Gujarati News 18 August 2024 Highlights : કોલકાતા રેપ-મર્ડર કેસ મામલે સુપ્રીમ કોર્ટે લીધી સુઓ મોટો સંજ્ઞાન, CJI ચંદ્રચુડની બેન્ચ કરશે સુનાવણી

તિરુવનંતપુરમ, કેરળ: કોલકાતાની આરજી કર મેડિકલ કોલેજ અને હોસ્પિટલમાં બળાત્કાર અને હત્યાની ઘટના સામે લોકોએ મીણબત્તીઓ પ્રગટાવીને ઘટનાનો વિરોધ કર્યો હતો અને ન્યાયની માંગ કરી હતી.

કેન્દ્રીય મંત્રી ચિરાગ પાસવાને કહ્યું કે જો તમે મુખ્યમંત્રી તરીકે રસ્તા પર ઉતરો છો, તો શું તમે લોકોને ન્યાયની ખાતરી આપી રહ્યા છો કે પછી તમે તેમની વચ્ચે ડરનું વાતાવરણ ઉભું કરો છો. આ ક્યાંકને ક્યાંક મુખ્યમંત્રી તરીકે મમતા બેનર્જીની નબળાઈ દર્શાવે છે. જો કોઈ રાજ્યના મુખ્યમંત્રી પોતાની સરકાર, પોતાના વહીવટ સામે રસ્તા પર ઉતરે છે, તો તે તમારી નબળાઈ દર્શાવે છે.આનાથી ખબર પડે છે કે કદાચ તમારા રાજ્યની મશીનરી તમારા નિયંત્રણમાં નથી તેથી જ બંગાળ જેવા રાજ્યમાં અરાજકતાનું વાતાવરણ છે.

ઝારખંડના પૂર્વ મુખ્યમંત્રી અને ઝારખંડ મુક્તિ મોરચાના નેતા ચંપઈ સોરેને ભાજપમાં જોડાવાની અટકળો વચ્ચે મૌન તોડ્યું છે. રવિવારે તેમણે કહ્યું કે તેમની પાસે આગળ વધવા માટે ત્રણ વિકલ્પ છે. જો કે ભારતીય જનતા પાર્ટીમાં જવા અંગે હજુ સુધી તેમણે કંઇ સ્પષ્ટ રીતે કહ્યું નથી. ચંપઈ સોરેને જણાવ્યું હતું કે છેલ્લા ચાર દાયકાની મારી નિષ્કલંક રાજકીય સફરમાં હું પહેલી વાર અંદરથી તૂટી ગયો છું. આટલું અપમાન કર્યા પછી મારે અન્ય માર્ગો શોધવા મજબૂર થવું પડ્યું છે.

દેશભરમાં થઈ રહેલા વિરોધ વચ્ચે સુપ્રીમ કોર્ટે કોલકાતાની આરજી કર હોસ્પિટલમાં હાલમાં જ એક ડોક્ટર પર થયેલા રેપ અને મર્ડર કેસ પર સુઓ મોટો સંજ્ઞાન લીધી છે. ચીફ જસ્ટિસ ડીવાય ચંદ્રચૂડ, જસ્ટિસ જેબી પારડીવાલા અને જસ્ટિસ મનોજ મિશ્રાની બનેલી ત્રણ જજોની બેન્ચ મંગળવારે 20 ઓગસ્ટે આ કેસની સુનાવણી કરશે. 9 ઓગસ્ટના રોજ કોલકાતાની આરજી કાર મેડિકલ કોલેજમાં એક ટ્રેની ડોક્ટર પર બળાત્કાર ગુજારીને તેની હત્યા કરવામાં આવી હતી. જેના પગલે રાજ્ય ડોક્ટરોએ આ ઘટના સામે વિરોધ પ્રદર્શનનું નેતૃત્વ કર્યું હતું અને આરોપીઓને કડક સજા કરવાની માંગ સાથે રાષ્ટ્રવ્યાપી હડતાલ પાડી હતી. એટલું જ નહીં આ તમામે પોતાની સુરક્ષાની માંગણી કરી છે.

કેન્દ્રીય મંત્રી ગિરિરાજ સિંહે કહ્યું કે આ ખૂબ જ વિચિત્ર બાબત છે અને મને આશ્ચર્ય થાય છે. મુખ્યમંત્રી (મમતા બેનર્જી) આરોગ્ય મંત્રી છે, કાયદો અને વ્યવસ્થા તેમના હાથમાં છે અને તેઓ સત્તામાં છે. જો તે જો તે સંભાળી ન શકે તો તેમણે રાજીનામું આપી દેવું જોઈએ. જો તેમને સત્તા પરથી દૂર કરવામાં નહીં આવે તો બંગાળ બીજું બાંગ્લાદેશ બની જશે.

