Gujarati News 13 February 2025 : મહારાષ્ટ્ર કોંગ્રેસના નવા પ્રમુખ તરીકે હર્ષવર્ધન વસંતરાવ સપકાલની નિમણૂક

પીએમ મોદી અને અમેરિકાના એનએસએ માઇક વોલ્ટ્ઝ વચ્ચે મુલાકાત થઇ છે. પીએમ નરેન્દ્ર મોદીએ ટ્વીટ કર્યું કે એનએસએ માઇક વોલ્ટ્ઝ સાથે એક સાર્થક મુલાકાત થઈ. તેઓ હંમેશા ભારતના સારા મિત્ર રહ્યા છે. સંરક્ષણ, ટેકનોલોજી અને સુરક્ષા ભારત-અમેરિકા સંબંધોના મહત્વપૂર્ણ પાસાં છે અને અમે આ મુદ્દાઓ પર ઉત્તમ ચર્ચા કરી. એઆઈ, સેમિકન્ડક્ટર, અવકાશ અને અન્ય ક્ષેત્રોમાં સહયોગની પ્રચંડ સંભાવનાઓ છે.

કોંગ્રેસે મહારાષ્ટ્રમાં પ્રદેશ અધ્યક્ષ બદલ્યા છે. મહારાષ્ટ્રમાં રાહુલ ગાંધીના નજીકના વિશ્વાસુ હર્ષવર્ધન વસંતરાવ સપકાલની પ્રદેશ કોંગ્રેસના નવા પ્રમુખ તરીકે નિમણૂક કરવામાં આવી છે. વિધાનસભાની ચૂંટણીમાં મળેલી હાર બાદ અને આગામી સ્થાનિક સ્વરાજની ચૂંટણીઓની પૃષ્ઠભૂમિમાં કોંગ્રેસે નવા ચહેરાને તક આપી છે. એઆઈસીસીએ એક નોટિફિકેશનમાં જણાવ્યું હતું કે કોંગ્રેસ અધ્યક્ષે હર્ષવર્ધન સપકાલને તાત્કાલિક અસરથી મહારાષ્ટ્ર પ્રદેશ કોંગ્રેસ સમિતિના પ્રમુખ તરીકે નિયુક્ત કર્યા છે.

એન બિરેન સિંહે રાજ્યના મુખ્યમંત્રી પદેથી રાજીનામું આપ્યાના ચાર દિવસ બાદ કેન્દ્રની મોદી સરકારે 13 ફેબ્રુઆરીએ મણિપુરમાં રાષ્ટ્રપતિ શાસન લાગુ કરી દીધું હતું. મણિપુરમાં મે 2023 થી મૈતેઇ અને કુકી સમુદાયો વચ્ચે જાતીય સંઘર્ષ જોવા મળી રહ્યો છે. આમાં 200થી વધુ લોકોએ પોતાનો જીવ ગુમાવ્યો હતો. આ સાથે જ અનેક લોકોને ઘર છોડવાની ફરજ પડી હતી.

બનાસકાંઠા જિલ્લામાં ભૂકંપનો આંચકો અનુભવાયો છે. રિક્ટર સ્કેલ પર 3.8ની તીવ્રતા નોંધાઇ છે. આ ભૂકંપનું કેન્દ્રબિંદુ પાલનપુર શહેરથી 34 કિલોમીટર ઉત્તર દિશામાં નોંધાયું છે. જોકે રાહતની વાત એ છે કે આ ભૂકંપમાં કોઈ જાનહાનિ કે માલ-મિલકતને નુકસાન થયાનો કોઈ અહેવાલ નોંધાયા નથી.

ભાજપના નેતા વિજેન્દ્ર ગુપ્તાએ દિલ્હીના લેફ્ટનન્ટ ગવર્નર વીકે સક્સેનાને પત્ર લખીને દિલ્હીમાં આયુષ્માન ભારત અને આરોગ્ય માહિતી વ્યવસ્થાપન પ્રણાલી લાગુ કરવાનો આગ્રહ કર્યો.

વકફ એમેન્ડમેન્ટ બિલ પર જેપીસી રિપોર્ટને લઈને ગુરુવારે સંસદની કાર્યવાહી શરૂ થતાં જ વિપક્ષોએ હંગામો શરૂ કર્યો હતો. લોકસભાની કાર્યવાહી બપોરે 2 વાગ્યા સુધી સ્થગિત કરવામાં આવી હતી, પરંતુ રાજ્યસભાની કાર્યવાહી થોડીવાર સ્થગિત કર્યા બાદ ચાલુ રહી છે. જ્યારે ઉપલા ગૃહમાં જેપીસી રિપોર્ટ રજૂ કરવામાં આવ્યો ત્યારે અસંમતિ નોંધને તેનો ભાગ ન બનાવવામાં આવતા વિપક્ષે હોબાળો મચાવ્યો હતો. વિપક્ષના નેતા મલ્લિકાર્જુન ખડગેએ સ્પષ્ટ શબ્દોમાં કહ્યું કે તેઓ આ નકલી અહેવાલને સ્વીકારશે નહીં. તેમણે અધ્યક્ષ જગદીપ ધનખરને આ અહેવાલને નકારવા વિનંતી કરી અને અસંમતિ નોંધ સાથે અહેવાલ ફરીથી રજૂ કરવાની માંગ કરી.

