ઈલેક્ટોરલ બોન્ડ : આ 5 મોટી કંપનીઓએ ખરીદ્યા સૌથી વધારે ચૂંટણી બોન્ડ, ત્રણ પર થઈ ચૂકી છે IT રેડ

Written by Diptiman tiwari, Mahendra singh manaral : Electoral bonds, ઈલેક્ટોરલ બોન્ડ : ચૂંટણી પંચે ગુરૂવારે પોતાની વેબસાઈટ પર ઈલેક્ટોરલ બોન્ડનો ડેટા સાર્વજનિક કર્યો છે. સુપ્રીમ કોર્ટે આ માહિતી શેર કરવા માટે પંચને 15 માર્ચની સમયમર્યાદા આપી હતી. સ્ટીલ બેરોન લક્ષ્મી મિત્તલથી લઈને અબજોપતિ સુનીલ ભારતી મિત્તલની એરટેલ, અનિલ અગ્રવાલની વેદાંત, ITC, મહિન્દ્રા એન્ડ મહિન્દ્રાથી લઈને ઓછી જાણીતી ફ્યુચર ગેમિંગ અને હોટેલ સર્વિસિસ હવે રદ થયેલા ચૂંટણી બોન્ડના મુખ્ય ખરીદદારોમાં સામેલ હતા.

2019 અને 2024 વચ્ચે રાજકીય પક્ષોને ટોચના 5 ઈલેક્ટોરલ બોન્ડ દાતાઓમાંથી ત્રણ એવી કંપનીઓ છે જેમણે એન્ફોર્સમેન્ટ ડિરેક્ટોરેટ (ED) અને ઈન્કમ ટેક્સ (IT)ની તપાસનો સામનો કરવાનો ઈન્કાર કર્યા છતાં બોન્ડ ખરીદ્યા છે. તેમાં લોટરી કંપની ફ્યુચર ગેમિંગ, ઈન્ફ્રાસ્ટ્રક્ચર ફર્મ મેઘા એન્જિનિયરિંગ અને માઈનિંગ કંપની વેદાંતનો સમાવેશ થાય છે.

ચૂંટણી પંચ દ્વારા ગુરુવારે જાહેર કરવામાં આવેલા ડેટામાં ઇલેક્ટોરલ બોન્ડના નંબર 1 ખરીદનાર ફ્યુચર ગેમિંગ એન્ડ હોટેલ્સ પ્રાઇવેટ લિમિટેડ છે, જે સેન્ટિસા યાગો માર્ટિન દ્વારા સંચાલિત છે. લોટરી કંપનીએ 2019 અને 2024 વચ્ચે રૂ. 1,300 કરોડના બોન્ડ ખરીદ્યા છે. માર્ચ 2022માં એન્ફોર્સમેન્ટ ડિરેક્ટોરેટ દ્વારા ફ્યુચર ગેમિંગની તપાસ કરવામાં આવી હતી. તેણે બે અલગ-અલગ કંપનીઓ હેઠળ રૂ. 1350 કરોડથી વધુના ઈલેક્ટોરલ બોન્ડ ખરીદ્યા હતા.

આ પણ વાંચોઃ- ઈલેક્ટોરલ બોન્ડ : ભાજપ, કોંગ્રેસ, TMC અને AAP જેવા પક્ષોએ ચૂંટણી બોન્ડમાંથી કેટલી કરી કમાણી, વાંચો Inside Scoop

ફ્યુચર ગેમિંગ સામે મની લોન્ડરિંગ તપાસ

EDએ 2019ની શરૂઆતમાં ફ્યુચર ગેમિંગ સામે મની લોન્ડરિંગની તપાસ શરૂ કરી હતી. તે વર્ષે જુલાઈ સુધીમાં, તેણે કંપનીની રૂ. 250 કરોડથી વધુની સંપત્તિ જપ્ત કરી લીધી હતી. 2 એપ્રિલ, 2022ના રોજ, EDએ આ કેસમાં રૂ. 409.92 કરોડની જંગમ સંપત્તિ જપ્ત કરી હતી. આ પ્રોપર્ટીઝની એટેચમેન્ટના પાંચ દિવસ પછી, 7 એપ્રિલે, ફ્યુચર ગેમિંગે ઈલેક્ટોરલ બોન્ડમાં રૂ. 100 કરોડની ખરીદી કરી હતી.

આ પણ વાંચોઃ- ચૂંટણી પંચે ઈલેક્ટોરલ બોન્ડના તમામ ડેટા જાહેર કર્યા, જાણો કઇ પાર્ટીને કેટલા રૂપિયા મળ્યા અને કોણે આપ્યું ડોનેશન

"માર્ટિન અને તેના સહયોગીઓએ એપ્રિલ 1, 2009 થી 31 ઓગસ્ટ, 2010 ના સમયગાળા માટે ઇનામ-વિજેતા ટિકિટોના દાવાઓને વધારીને 910.3 કરોડ રૂપિયાનો ગેરકાયદેસર નફો કર્યો," EDએ 22 જુલાઈ, 2019 ના રોજ એક નિવેદનમાં જણાવ્યું હતું.

સુપ્રીમ કોર્ટના નિર્દેશ બાદ સ્ટેટ બેંક ઓફ ઈન્ડિયા (SBI) એ 12 માર્ચે કમિશન સાથે ડેટા શેર કર્યો હતો. SBI ચૂંટણી બોન્ડની અધિકૃત વિક્રેતા હતી. સુપ્રીમ કોર્ટે ચૂંટણી પંચને તેની વેબસાઇટ પર ડેટા અપલોડ કરવા માટે 15 માર્ચે સાંજે 5 વાગ્યા સુધીનો સમય આપ્યો હતો.