કલકત્તામાં મહિલા ડોક્ટર દુષ્કર્મ અને હત્યા કેસની તપાસ કરનાર સીબીઆઈ ટીમ આરજી કર મેડિકલ કોલેજ અને હોસ્પિટલ પહોંચી છે.

જયપુરમાં એક હોસ્પિટલને બોમ્બથી ઉડાવી દેવાની ધમકી ભર્યો મેલ મળ્યો છે. બોમ્બથી ઉડાવી દેવાની ધમકીભર્યો મેલ મળતા અફરાતફરી મચી ગઇ છે. ન્યૂઝ એજન્સી પીટીઆઈના રિપોર્ટ મુજબ હોસ્પિટલોને સવારે 7 વાગે ઇ મેલ મળ્યો હતો,

જેમાં હોસ્પિટલને બોમ્બથી ઉડાવી દેવાની ધમકી આપવામાં આવી હતી. જે હોસ્પિટલને ધમકી મળી છે જેમાં બિરલા હોસ્પિટલ અને મોનિલેક હોસ્પિટલ સામેલ છે. ધમકીભર્યા મેલની જાણકારી મળતા જ પોલીસ અને બોમ્બ ડિસ્પોઝલ સ્ક્વોડ હોસ્પિટલ પહોંચી ગઇ છે.

એર ઈન્ડિયાના એક કેબિન ક્રૂ મેમ્બર પર લંડનની હોટલમાં રૂમની અંદર હુમલો કરવામાં આવ્યો છે. એર ઈન્ડિયાએ આ ઘટનાની પૃષ્ટિ કરી છે. શનિવાર મોડી રાત્રે એર ઈન્ડિયા એ લંડનની એક હોટેલમાં ખોટીરીતે ધૂષણખોરીની ઘટના વિશે એક નિવેદન જારી કર્યું છે. એર ઈન્ડિયાનું કહેવું છે કે, એર ઈન્ડિયા પોતાના ક્રૂ મેમ્બર અને સ્ટાફ મેમ્બરની સુરક્ષા, સંરક્ષણને પ્રાથમિકતા આપે છે. અમે એક અગ્રણી ઈન્ટરનેશનલ ચેઇન દ્વારા સંચાલિત હોટલમાં ધૂષણખોરીની એક ગેરકાનૂની ઘટનાથી દુઃખી છીએ, જેનાથી અમારા ચાલક દળના એક સભ્યને નુકસાન પહોંચ્યું છે. અમે અમારા સહકર્મી અને તેમની સંપૂર્ણ ટીમને પ્રોફેશનલ કન્સલ્ટિંગ સહિત તમામ સંભવ પ્રયાસ પહોંચાડી રહ્યા છીએ.

સાબરમતી એક્સપ્રેસ દુર્ઘટના બાદ કાનપુર થી ઝાંસી સુધી રેલવ ટ્રેક રિપેરિંગ કરવામાં આવ્યો છે. સાબરમતી એક્સપ્રેસ પાટા પરથી ઉતરી જવાની ઘટના પર અલ્હાબાદ રેલવ ડિવિઝનના સીનિયર PRO અમિત માલવીય કહ્યું કે, વિવિધ વિભાગોના સંયુક્ત પ્રયાસો બાદ પ્રથમ ટ્રેન અપ લાઇન ચાલી રહી છે, તેના પર જ ઘટના ઘટી હતી. આ ઘટનાની તપાસ કરવામાં આવી રહી છે.

રશિયાના પૂર્વ કિનારે 7.0 તીવ્રતાનો ભયંકર ભૂકંપ આવ્યો છે. ભૂંકપ બાદ સિવલુચ જ્વાળામુખી ફાટી નીકળ્યો અને હવે સુનામીનું જોખમ તોળાઇ રહ્યું છે. જવાળામુખીની રાખ દરિયાની સપાટીથી 8 કિમી સુધી જોઇ શકાય છે.

કેન્દ્રિય ગૃહ મંત્રી અમિત શાહ અમદાવાદની બે દિવસ મુલાકાતે આવ્યા છે. અમિત શાહ અમદાવાદમાં પડોશી દેશોમાં આવેલા 100થી વધુ હિન્દુ શરણાર્થીઓને ભારતીય નાગરિકતા આપશે. ઉપરાંત અમદાવાદમાં વિકાસના ઘણા પ્રોજેક્ટોનું ઉદઘાટન કરવાના છે.