INDIA Alliance Fight : પશ્ચિમ બંગાળના મુખ્યમંત્રી મમતા બેનર્જી અને તેમની પાર્ટી સંસદથી લઈને સડક સુધી કોંગ્રેસથી અલગ વલણ અપનાવતી જોવા મળી રહી છે. હવે જ્યારે તેમણે ‘ઇન્ડિયા ગઠબંધન’ની જવાબદારી સંભાળવાની વાત કરી તો એક નવો વિવાદ ઊભો થયો. મમતા બેનર્જીના નિવેદન પર શિવસેનાથી લઈને આરજેડી અને સમાજવાદી પાર્ટી સુધી નિવેદનો સામે આવ્યા છે, જેના કારણે સવાલો ઉઠવા લાગ્યા છે, શું હવે ઇન્ડિયા ગઠબંધન તૂટશે?
મમતા બેનર્જીના નિવેદન પર કોંગ્રેસ સાંસદ ઈમરાન મસૂદે કહ્યુ કે મમતા બેનર્જી મોટા નેતા છે પરંતુ રાહુલ ગાંધી સિવાય કોઈ દેશમાં નેતૃત્વ કરી શકે તેવી સ્થિતિમાં નથી. આ સાથે જ સમાજવાદી પાર્ટીએ મમતા બેનર્જીના નિવેદન પર સહમતિ વ્યક્ત કરી છે, જેના કારણે કોંગ્રેસનું ટેન્શન વધી ગયું છે.
મમતા બેનર્જીએ શું કહ્યું?
પશ્ચિમ બંગાળના મુખ્યમંત્રી મમતા બેનર્જીએ શુક્રવારે તાજેતરની ચૂંટણીઓ અને પેટાચૂંટણીઓમાં ઇન્ડિયા બ્લોકના પ્રદર્શન પર નિરાશા વ્યક્ત કરી હતી અને કહ્યું હતું કે તેઓ હવે તેનું નેતૃત્વ સંભાળવા માટે તૈયાર છે.
એક તરફ ઇન્ડિયા ગઠબંધનના કેટલાક નેતાઓએ મમતાના નિવેદનની ટીકા કરી છે, તો કેટલાકે તેનું સમર્થન કર્યું છે. કોંગ્રેસ સાંસદ વર્ષા ગાયકવાડે કહ્યું છે કે મમતા બેનર્જીને આવું લાગે છે પરંતુ અમને એટલે કે કોંગ્રેસને એવું નથી લાગતું. તેમના કહેવાથી તેમની પાર્ટી ચાલે છે, અમે તો કોંગ્રેસના કહેવા ચાલી એ છીએ.
ડાબેરીઓએ પણ મમતાને ટેકો આપ્યો
રસપ્રદ વાત એ છે કે કોંગ્રેસ ઉપર ટીએમસીના વિરોધી ડાબેરી પક્ષોએ પણ પ્રહારો કર્યા છે. ડાબેરી નેતા ડી રાજાએ કહ્યું કે કોંગ્રેસે આત્મનિરીક્ષણ કરવું પડશે. તેમણે કહ્યું કે ઇન્ડિયા ગઠબંધનની બેઠક થવી જોઈએ. તેમણે કહ્યું કે હરિયાણા અને મહારાષ્ટ્રની ચૂંટણીમાં ગઠબંધન સહયોગીનો સાથ ન લીધો જેના કારણે પાર્ટીને નુકસાન થયું.
આ પણ વાંચો – નરસિમ્હા રાવથી લઇને મનમોહન સરકાર સુધી, સંસદમાં ક્યારે-ક્યારે સામે આવ્યું કેશ કાંડ?
શિવસેના (યુબીટી)ના નેતા અને રાજ્યસભાના સાંસદ સંજય રાઉતે કહ્યું છે કે તેઓ મમતા દીદીનો અભિપ્રાય જાણે છે અને તેઓ અમારી સાથે છે. રાઉતે કહ્યું કે જો કોઈ નાના-મોટા મતભેદો છે તો અમે તેના માટે મમતા બેનર્જી સાથે વાત કરીશું.
સમાજવાદી પાર્ટીએ મમતાનું સમર્થન કર્યું
સમાજવાદી પાર્ટીના નેતા અને પ્રવક્તા ઉદયવીર સિંહે કહ્યું છે કે જો મમતા બેનર્જીએ કોઇ ઇચ્છા વ્યક્ત કરી હોય તો ઇન્ડિયા બ્લોકના નેતાઓએ તેના પર વિચાર કરીને તેમનો સહયોગ લેવો જોઇએ. આનાથી ઇન્ડિયા ગઠબંધન મજબૂત થશે. મમતાએ બંગાળમાં ભાજપને રોકવાનું કામ કર્યું હતું. સપા નેતાએ કહ્યું કે જ્યાં પણ વિપક્ષની સરકાર ન બની શકી ત્યાં કોંગ્રેસ પાર્ટી મુખ્યત્વે સૌથી મોટી પાર્ટી છે.
સપા નેતાએ કહ્યું છે કે જો અપેક્ષિત સફળતા નથી મળી શકી, જે પ્રકારના ટ્રેન્ડ રિઝલ્ટની અપેક્ષા હતી તો આ જવાબદારી પણ તેમના પર છે.
કોંગ્રેસને આરજેડીનું સમર્થન મળ્યું
આ સાથે જ મમતા બેનર્જીના નિવેદન પર આરજેડીના પ્રવક્તા મૃત્યુંજય તિવારીનું પણ નિવેદન સામે આવ્યું છે. તેમણે કહ્યું કે ભાજપ વિરુદ્ધ વિપક્ષી ગઠબંધનના અસલી આર્કિટેક્ટ લાલુ પ્રસાદ યાદવ છે. તેમની પહેલ પર જ પટનામાં ઇન્ડિયા ગઠબંધનની પહેલી બેઠક મળી હતી. મમતા બેનર્જી પણ આ બેઠકમાં સામેલ થયા હતા.
આરજેડી નેતાએ કહ્યું કે બધા પોતપોતાના રાજ્યોમાં ભાજપ વિરુદ્ધની લડાઈમાં લાગેલા છે. હાલ ઝારખંડમાં અમને સફળતા મળી છે. પશ્ચિમ બંગાળમાં મમતા બેનર્જી ભાજપ સામે જોરદાર રીતે લડે છે. હવે 2025માં બિહારનો વારો છે. ભાજપ સામે અમારું ગઠબંધન સંપૂર્ણપણે એકજૂટ છે.
ઈન્ડિયા એલાયન્સના કન્વીનરની વાત કરીએ તો આ ખુરશી હાલ કોંગ્રેસ અધ્યક્ષ મલ્લિકાર્જુન ખડગે પાસે છે, પરંતુ હરિયાણા અને મહારાષ્ટ્રમાં કોંગ્રેસ પાર્ટી ખરાબ રીતે હારી ગઈ છે. આવી સ્થિતિમાં મમતા બેનર્જી સહિત ઘણા વિપક્ષી રાજનેતાઓ કોંગ્રેસ પર નારાજ છે. હવે આગળ જતા ભારત ગઠબંધનનું ભવિષ્ય શું છે તે જોવું રહ્યું.
