઈઆર) નો વિરોધ કરે છે

અમિત માલવિયાએ શું કહ્યું?

અમિત માલવિયાએ પોતાની એક્સ પોસ્ટમાં કહ્યું કે સોનિયા ગાંધીનું નામ સૌ પ્રથમ 1980 માં મતદારોની સૂચિમાં નોંધવામાં આવ્યું હતું જ્યારે તેઓ ઇટાલિયન નાગરિક હતા અને તેમણે હજી સુધી ભારતીય નાગરિકત્વ મેળવ્યું ન હતું. તે સમયે ગાંધી પરિવાર વડાપ્રધાન ઇન્દિરા ગાંધીના સત્તાવાર નિવાસસ્થાન 1, સફદરજંગ રોડ પર રહેતો હતો.

માલવિયાએ જણાવ્યું હતું કે તે સમયે આ સરનામા પર મતદાતાના રુપમાં ઇન્દિરા ગાંધી, રાજીવ ગાંધી, સંજય ગાંધી અને મેનકા ગાંધીના નામ હતા, પરંતુ 1980માં નવી દિલ્હી લોકસભા મતવિસ્તારની મતદારયાદીમાં સુધારો કરવામાં આવ્યો હતો જેમાં 1 જાન્યુઆરી, 1980ને 'ક્વોલિફાઇંગ ડેટ' તરીકે રાખવામાં આવી હતી અને સોનિયા ગાંધીનું નામ મતદાન મથક 145માં સિરિયલ નંબર 388 પર ઉમેરવામાં આવ્યું હતું.