સુપ્રીમ કોર્ટે રાહત આપવાની સાથે અલી ખાન મહમૂદાબાદને ફટકાર લગાવી, પોસ્ટને 'ડોગ વ્હિસલિંગ' ગણાવી

Supreme Court on ali khan Mahmudabad : સુપ્રીમ કોર્ટે બુધવારે અશોકા યુનિવર્સિટીના પ્રોફેસર અલી ખાન મહમૂદાબાદને વચગાળાના જામીન આપ્યા છે. ભારતીય સશસ્ત્ર દળોમાં મહિલા અધિકારીઓનું અપમાન કરવા અને સાંપ્રદાયિક નફરતને પ્રોત્સાહન આપતી ટિપ્પણી કરવા બદલ તેમની ધરપકડ કરવામાં આવી હતી. જોકે, સર્વોચ્ચ અદાલતે પ્રોફેસરની સોશિયલ મીડિયા પોસ્ટને 'ડોગ વ્હિસલિંગ' ગણાવી.

સુપ્રીમ કોર્ટે અલી ખાન મહમૂદાબાદના શબ્દોની પસંદગી પર સવાલ ઉઠાવ્યા. કહ્યું કે આ શબ્દોનો ઉપયોગ અન્ય લોકોને અપમાનિત કરવા અને અસ્વસ્થતા પહોંચાડવા માટે કરવામાં આવ્યો હતો. સર્વોચ્ચ અદાલતે કહ્યું કે દરેકને અભિવ્યક્તિની સ્વતંત્રતાનો અધિકાર છે પરંતુ મહમૂદાબાદના નિવેદનો કાયદાની નજરમાં 'ડોગ વ્હિસલિંગ' સમાન હતા.

જોકે, CJI બીઆર ગવઈ અને જસ્ટિસ ઓગસ્ટિન જ્યોર્જ મસીહની બેન્ચે તપાસ પર રોક લગાવવાનો ઇનકાર કર્યો હતો અને હરિયાણા ડીજીપીને ત્રણ સભ્યોની વિશેષ તપાસ ટીમની રચના કરવાનો નિર્દેશ આપ્યો હતો.

આ પણ વાંચોઃ- Operation Sindoor: ઓપરેશન સિંદૂર પછી LoC પર સેનાનું મોટું પ્લાનિંગ, પાકિસ્તાનને કોઈપણ દુ:સાહસનો મળશે જડબાતોડ જવાબ

ઓપરેશન સિંદૂર પરની તેમની સોશિયલ મીડિયા પોસ્ટ્સ બદલ સાર્વભૌમત્વ અને અખંડિતતાને જોખમમાં મૂકવા સહિતના કડક આરોપો હેઠળ બે એફઆઈઆર નોંધાયા બાદ 18 મેના રોજ મહમૂદાબાદની ધરપકડ કરવામાં આવી હતી. હરિયાણા રાજ્ય મહિલા આયોગ (HSCW) દ્વારા એક દિવસ પહેલા નોંધાયેલા કેસમાં તેને 18 મેના રોજ સોનીપતની સ્થાનિક કોર્ટમાં રજૂ કરવામાં આવ્યો હતો અને બે દિવસની પોલીસ કસ્ટડીમાં મોકલવામાં આવ્યો હતો.

તાજેતરમાં, HSCW એ તેમને તેમની ટિપ્પણીઓ પર પ્રશ્ન ઉઠાવતી નોટિસ મોકલી હતી. જોકે, મહમૂદાબાદે કહ્યું કે તેમને ગેરસમજ કરવામાં આવી હતી અને તે અભિવ્યક્તિની સ્વતંત્રતાના તેમના મૂળભૂત અધિકાર પર ભાર મૂકે છે. હરિયાણા પોલીસે જણાવ્યું હતું કે સોનીપતના રાય પોલીસ સ્ટેશનમાં બે એફઆઈઆર નોંધવામાં આવી છે.