સાંસદોના પગારમાં વધારો, જાણો હવે એક લાખ રૂપિયાના બદલે કેટલો મળશે પગાર અને પેન્શન

Member of Parliament Salary Increase: કેન્દ્ર સરકારે સંસદ સભ્યો અને પૂર્વ સભ્યોના પગાર, દૈનિક ભથ્થાં અને પેન્શનમાં વધારો કરવા માટે નોટિફિકેશન બહાર પાડ્યું છે. સંસદીય બાબતોના મંત્રાલય દ્વારા જાહેર કરવામાં આવેલા નોટિફિકેશન અનુસાર આ સંશોધિત પગાર ધોરણ 1 એપ્રિલ, 2023 થી લાગુ થશે. મોદી સરકારે મોંઘવારીને ધ્યાનમાં રાખીને સેલેરી, એલાઉન્સ અને પેન્શન ઓફ મેમ્બર્સ ઓફ પાર્લામેન્ટ એક્ટ, 1954 હેઠળ પગાર અને પેન્શનમાં ફેરફાર કર્યો છે.

હવે પગાર અને ભથ્થાની વાત કરીએ તો પહેલા સંસદના સભ્યોનો પગાર 1,00,000 રૂપિયા હતો અને હવે તેને વધારીને 1,24,000 રૂપિયા કરી દેવામાં આવ્યો છે. તેવી જ રીતે દૈનિક ભથ્થામાં પણ વધારો થયો છે. આ 2000થી વધારીને 2500 રૂપિયા કરવામાં આવ્યું છે. સાંસદો અને પૂર્વ સભ્યો માટે માસિક પેન્શન 25,000 રૂપિયાથી વધારીને 31,000 રૂપિયા કરવામાં આવ્યું છે. આ સિવાય નવું એડિશનલ પેન્શન પહેલા દર મહિને 2,000 રૂપિયા હતું. જેને વધારીને 2,500 રૂપિયા પ્રતિ માસ કરવામાં આવ્યું છે.

છેલ્લે ક્યારે પગાર વધારો થયો હતો

સંસદના વર્તમાન બજેટ સત્ર દરમિયાન આ સુધારો કરવામાં આવ્યો છે. સાંસદોના પગાર, ભથ્થાં અને પેન્શનમાં છેલ્લે એપ્રિલ 2018માં સુધારો કરવામાં આવ્યો હતો. આ વધારાની રાજ્યની તિજોરી પર નાણાકીય અસર થવાની સંભાવના છે કારણ કે 543 લોકસભા સાંસદ, 245 રાજ્યસભા સાંસદ અને ઘણા પૂર્વ સાંસદો છે જેમને વધેલા પેન્શનનો લાભ મળશે.

આ પણ વાંચો - દિલ્હીથી શિમલા જતા પ્લેનમાં સવાર હતા ઉપમુખ્યમંત્રી અને DGP, લેન્ડિંગ સમયે બ્રેકમાં આવી ટેક્નિકલ ખામી

પગાર અને ભથ્થાં ઉપરાંત સાંસદોને બીજી ઘણી સુવિધાઓનો લાભ પણ મળે છે. સાંસદોને તેમના મતવિસ્તારમાં કામ માટે દર મહિને 70,000 રૂપિયા અને ઓફિસ ખર્ચ માટે દર મહિને 60,000 રૂપિયા મતવિસ્તાર ભથ્થું મળે છે. જેમાં કર્મચારીઓના પગાર, ફોન અને સ્ટેશનરીનો સમાવેશ થાય છે.

હવાઈ મુસાફરીનો પણ મળે છે ફાયદો

સાંસદોને દર વર્ષે પોતાના અને પોતાના પરિવાર માટે 34 મફત હવાઈ મુસાફરીનો લાભ પણ મળે છે. સાથે જ તેમને કેટલીક જગ્યાએ ભાડા વગર રહેવાની સગવડ પણ મળે છે. જે લોકો સત્તાવાર આવાસ લેવા માંગતા નથી તેઓ 2 લાખ રૂપિયાના માસિક આવાસ ભથ્થાનો દાવો કરી શકે છે. આ બધા સિવાય પણ સાંસદોને બીજા ઘણા લાભ ઉપલબ્ધ છે. જેમાં 50 હજાર યુનિટ મફત વીજળી, પરિવારના સભ્યો માટે કેન્દ્ર સરકારની આરોગ્ય યોજના હેઠળ આરોગ્ય સંભાળનું કવરેજ સામેલ છે.