Rajnath Singh US Visit | રાજનાથ સિંહ યુએસ વિઝિટ : રક્ષા મંત્રી રાજનાથ સિંહ ચાર દિવસીય અમેરિકાની મુલાકાતે છે. તેઓ ગઈકાલે અમેરિકાના રાષ્ટ્રીય સુરક્ષા સલાહકાર જેક સુલિવાનને મળ્યા હતા અને બંને દેશો વચ્ચે ચાલી રહેલા સંરક્ષણ ઔદ્યોગિક સહયોગ પ્રોજેક્ટ્સ અને સંભવિત ક્ષેત્રોમાં સોદા અંગે ચર્ચા કરી હતી. આ દરમિયાન બંને વચ્ચે માત્ર સંરક્ષણ જ નહીં પરંતુ હાલમાં ઉભરી રહેલી ભૌગોલિક રાજકીય સ્થિતિ અને અન્ય મુખ્ય પ્રાદેશિક સુરક્ષા મુદ્દાઓ પર પણ ચર્ચા થઈ હતી.
ખાસ વાત એ છે કે, તે જ દિવસે અમેરિકાના બિડેન પ્રશાસને અમેરિકી સંસદમાં એક નોટિફિકેશન દ્વારા ભારતને 443 કરોડ રૂપિયાના એન્ટી સબમરીન વોરફેર સ્નોબોય અને તેનાથી સંબંધિત ઉપકરણોના વેચાણને મંજૂરી આપી હતી.
રક્ષા મંત્રી રાજનાથ સિંહ અને જેક સુલ્વિનની આ બેઠક પેન્ટાગોનમાં તેમના સમકક્ષ એટલે કે, અમેરિકી રક્ષા મંત્રી લોયડ ઓસ્ટિન સાથે મુલાકાત બાદ થઈ હતી. આ બેઠક બાદ સંરક્ષણ મંત્રાલયે એક નિવેદન બહાર પાડ્યું છે. આ નિવેદન અનુસાર, રાજનાથ સિંહે ગયા વર્ષે અપનાવવામાં આવેલા ભારત-યુએસ સંરક્ષણ ઔદ્યોગિક સહકાર રોડમેપમાં ઓળખાયેલા ક્ષેત્રોમાં ભારતમાં સહ-વિકાસ અને સહ-ઉત્પાદન માટેની તકો પર વધુ ધ્યાન કેન્દ્રિત કર્યું.
સંરક્ષણ ભાગીદારી મજબૂત કરવા પર ચર્ચા
પેન્ટાગોન દ્વારા જાહેર કરાયેલા અન્ય એક નિવેદનમાં કહેવામાં આવ્યું છે કે, સંરક્ષણ પ્રધાન રાજનાથ સિંહ અને ઓસ્ટિને મુક્ત અને ખુલ્લા ઈન્ડો-પેસિફિક ક્ષેત્રના સમર્થનમાં યુનાઈટેડ સ્ટેટ્સ અને ભારત વચ્ચે મુખ્ય સંરક્ષણ ભાગીદારીને મજબૂત કરવાના પ્રયાસો અંગે ચર્ચા કરી હતી. તેમાં કહેવામાં આવ્યું છે કે, તેઓ સંરક્ષણ ઔદ્યોગિક સહકાર માટે યુએસ-ઈન્ડિયા રોડમેપ હેઠળ જેટ એન્જિન, માનવરહિત પ્લેટફોર્મ, યુદ્ધસામગ્રી અને ગ્રાઉન્ડ મોબિલિટી સિસ્ટમ્સ સહિત પ્રાધાન્યતા સહ-ઉત્પાદન પ્રોજેક્ટ્સને આગળ ધપાવવા સંમત થયા છે.
અનેક ડિફેન્સ કંપનીઓના માલિકોને પણ મળ્યા
ભારત અને અમેરિકાએ ગુરુવારે બે મોટા સંરક્ષણ કરાર પર હસ્તાક્ષર કર્યા. આમાં પુરવઠા વ્યવસ્થાની બિન-બંધનકારી સુરક્ષા (SOS) અને લાયઝન ઓફિસર્સની નિમણૂક પર સમજૂતીના મેમોરેન્ડમનો સમાવેશ થાય છે, જેનું બંને પક્ષોએ સ્વાગત કર્યું હતું.
શનિવારે સંરક્ષણ મંત્રાલયના એક નિવેદનમાં કહેવામાં આવ્યું છે કે, સંરક્ષણ પ્રધાને વોશિંગ્ટન ડીસીમાં યુએસ ઈન્ડિયા સ્ટ્રેટેજિક પાર્ટનરશિપ ફોરમ દ્વારા આયોજિત કોન્ફરન્સમાં યુએસ સંરક્ષણ ઉદ્યોગના વરિષ્ઠ નેતાઓ સાથે પણ વાતચીત કરી હતી. તેમાં ઘણી અમેરિકન ડિફેન્સ અને ટેક્નોલોજી કંપનીઓએ ભાગ લીધો હતો.
ભારત વિદેશી રોકાણ માટે તૈયાર છે
સંરક્ષણ મંત્રાલય દ્વારા જાહેર કરાયેલા એક નિવેદન અનુસાર, રાજનાથ સિંહે ભારત યુએસ રોકાણ અને ટેકનોલોજી સહયોગને કેવી રીતે આવકારે છે તેના પર ધ્યાન કેન્દ્રિત કર્યું અને કુશળ માનવ સંસાધન આધાર, મજબૂત વિદેશી પ્રત્યક્ષ રોકાણ અને વ્યવસાય તરફી ઇકોસિસ્ટમ સહિત વિશાળ સ્થાનિક બજાર સાથે સ્થિતિમાં મજબૂત છે.
તેમણે કહ્યું કે, ભારત ક્ષમતા નિર્માણ અને ટકાઉ ટેક્નોલોજી અને ઔદ્યોગિક ભાગીદારી માટે સંરક્ષણ ક્ષેત્રે યુએસ સાથે નજીકથી કામ કરવા માટે ઉત્સુક છે, જે ઉભરતા પડકારોનો સામનો કરી શકે છે.
આ પણ વાંચો – PM Modi Ukraine Visit: પીએમ મોદીના યુક્રેન પ્રવાસથી ભારતને શું ફાયદો? આ ત્રણ પોઈન્ટ્સથી સમજો
એ પણ નોંધનીય છે કે, શુક્રવારે જ, બિડેન પ્રશાસને યુએસ સંસદને મોકલેલી સૂચનામાં કહ્યું હતું કે, પ્રસ્તાવિત વેચાણ માત્ર દ્વિપક્ષીય વ્યૂહાત્મક સંબંધોને મજબૂત કરવા અને મુખ્ય સંરક્ષણ ભાગીદાર ભારતની સુરક્ષામાં સુધારો કરવા માટે છે.
તેમાં કહેવામાં આવ્યું છે કે, તે ભારતના MH-60R હેલિકોપ્ટરની ક્ષમતામાં વધારો કરશે. આ સિવાય વર્તમાન અને ભવિષ્યના જોખમોનો સામનો કરવાની ક્ષમતાને સુધારવામાં તે મહત્વપૂર્ણ સાબિત થશે.