શેરબજારમાં સેન્સેક્સ નિફ્ટી ગુરુવારે પોઝિટિવ ખુલ્યા બાદ વધ્યા હતા. સેન્સેક્સ પાછલા બંધ 76171 સામે આજે 76201 ખુલ્યો હતો. બેંક અને ફાઈનાન્સ શેરમાં તેજીથી સેન્સેક્સ 450 પોઇન્ટ કરતા વધુ ઉછળ્યો અને 76600 લેવલ ઉપર ટ્રેડ કરી રહ્યો છે. એનએસઇ નિફ્ટી પાછલા બંધ 23045 સામે આજે 23055 ખુલ્યો હતો. નિફ્ટી 190 પોઇન્ટની મજબૂતીમાં 23200 લેવલ આસપાસ ટ્રેડ કરી રહ્યો છે. બીએસઇ પર બજાજ ફિનસર્વ, ટાટા સ્ટીલ, બજાજ ફાઈનાન્સ, ઝોમેટો અને કોટક બેંકના શેર 2 થી 3.5 ટકાની તેજીમાં ટોપ 5 ગેઇનર હતા.

વડાપ્રધાન નરેન્દ્ર મોદી આજથી બે દિવસીય અમેરિકાના પ્રવાસે છે. અમેરિકન સમય અનુસાર તેઓ બુધવારે સાંજે વોશિંગ્ટન પહોંચ્યા હતા. આ દરમિયાન તેઓ યુએસ નેશનલ ઈન્ટેલિજન્સ ડાયરેક્ટર તુલસી ગબાર્ડ (PM મોદી મીટ તુલસી ગબાર્ડ)ને મળ્યા. બંને નેતાઓ વચ્ચે ભારત અને અમેરિકાના સંબંધોને લગતા વિવિધ પાસાઓ પર ચર્ચા થઈ હતી. બંને વચ્ચેની મંત્રણામાં આતંકવાદ અને ઉભરતા જોખમોનો સામનો કરવા માટે ગુપ્તચર સહયોગ વધારવા પર પણ ધ્યાન કેન્દ્રિત કરવામાં આવ્યું હતું.

પીએમ મોદીએ હિંદુ-અમેરિકન તુલસી ગબાર્ડને અમેરિકાના ટોચના ગુપ્તચર અધિકારી તરીકેની નિમણૂક બદલ અભિનંદન પણ પાઠવ્યા હતા. હકીકતમાં, બુધવારે સેનેટ દ્વારા પુષ્ટિ થયાના થોડા કલાકો પછી, તુલસી ગબાર્ડને ઓવલ ઓફિસમાં નેશનલ ઇન્ટેલિજન્સ ડિરેક્ટર તરીકે શપથ લીધા હતા. પીએમ મોદીએ X પર પોસ્ટમાં લખ્યું, “વૉશિંગ્ટન ડીસીમાં યુએસ નેશનલ ઇન્ટેલિજન્સ ડાયરેક્ટર તુલસી ગબાર્ડને મળ્યા અને તેમને અભિનંદન આપ્યા. અમે ભારત-યુએસ મિત્રતાના વિવિધ પાસાઓ પર ચર્ચા કરી, જેમાંથી તે હંમેશા મજબૂત સમર્થક રહી છે.”

ગુજરાતમાં શિયાળો ધીમે ધીમે વિદાય તરફ જઈ રહ્યો છે ત્યારે ઠંડીમાં ધીમે ધીમે ઘટાડો નોંધાઈ રહ્યો છે. હવામાન વિભાગે આપેલા તાપમાનના આંકડા પ્રમાણે બુધવારે ગુજરાતમાં 14.4 ડિગ્રીથી લઈને 21.2 ડિગ્રી વચ્ચે લઘુતમ તાપમાન નોંધાયું હતું. નલિયામાં બે દિવસમાં 5 ડિગ્રી જેટલું લઘુત્તમ તાપમાન વધીને 14.4 ડિગ્રીએ પહોંચ્યું હતું. જ્યારે ઓખામાં 21.2 ડિગ્રી લઘુતમ તાપમાન રહ્યું હતું. ડીસામાં પણ ઠંડી ઘટતાં 14.8 ડિગ્રી લઘુતમ તાપમાન રહ્યું હતું.

પીએમ મોદીએ ઈન્સ્ટાગ્રામ પર એક પોસ્ટમાં કહ્યું કે તેઓ થોડા સમય પહેલા વોશિંગ્ટન ડીસી પહોંચ્યા હતા. રાષ્ટ્રપતિ ડોનાલ્ડ ટ્રમ્પને મળવા અને ભારત-યુએસ વ્યાપક વૈશ્વિક વ્યૂહાત્મક ભાગીદારીને આગળ વધારવા માટે આતુર છીએ. આપણા દેશો આપણા લોકોના લાભ અને આપણા ગ્રહના સારા ભવિષ્ય માટે સાથે મળીને કામ કરવાનું ચાલુ રાખશે. ઠંડા વાતાવરણ છતાં, ભારતીય ડાયસ્પોરા વડા પ્રધાનને આવકારવા બ્લેર હાઉસની બહાર એકઠા થયા હતા, જેમણે તેમનું ઉષ્માભર્યું સ્વાગત કર્યું હતું.

વડા પ્રધાન નરેન્દ્ર મોદી યુએસ પ્રમુખ ડોનાલ્ડ ટ્રમ્પના આમંત્રણ પર બુધવારે (સ્થાનિક સમય) બે દિવસની મુલાકાતે અમેરિકા પહોંચ્યા. પીએમ મોદીએ ઈન્સ્ટાગ્રામ પર એક પોસ્ટમાં કહ્યું કે તેઓ થોડા સમય પહેલા વોશિંગ્ટન ડીસી પહોંચ્યા હતા.