અમેરિકામાં ગૌતમ અદાણી અને ગેરકાયદે પ્રવાસીઓ પર પૂછેલા પ્રશ્ન પર પીએમ મોદીએ શું જવાબ આપ્યો?

Adani Bribery Allegations: અમેરિકામાં ગૌતમ અદાણીના મુદ્દે ભારતના વડાપ્રધાન નરેન્દ્ર મોદીએ જડબાતોડ જવાબ આપ્યો છે. જ્યારે પીએમ મોદીને પૂછવામાં આવ્યું કે શું અમેરિકી રાષ્ટ્રપતિ ડોનાલ્ડ ટ્રમ્પ સાથેની મુલાકાતમાં ઉદ્યોગપતિ ગૌતમ અદાણી સામેના કેસની ચર્ચા થઈ હતી તો પીએમ મોદીએ કહ્યું કે ભારત લોકશાહી છે અને આપણી સંસ્કૃતિ 'વસુધૈવ કુટુંબકમ' છે, અમે આખી દુનિયાને એક પરિવાર માનીએ છીએ. હું માનું છું કે દરેક ભારતીય મારો છે. બે દેશોના બે અગ્રણી નેતાઓ ક્યારેય આવા અંગત મુદ્દાઓ પર ચર્ચા કરતા નથી.

PM મોદીએ ગેરકાયદેસર ઇમિગ્રન્ટ્સના મુદ્દે શું કહ્યું?

તે જ સમયે, ગેરકાયદેસર ઇમિગ્રેશનના મુદ્દા પર વડાપ્રધાન નરેન્દ્ર મોદીએ કહ્યું કે જે લોકો અન્ય દેશોમાં ગેરકાયદેસર રીતે રહે છે તેમને ત્યાં રહેવાનો કોઈ કાયદેસર અધિકાર નથી. જ્યાં સુધી ભારત અને અમેરિકાનો સવાલ છે, અમે હંમેશા કહ્યું છે કે જે લોકો વેરિફાઈડ છે અને વાસ્તવમાં ભારતના નાગરિક છે, જો તેઓ અમેરિકામાં ગેરકાયદેસર રીતે રહે છે, તો ભારત તેમને પરત લેવા તૈયાર છે. પરંતુ તે આપણા માટે આટલું મર્યાદિત નથી.

પીએમ મોદીએ કહ્યું કે આ સામાન્ય પરિવારના લોકો છે. તેમને મોટા-મોટા સપના દેખાડવામાં આવે છે અને તેમાંથી મોટાભાગના લોકોને ગેરમાર્ગે દોરવામાં આવે છે અને અહીં લાવવામાં આવે છે. તેથી, આપણે માનવ તસ્કરીની આ સમગ્ર વ્યવસ્થા પર હુમલો કરવો જોઈએ.

અમેરિકા અને ભારતે મળીને આવી ઇકોસિસ્ટમને જડમૂળથી ઉખેડી નાખવાનો પ્રયાસ કરવો જોઈએ જેથી માનવ તસ્કરીનો અંત આવે… અમારી મોટી લડાઈ તે સમગ્ર ઈકોસિસ્ટમ સામે છે અને અમને વિશ્વાસ છે કે રાષ્ટ્રપતિ ટ્રમ્પ આ ઈકોસિસ્ટમને ખતમ કરવામાં ભારતને સંપૂર્ણ સહયોગ કરશે.

આ પહેલા ગુરુવારે અમેરિકાના રાષ્ટ્રપતિ ડોનાલ્ડ ટ્રમ્પે વ્હાઇટ હાઉસમાં વડાપ્રધાન નરેન્દ્ર મોદીનું ઉષ્માભર્યું સ્વાગત કર્યું હતું. બંને નેતાઓએ એકબીજાનું અભિવાદન કર્યું અને હાથ મિલાવ્યા. વાતચીત દરમિયાન ટ્રમ્પે મોદીને કહ્યું કે અમે તમને ખૂબ યાદ કર્યા, અમે તમને ખૂબ જ યાદ કર્યા.

રાષ્ટ્રપતિ ટ્રમ્પના શપથ ગ્રહણ બાદ અમેરિકાની મુલાકાત લેનારા પ્રથમ વિશ્વ નેતાઓમાં પીએમ મોદી પણ સામેલ છે. અમેરિકી રાષ્ટ્રપતિના આમંત્રણ પર નવા વહીવટીતંત્રે કાર્યભાર સંભાળ્યાના ત્રણ અઠવાડિયા પછી જ તેમની મુલાકાત આવી છે.

વોશિંગ્ટનમાં વ્હાઇટ હાઉસમાંથી બોલતા વડા પ્રધાન નરેન્દ્ર મોદીએ આતંકવાદનો સામનો કરવા માટે અમેરિકા સાથે ભારતના સહયોગ પર પ્રકાશ પાડ્યો હતો. તેમણે કહ્યું કે ભારત અને અમેરિકા આતંકવાદ સામેની લડાઈમાં સાથે રહ્યા છે. અમે સહમત છીએ કે સરહદની બીજી બાજુથી ઉદ્ભવતા આતંકવાદને ખતમ કરવા માટે નક્કર પગલાં લેવા જોઈએ.

આ પણ વાંચોઃ-Modi Trump Meeting: PM નરેન્દ્ર મોદી અને ડોનાલ્ડ ટ્રમ્પ બેઠકના 7 મોટા નિર્ણય, મુંબઇ હુમલાનો આરોપી ભારતને સોંપાશે

અમેરિકી રાષ્ટ્રપતિ પ્રત્યે આભાર વ્યક્ત કરતા તેમણે કહ્યું કે હું રાષ્ટ્રપતિનો આભારી છું કે તેમણે 2008માં ભારતમાં નરસંહાર કરનાર ગુનેગારને ભારતને પ્રત્યાર્પણ કરવાનો નિર્ણય લીધો છે. ભારતીય અદાલતો યોગ્ય પગલાં લેશે.