એલોન મસ્ક, દુનિયાના સૌથી અમીર અને કંઇક નવું કરવામાં માને છે. સ્પેસએક્સ કંપની દ્વારા અવકાશમાં પણ અનોખી સિદ્ધિ પ્રાપ્ત કર્યા બાદ તે શેર બજારમાં પણ મોટી સફળતા માટે આગળ વધી રહ્યા છે. એવું કહેવાય છે કે તે 2026 માં સ્પેસએક્સ આઇપીઓ લાવી રહ્યા છે. જે દુનિયાનો સૌથી મોટો આઇપીઓ હોવાનું સુત્રો જણાવી રહ્યા છે.
બ્લૂમબર્ગ ન્યૂઝ અનુસાર, એલોન મસ્કનું સ્પેસએક્સ પ્રારંભિક જાહેર ઓફરની યોજનાઓ સાથે આગળ વધી રહ્યું છે અને કંપનીનો આઇપીઓ લાવી રહ્યું છે. જે 30 બિલિયન ડોલરથી વધુ ફંડ એકત્ર કરવાનો અને લગભગ 1.5 ટ્રિલિયન ડોલરના મૂલ્યાંકનનું લક્ષ્ય રાખશે.
આ અહેવાલમાં વધુ જણાવાયું છે કે સ્પેસએક્સના મેનેજમેન્ટ અને સલાહકારો 2026 ના મધ્યથી અંત સુધીમાં આખી કંપની માટે લિસ્ટિંગ શરૂ કરવા માટે પ્રયાસ કરી રહ્યા છે. બજારની સ્થિતિ અને અન્ય પરિબળોના આધારે IPO નો સમય બદલાઈ શકે છે, અને એક વ્યક્તિએ કહ્યું કે તે 2027 સુધી પણ જઇ શકે છે.
ટેકનોક્રેટ એલોન મસ્કે 2020 માં કહ્યું હતું કે સ્પેસએક્સ ભવિષ્યમાં સ્ટારલિંકને ઘણા વર્ષો સુધી સૂચિબદ્ધ કરવાની યોજના ધરાવે છે કે કંપનીની આવક વૃદ્ધિ મજબૂત અને સરળ ન થઇ જાય.
આ પણ વાંચો | એલોન મસ્કની સ્ટારલિંકને ભારતમાં મળ્યું લાઇસન્સ, ટૂંક સમયમાં શરૂ થશે સેટેલાઇટ આધારિત ઇન્ટરનેટ સેવા?
રિપોર્ટ અનુસાર, સ્પેસએક્સ સૌથી મોટા આઇપીઓ દ્વારા એકત્ર કરાનાર ભંડોળનો ઉપયોગ અવકાશ-આધારિત ડેટા સેન્ટરો વિકસાવવા માટે કરવા માંગે છે, જેમાં તેમને ચલાવવા માટે જરૂરી ચિપ્સ ખરીદવાનો પણ સમાવેશ થાય છે, આ વિચારમાં મસ્કે બેરોન કેપિટલ સાથેના તાજેતરના કાર્યક્રમ દરમિયાન રસ પણ દર્શાવ્યો હતો.
સ્પેસએક્સ આવક 24 બિલિયન ડોલર!
બ્લૂમબર્ગના અહેવાલ મુજબ, કંપની 2025 માં લગભગ 15 બિલિયન ડોલરની આવક કરશે તેવી અપેક્ષા છે, જે 2026 માં વધીને 22 બિલિયન ડોલરથી 24 બિલિયન ડોલરની વચ્ચે થશે, જેમાં મોટાભાગનો હિસ્સો સ્ટારલિંક તરફથી આવશે.
શું એલોન મસ્ક OpenAI ને ટક્કર આપશે?
મીડિયા અહેવાલોમાં જણાવાયું હતું કે રોકેટ નિર્માતા કંપની સેકન્ડરી શેર વેચાણ શરૂ કરી રહી છે જેનું મૂલ્ય 800 બિલિયન ડોલર થશે, જે તેને સૌથી મૂલ્યવાન ખાનગી કંપનીના બિરુદ માટે OpenAI સામે ટક્કર આપશે. જોકે, મસ્કે શનિવારે આ અહેવાલોને ખોટા ગણાવીને ફગાવી દીધા હતા
