Bihar Election Result 2025: શું બિહાર ચૂંટણીમાં હાર બાદ પ્રશાંત કિશોર રાજકારણ છોડશે? પાર્ટી અધ્યક્ષે જવાબ આપ્યો

Bihar Election Result 2025 : બિહાર વિધાનસભા ચૂંટણી 2025ના પરિણામોમાં સૌથી મોટો ઝટકો પ્રશાંત કિશોર (પીકે) ની પાર્ટી જન સુરાજને લાગ્યો છે. ચૂંટણી પહેલા પ્રશાંત કિશોર ઘણી ચેનલોમાં ઇન્ટરવ્યૂ આપી રહ્યા હતા અને કહી રહ્યા હતા કે જેડીયુને 25 બેઠકો પણ નહીં મળે, જો આવશે તો હું રાજકારણ છોડી દઈશ. પરંતુ હવે જન સુરાજ પાર્ટીના રાષ્ટ્રીય અધ્યક્ષ ઉદય સિંહે આ અંગે પ્રતિક્રિયા આપી છે.

જન સુરાજ પાર્ટીના રાષ્ટ્રીય અધ્યક્ષ ઉદય સિંહે કહ્યું કે, બિલકુલ નહીં, તેઓ રાજકારણ છોડશે નહીં. તમે લોકો ઇચ્છો છો કે તે રાજકારણ છોડી દે. જો પ્રશાંત કિશોર જેવી વ્યક્તિ અને જન સુરજ પાર્ટી જેવી પહેલનો અંત આવે તો તમને આનંદ થશે. તમે આનો આગ્રહ શા માટે કરો છો? તેમણે રાજકારણ શા માટે છોડવું જોઈએ? તે ખરેખર આશ્ચર્યજનક છે. ”

રોકડ રકમ વિતરણને મહત્ત્વપૂર્ણ પરિબળ ગણાવ્યું

ઉદય સિંહે નીતિશ કુમારની આગેવાની હેઠળની એનડીએ સરકાર દ્વારા મહિલાઓને રોકડ વિતરણને એનડીએની પ્રચંડ જીતમાં મુખ્ય પરિબળ ગણાવ્યું હતું. આનાથી બિહારની અર્થવ્યવસ્થા પર દબાણ આવશે. તે આ દેવાના ચક્રમાંથી કેવી રીતે અને ક્યારે બહાર આવશે તે મારી સમજની બહાર છે. તેમણે ભારપૂર્વક જણાવ્યું હતું કે જેએસપી નિરાશ નથી.

તેમણે ઉમેર્યું કે, "અમે જાણીએ છીએ કે શું કરવું. અમે કામ કરવાનું ચાલુ રાખીશું અને 'બિહાર બદલાંવ' (પરિવર્તનનું વચન) પૂર્ણ કરીશું, જેની અમે વાત કરી હતી. પ્રશાંત કિશોરની જન સુરજ પાર્ટીએ 238 બેઠકો પર ચૂંટણી લડી હતી અને 236 પર પોતાની ડિપોઝિટ ગુમાવી હતી. પ્રશાંત કિશોરે 2 ઓક્ટોબર, 2024ના રોજ પટનામાં સત્તાવાર રીતે જન સુરાજ પાર્ટીની શરૂઆત કરી હતી, જો કે સંગઠન 2022 થી એક જૂથ તરીકે સક્રિય છે.

બિહાર ચૂંટણીમાં NDA ને પ્રચંડ જીત

બિહાર વિધાનસભાની ચૂંટણીમાં એનડીએ એ 202 બેઠકો જીતી હતી. ભારતીય જનતા પાર્ટીને 89 બેઠકો મળી હતી, જ્યારે નીતિશ કુમારની આગેવાની હેઠળના જનતા દળ (યુનાઇટેડ)ને 85 બેઠકો મળી હતી. ચિરાગ પાસવાનની એલજેપી-આરવીએ 19 બેઠકો જીતી હતી. મહાગઠબંધન માત્ર 35 બેઠકો જ જીતી શક્યું છે. રાષ્ટ્રીય જનતા દળને 25 બેઠકો મળી હતી, જ્યારે કોંગ્રેસને માત્ર 6 બેઠકો મળી હતી.

આ પણ વાંચો | કોણ છે સંજય યાદવ? બિહાર ચૂંટણી બાદ લાલુ પરિવારમાં તિરાડ, રોહિણી આચાર્યએ મોરચો ખોલ્યો

બિહાર ચૂંટણીમાં કોને કેટલા મત મળ્યા?

બિહાર વિધાનસભા ચૂંટણીમાં એનડીએ ને 46.52 ટકા મત મળ્યા હતા. જે મહાગઠબંધનના ૩૭.૬૪ ટકા મત કરતાં ઘણા વધારે છે. શાસક ગઠબંધનમાં ભારતીય જનતા પાર્ટીને 20.08 ટકા, જેડીયુને 19.26 ટકા, એલજેપીને 4.97 ટકા, એચએએમ (એસ) ને 1.18 ટકા અને આરએલએમને 1.03 ટકા મત મળ્યા છે. મહાગઠબંધનમાં આરજેડીને 23 ટકા, કોંગ્રેસને 8.71 ટકા, ડાબેરી પક્ષોને 4.18 ટકા, વીઆઈપીને 1.38 ટકા અને આઈઆઈપીને 0.37 ટકા મત મળ્યા છે. કોંગ્રેસ તેના સૌથી ઓછા વોટ શેર (2010 માં 4 બેઠકો) થી બચી ગઈ હતી. આરજેડીનું સૌથી ખરાબ પ્રદર્શન 2010 માં પણ હતું.