ઈરાને વિરોધીઓને મૃત્યુદંડની ધમકી આપી, 72 પ્રદર્શનકારીઓના મોત, 2300 થી વધુની અટકાયત

Iran anti-government protests: ઈરાનમાં ચાલી રહેલા વિરોધ પ્રદર્શનો વધારે તેજ બન્યા છે. બીજી તરફ ઇરાને પ્રદર્શનકારીઓને ધમકી આપી છે. જેમાં એટર્ની જનરલ મોહમ્મદ મોવાહેદી આઝાદે ચેતવણી આપી છે કે વિરોધ પ્રદર્શનોમાં ભાગ લેનાર કોઈપણ વ્યક્તિને અલ્લાહનો દુશ્મન ગણવામાં આવશે, જે મૃત્યુદંડની સજાપાત્ર ગુનો છે. એટર્ની જનરલની આ ટિપ્પણીઓ ઈરાનના સરકારી ટેલિવિઝન પર પ્રસારિત કરવામાં આવી હતી.

આ પહેલા ઈરાનના સર્વોચ્ચ નેતા અયાતુલ્લાહ અલી ખામેની અને અન્ય અધિકારીઓએ સંકેત આપ્યો હતો કે ઈરાન કડક કાર્યવાહી શરૂ કરવા જઇ રહ્યું છે. લગભગ બે અઠવાડિયાથી ચાલી રહેલા વિરોધ પ્રદર્શનો તાજેતરના દિવસોમાં વધુ તીવ્ર બન્યા છે. ઈરાનમાં ઇન્ટરનેટ અને ટેલિફોન સેવાઓ પર પ્રતિબંધ વચ્ચે શનિવારે વિરોધ પ્રદર્શન ચાલુ રહ્યા હતા, જેના કારણે દેશ વિશ્વના બાકીના ભાગથી લગભગ કપાઈ ચુક્યો છે.

વિરોધ પ્રદર્શનમાં 72 લોકોના મોત

પ્રતિબંધોને કારણે ચાલી રહેલા વિરોધ પ્રદર્શનો વિશે સચોટ માહિતી મેળવવી મુશ્કેલ બની ગઈ છે. જોકે અમેરિકા સ્થિત સમાચાર એજન્સી હ્યુમન રાઈટ્સ એક્ટિવિસ્ટ્સ અનુસાર આ વિરોધ પ્રદર્શનોમાં અત્યાર સુધીમાં ઓછામાં ઓછા 72 લોકો માર્યા ગયા છે અને 2,300 થી વધુ લોકોની અટકાયત કરવામાં આવી છે.

માર્કો રુબિયોએ કહ્યું - યુએસ ઈરાનના બહાદુર લોકોનું સમર્થન કરે છે

સુપ્રીમ નેતા ખામેનીએ યુએસની ચેતવણીઓ છતાં વિરોધીઓ પર કડક કાર્યવાહી ચાલુ રાખવાનો સંકેત આપ્યો છે. યુએસ સેક્રેટરી ઓફ સ્ટેટ માર્કો રુબિયોએ શનિવારે X પર લખ્યું કે યુએસ ઈરાનના બહાદુર લોકોનું સમર્થન કરે છે. અમેરિકાના વિદેશ મંત્રાલયે એક અલગ ચેતવણી જારી કરીને કહ્યું કે રાષ્ટ્રપતિ ટ્રમ્પ સાથે રમત ન રમો. જ્યારે તેઓ કંઈક કહે છે, ત્યારે તે કરીને બતાવે છે.

આ પણ વાંચો - RSS ચીફ મોહન ભાગવતે મથુરાથી સનાતનીઓને આપ્યો સખત સંદેશ

ઈરાનના  સરકારી ટીવી પર પ્રસારિત થયેલા એક વીડિયોમાં સુપ્રીમ લીડર અયાતુલ્લાહ અલી ખામેનીએ યુએસ રાષ્ટ્રપતિ ડોનાલ્ડ ટ્રમ્પની ચેતવણીને અવગણીને કહ્યું કે અમેરિકાના હાથ ઈરાનીઓના લોહીથી રંગાયેલા છે. આ ફૂટેજમાં ખામેનીના સમર્થકો "અમેરિકા મૃર્દાબાદ" ના નારા લગાવતા જોવા મળ્યા. સરકારી મીડિયાએ પ્રદર્શનકારીઓને આતંકવાદીઓ તરીકે વર્ણવ્યા હતા.