SBIએ ઈલેક્ટોરલ બોન્ડની ડિટેલ્સ પર ડેડલાઈન વધારવાની માંગ કરી, રાહુલ ગાંધીએ કર્યો પ્રહાર

electoral bonds : લોકસભા ચૂંટણી પહેલા જ સુપ્રીમ કોર્ટે ઇલેક્ટોરલ બોન્ડ પર મોટો નિર્ણય આપીને બોન્ડને ગેરકાયદેસર જાહેર કરી દીધા હતા. આ સાથે સુપ્રીમ કોર્ટે સ્ટેટ બેન્ક ઓફ ઇન્ડિયા (એસબીઆઇ)ને ઇલેક્ટોરલ બોન્ડની વિગતો ચૂંટણી પંચ સાથે શેર કરવાનો આદેશ આપ્યો હતો. હવે એસબીઆઈએ સુપ્રીમ કોર્ટ પાસે ડેડલાઈન વધારવાની માંગ કરી છે. એસબીઆઈ વતી કહેવામાં આવ્યું હતું કે ઈલેક્ટોરલ બોન્ડના મામલે માહિતી આપવા માટે તેમને 30 જૂન સુધીનો સમય આપવામાં આવે.

સુપ્રીમ કોર્ટે 15 ફેબ્રુઆરીએ ઈલેક્ટોરલ બોન્ડ સ્કીમને રદ કરી દીધી હતી અને એસબીઆઈને 6 માર્ચ સુધીમાં ચૂંટણી બોન્ડ અંગેની માહિતી ચૂંટણી પંચને સુપરત કરવાનો નિર્દેશ આપ્યો હતો. પરંતુ એસબીઆઈનું કહેવું છે કે તે 6 માર્ચ સુધી આ ડેટા પ્રદાન કરવામાં અસમર્થ છે.

એસબીઆઇ વતી સુપ્રીમ કોર્ટમાં અરજી દાખલ કરવામાં આવી હતી અને તેમને ઇલેક્ટોરલ બોન્ડ અંગેની માહિતી આપવા માટે 30 જૂન સુધીનો સમય આપવામાં આવે તેવી અરજી કરવામાં આવી હતી.

રાહુલ ગાંધીએ કર્યો પ્રહાર

કોંગ્રેસ નેતા રાહુલ ગાંધીએ હવે એસબીઆઈની માંગણીને લઇને ભાજપ અને એસબીઆઈ પર પ્રહાર કર્યો છે. તેમણે એક્સ પરની પોસ્ટમાં લખ્યું છે કે નરેન્દ્ર મોદીએ પોતાની તમામ શક્તિનો ઉપયોગ 'ચંદે કે ધંધે'ને છુપાવવા માટે કર્યો છે. રાહુલે લખ્યું કે જ્યારે સુપ્રીમ કોર્ટે કહ્યું છે કે ચૂંટણી બોન્ડની સત્યતા જાણવી દેશવાસીઓનો અધિકાર છે, તો પછી એસબીઆઈ શા માટે ઈચ્છે છે કે ચૂંટણી પહેલા આ માહિતી સાર્વજનિક ન કરવામાં આવે?

આ પણ વાંચો - લાલુ પ્રસાદ યાદવે ‘મોદીનો પરિવાર’ પૂછીને ભૂલ કરી? વિપક્ષના શબ્દો હંમેશા બન્યા છે મોદીના હથિયાર

રાહુલના એક્સે લખ્યું છે કે એક ક્લિક પર કાઢી શકાય તેવી માહિતી માટે 30 જૂન સુધીનો સમય માગવો એ બતાવે છે કે દાળમાં કઇક કાળું નથી પણ આખી દાળ કાળી છે. દેશની દરેક સ્વતંત્ર સંસ્થા 'મોડાની પરિવાર' બનીને ભ્રષ્ટાચાર પર પડદો પાડવામાં લાગી છે. ચૂંટણી પહેલા મોદીનો 'અસલી ચહેરો' છુપાવવાનો આ 'છેલ્લો પ્રયાસ' છે.

30 જૂન સુધીનો સમય માંગ્યો

12 એપ્રિલ 2019થી 15 ફેબ્રુઆરી 2024ની વચ્ચે, 22,217 ઇલેક્ટોરલ બોન્ડ જારી કરવામાં આવ્યા હતા. આ બોન્ડ અલગ અલગ રાજકીય પક્ષોને દાન માટે જારી કરવામાં આવ્યા છે. હવે સુપ્રીમ કોર્ટે તેમને ગેરકાયદેસર ગણાવ્યા છે અને તેમની સાથે જોડાયેલી તમામ માહિતી માંગી છે.

આ તમામ ઇલેક્ટોરલ બોન્ડ મુંબઇની એસબીઆઇની શાખામાં જમા કરાવવામાં આવ્યા હોવાનું પણ માહિતીમાં બહાર આવ્યું છે. એસબીઆઈના જણાવ્યા અનુસાર બે અલગ અલગ માહિતી સ્લોટ છે. તેને ડીકોડ કરીને તૈયાર કરવો પડશે. આ રીતે 44 હજાર 434 સેટ વિશે માહિતી જરૂરી છે. સુપ્રીમ કોર્ટે આ માટે આપેલી સમયરેખા પૂરતી નથી. આવી સ્થિતિમાં તેમને 30 જૂન સુધીનો સમય આપવામાં આવે તેવી માંગ કરવામાં આવી છે.

ચૂંટણી બોન્ડ રદ કરતી વખતે સુપ્રીમ કોર્ટે કહ્યું હતું કે આ વિગતમાં જણાવવું જોઈએ કે આ બોન્ડ કઈ તારીખે એન્કેશ કરવામાં આવ્યો હતો અને તેમાં કેટલી રકમ હતી. એસબીઆઈએ રાજકીય પક્ષો દ્વારા રોકડ કરેલા દરેક બોન્ડની વિગતો પ્રદાન કરી હતી.