Odisha DIG suspended : IPS ઓફિસર રાત્રે પરિણીત મહિલા ઈન્સ્પેક્ટરના ઘરમાં બળજબરીથી ઘૂસ્યા? સરકારે સસ્પેન્ડ કર્યા

Odisha DIG suspended : ઓડિશા સરકારે મંગળવારે IPS અધિકારી પંડિત રાજેશ ઉત્તમરાવને "ગંભીર ગેરવર્તણૂક" ના આધારે બરતરફ કર્યા. IPS રાજેશ પર પરિણીત મહિલા ઈન્સ્પેક્ટરના ઘરમાં બળજબરીથી ઘૂસીને તેની સાથે ગેરવર્તન કરવાનો આરોપ છે. ધ ઈન્ડિયન એક્સપ્રેસના અહેવાલ મુજબ કથિત ઘટના 27 જુલાઈની રાત્રે બની હતી.

પંડિત રાજેશ ઉત્તમરાવ 2007 બેચના આઈપીએસ અધિકારી છે. તેઓ હાલમાં DIG ફાયર સર્વિસ અને હોમગાર્ડ તરીકે તૈનાત છે. રાજ્યના ગૃહ વિભાગ દ્વારા જારી કરાયેલા આદેશમાં કહેવામાં આવ્યું છે કે આ ઘટના અંગે ડીજીપી ઓડિશા દ્વારા એક ગોપનીય અહેવાલ સુપરત કરવામાં આવ્યો છે.

આ ઘટના અંગે મુખ્યમંત્રીને પણ જાણ કરવામાં આવી હતી

ભારતીય પોલીસ સેવાના સભ્ય તરીકે ગંભીર ગેરવર્તણૂકના આધારે IPS પંડિત રાજેશ ઉત્તમરાવ સામે શિસ્તભંગની કાર્યવાહી કરવામાં આવશે, એમ ગૃહ વિભાગના અહેવાલમાં જણાવાયું છે. તેથી, ઓડિશા સરકાર, ઓલ ઈન્ડિયા સર્વિસીસ (શિસ્ત અને અપીલ) નિયમો, 1969 ના નિયમ 3 ના પેટા-નિયમ (1) દ્વારા આપવામાં આવેલી સત્તાઓનો ઉપયોગ કરીને, IPS પંડિત રાજેશ ઉત્તમરાવને તાત્કાલિક અસરથી સસ્પેન્ડ કરે છે.

ઈન્ડિયન એક્સપ્રેસના અહેવાલમાં સત્તાવાર સૂત્રોના હવાલાથી કહેવામાં આવ્યું છે કે સોમવારે સાંજે નવી દિલ્હીથી પરત ફર્યા બાદ મુખ્યમંત્રી મોહન ચરણ માંઝીને આ ઘટનાની જાણ કરવામાં આવી હતી. આ મામલે કાર્યવાહી કરવા સૂચના આપી હતી.

મહિલા પોલીસ ઈન્સ્પેક્ટર સાથેના આ દુર્વ્યવહારના કેસ અંગે પોલીસને કોઈ ફરિયાદ મળી નથી. પોલીસ સૂત્રોએ જણાવ્યું કે મહિલા ઈન્સ્પેક્ટરના પતિ પર પણ કથિત રીતે હુમલો કરવામાં આવ્યો હતો, ત્યારબાદ આઈપીએસ અધિકારીને પોલીસકર્મીઓ ઉપાડી ગયા હતા.

આ પણ વાંચોઃ-તેહરાનમાં હમાસ ચીફ ઈસ્માઈલ હાનિયાની હત્યા, તેના ઘર પર હુમલામાં બોડીગાર્ડનું પણ મોત

સસ્પેન્શન સમયગાળા દરમિયાન IPS અધિકારી પંડિત રાજેશ ઉત્તમરાવને રાજ્ય પોલીસ મુખ્યાલય, કટક ખાતે તૈનાત કરવામાં આવશે. ગૃહ વિભાગના આદેશમાં જણાવાયું છે કે તેમને પોલીસ મહાનિર્દેશકની પરવાનગી લીધા વિના મુખ્યાલય ન છોડવા માટે કહેવામાં આવ્યું છે.