Gujarati News 17 January 2025 : દિલ્હી ચૂંટણી : ભાજપનો સંકલ્પ પત્ર, મહિલાને દર મહિને 2,500 રૂપિયા આપવામાં આવશે, વાંચો આજના તાજા સમાચાર

ટીવી ઇન્ડસ્ટ્રીમાંથી દુઃખદ સમાચાર આવી રહ્યા છે. ‘ધરતીપુત્ર નંદિની’ ફેમ અમન જયસ્વાલનું અકસ્માતમાં મોત થયું છે. તે માત્ર 22 વર્ષનો હતો. અમન ઓડિશન માટે જઈ રહ્યો હતો. જોગેશ્વરી હાઇવે પર તેની બાઇકને ટ્રકે ટક્કર મારી હતી, જેના કારણે તેનું મોત નીપજ્યું હતું. અમન જયસ્વાલ ઉત્તર પ્રદેશના બલિયાનો રહેવાસી હતો. ‘ધરતીપુત્ર નંદિની’માં અમન મુખ્ય ભૂમિકા ભજવતો જોવા મળ્યો હતો.

શુક્રવારે ભારતીય વિદેશ મંત્રાલયે કેનેડા સાથેના સંબંધો પર પ્રતિક્રિયા આપી હતી. વિદેશ મંત્રાલયના સાપ્તાહિક પ્રેસ બ્રીફિંગમાં પ્રવક્તા રણધીર જયસ્વાલે કહ્યું કે કેનેડાની અંદર કેટલીક રાજકીય ગતિવિધિઓ ચાલી રહી છે, અમે તેના પર સતત નજર રાખી રહ્યા છીએ. ભારત અને કેનેડા વચ્ચે ખૂબ જ ગાઢ સંબંધ છે અને અમને આશા છે કે આ ભાગીદારી ફરીથી મજબૂત થશે.

ભાજપના રાષ્ટ્રીય અધ્યક્ષ અને કેન્દ્રીય મંત્રી જેપી નડ્ડાએ કહ્યું કે અમે ભાજપના સંકલ્પમાં એ વાત જોડીએ છીએ કે દિલ્હીમાં મહિલા સમૃદ્ધિ યોજના હેઠળ દરેક મહિલાને દર મહિને 2,500 રૂપિયા આપવામાં આવશે. આ યોજનાને પ્રથમ કેબિનેટમાં જ પાસ કરવામાં આવશે. ગરીબ બહેનોને પ્રતિ સિલિન્ડર 500 રૂપિયાની સબસિડી મળશે અને હોળી-દિવાળી પર એક-એક સિલિન્ડર મફત આપવામાં આવશે. માતૃ સુરક્ષા વંદનાને વધુ શક્તિ આપવા માટે 6 પોષણ કીટ આપવામાં આવશે અને દરેક ગર્ભવતી મહિલાને 21,000 રૂપિયા આપવામાં આવશે.

સૈફ અલી ખાન પર 16 જાન્યુઆરીએ ચાકુ વડે હુમલો કરવામાં આવ્યો હતો. જેમાં તેને ઘણી ગંભીર ઈજાઓ થઈ હતી. રાત્રે લગભગ 2:30 વાગ્યે, આરોપી તેના ઘરે મળી આવ્યો અને જ્યારે સૈફે તેના પરિવારને તેનાથી બચાવવાનો પ્રયાસ કર્યો, ત્યારે તેણે સૈફ પર છરી વડે અનેક વાર કર્યા. સૈફ અલી ખાનના શરીર પર 6 ઊંડા ઘા હતા. તેની ગરદન પર એક ઘા હતો જે 10 સેમી લાંબો હતો. આ સાથે તેની પીઠ પર કેટલાક ઊંડા ઘા હતા, જેના માટે સર્જરી કરવામાં આવી હતી અને તેની પીઠમાંથી લગભગ 2.5 ઈંચ લાંબો છરીનો ટુકડો મળી આવ્યો હતો. પોલીસે તે ટુકડો કબજે લીધો છે અને બાકીના ભાગની શોધ ચાલુ છે. આજકારના અહેવાલ મુજબ પોલીસે એક શકમંદની અટકાયત કરી છે.

શેરબજાર સેન્સેક્સ નિફ્ટીમાં સપ્તાહના છેલ્લા ટ્રેડિંગ દિવસે મોટો કડાકો બોલાયો છે. સેન્સેક્સ પાછલા બંધ 77042 સામે આજે 77069 ફ્લેટ ખુલ્યો હતો. જો કે બેંક અને આઈટી શેરમાં ભારે વેચવાલીથી સેન્સેક્સ 500 પોઇન્ટથી વધુ તૂટ્યો અને 76511 લેવલ સુધી ઘટ્યો હતો. એનએસઇ નિફ્ટી ઇન્ડેક્સ પાછલા બંધ 23311 સામે આજે 23277 ખુલ્યો હતો. વેચવાલીના દબાણમાં નિફ્ટી 100 પોઇન્ટથી વધુ તૂટ્યો હતો. સેન્સેક્સના બ્લુચીપ સ્ટોકમાં ઈન્ફોસિસ સૌથી વધુ 5.5 ટકા તૂટ્યો હતો. તો એક્સિસ બેંક સવા 5 ટકા, ટીસીએસ 1.6 ટકા, આઈસીઆઈસીઆઈ બેંક 1.5 ટકા, કોટક બેંક, એચસીએલ ટેક, એચડીએફસી બેંક, ઈન્ડ્સઇન્ડ બેંક શેર 1 ટકાથી વધુ તૂટ્યા હતા. બેંક નિફ્ટી ઈન્ડેક્સ 600 પોઇન્ટ અને નિફ્ટી આઈટી ઈન્ડેક્સ 1100 પોઇન્ટના ઘટાડે ટ્રેડ કરી રહ્યા છે.

ગુજરાતમાં ક્યારેક ઠંડી વધે છે તો ક્યારેક ઠંડી ઘટે છે. ગુરુવારના દિવસે રાજ્યમાં 8.2 ડિગ્રીથી લઈને 19.3 ડિગ્રી વચ્ચે લઘુતમ તાપમાન નોંધાયું હતું. જેમાં અમરેલીએ નલિયાને પણ પાછળ પાડી દીધું હતું. અમરેલીમાં 8.2 ડિગ્રી લઘુતમ તાપમાન સાથે રાજ્યનું સૌથી ઠંડુ શહેર રહ્યું હતું. જ્યારે ઓખામાં 19.3 ડિગ્રી લઘુતમ તાપમાન નોંધાયું હતું. નલિયા, કંડલા એરપોર્ટ અને કેશોદમાં 9.6 ડિગ્રી લઘુતમ તાપમાન નોંદાયું હતું. રાજકોટમાં પણ 9.4 ડિગ્રી લઘુતમ તાપમાન નોંધાયું હતું.

કોંગ્રેસના સાંસદ અને લોકસભામાં વિપક્ષના નેતા રાહુલ ગાંધી ગુરુવારે મોડી રાત્રે એઈમ્સ પહોંચ્યા હતા. આ દરમિયાન, તેઓ હોસ્પિટલની આસપાસના રસ્તાઓ, ફૂટપાથ અને સબવે પર રહેતા દર્દીઓ અને તેમના પરિવારોને મળ્યા. અરાજકતા જોઈને રાહુલ ગાંધી ગુસ્સે થઈ ગયા અને તેમણે કેન્દ્ર અને દિલ્હી સરકાર પર નિશાન સાધ્યું.