Gujarati News 16 February 2025: ગુજરાતની પાલિકા-પંચાયતની ચૂંટણીમાં સરેરાશ 57 ટકા મતદાન, 18 ફેબ્રુઆરીએ મતગણતરી

ગુજરાતની પાલિકા-પંચાયતની ચૂંટણીમાં સરેરાશ 57 ટકા મતદાન થયું છે. ગત ચૂંટણી કરતા આ વખતે મતદાનમાં 8 ટકાનો ઘટાડો થયો છે. 2018માં યોજાયેલી 75 નગરપાલિકામાં સરેરાશ 65 ટકા મતદાન થયું હતું. હવે 18 ફેબ્રુઆરીએ મતગણતરી હાથ ધરાશે.

ગુજરાતની પાલિકા-પંચાયતની ચૂંટણીમાં શાંતિપૂર્ણ રીતે મતદાન સંપન્ન થયું છે. 5 વાગ્યા સુધીમાં સરેરાશ 55 ટકા મતદાન નોંધાયું છે.

ગુજરાતની પાલિકા પંચાયતની ચૂંટણીમાં બપોરે 3 વાગ્યા સુધીનું સરેરાશ 44 ટકા મતદાન થયું છે.

ગુજરાતની પાલિકા પંચાયતની ચૂંટણીમાં બપોર સુધી સરેરાશ 31 ટકા મતદાન થયું છે. ઘણા સ્થળોએ મતદાન વખત ઇવીએમમાં ખામી હોવાની ઘટના બની છે. નવસારીના બિલિમોરા પાલિકાના વોર્ડ નંબર 2માં ઇવીએમ ખોટકાયું હતું. ઇવીએમ મશિનમાં ખામી સર્જાતા કોંગ્રેસના ઉમેદવારે હોબાળો મચાવ્યો.

ભાવનગરમાં સિહોર સ્થિત જીઆઈડીસીની એક ફેક્ટરીમાં બ્લાસ્ટ થયો છે. ફેક્ટરીમાં બ્લાસ્ટ થતા 3 શ્રમિકો ગંભીર ઘાયલ થયા છે. ફેક્ટરીમાં બ્લાસ્ટની ઘટના બાદ પોલીસે ઘટનાસ્થળની આસપાસનો વિસ્તાર સીલ કર્યો છે.

ગુજરાતમાં આજે પાલિકા પંચાયતની ચૂંટણી માટે સવારે 7 વાગે મતદાન શરૂ થયુ હતુ. મતદાનના પ્રથમ 4 કલાકમાં 16 ટકા વોટિંગ થયું છે. ગુજરાતમાં આજે 68 નગરપાલિકા, 3 તાલુકા અને 1 મહાનગર પાલિકા બેઠકની ચૂંટણી માટે મતદાન થઇ રહ્યું છે.

અમેરિકાથી શનિવારે ડિપોર્ટ થયેલા 116 ભારતીયો અમૃતસર એરપોર્ટ પર ઉતર્યા હતા. યુએસથી ડિપોર્ટ થયેલા 116 ભારતીયોમાંથી 8 ગુજરાતી છે, જેમને આજે અમદાવાદ એરપોર્ટ પર લાવવામાં આવ્યા છે. આ 8 ગુજરાતીમાં 6 મહેસાણાના અને 2 ગાંધીનગરના રહેવાસી છે. આ માટે અમદાવાદ એરપોર્ટ પર પોલીસ કાફલા સાથે કડક સુરક્ષા વ્યવસ્થા છે. આ વ્યક્તિઓને કડક સુરક્ષા વચ્ચે પોલીસ તેમના ઘરે પહોંચાડવા રવાના થઇ છે.

ગુજરાતમાં પાલિકા પંચાયત ચૂંટણી માટે આજે મતદાન ચાલી રહ્યું છે. સવારે 7 વાગે મતદાન શરૂ થયાના પ્રથમ બે કલાકમાં 4 ટકા મતદાન થયું છે. ઘણા મત મથકો પર ઇવીએમમાં ખામી સર્જાઇ છે.

દિલ્હી રેલવે સ્ટેશન પર નાસભાગ થતા 18 લોકોના મોત થયા છે. આ દૂર્ઘટના પ્રત્યે પીએમ નરેન્દ્ર મોદીએ શોક વ્યક્ત કર્યો છે. કેન્દ્ર સરકારે આ નાસભાગમાં જીવ ગુમાવનાર લોકોના પરિવારજનોને 10 લાખ રૂપિયાની સહાય આપવાની ઘોષણા કરી છે. ગંભીર રીતે ઘાયલ થયેલા લોકોને 2.5 લાખ અને સામાન્ય ઇજાગ્રસ્ત લોકોને 1 લાખ રૂપિયાની સહાય આપવામાં આવશે.

ગુજરાતમાં સ્થાનિક સ્વરાજ્યની સંસ્થાઓની બેઠકો માટે આજે ચૂંટણી મતદાન શરૂ થઇ ગયું છે. ગુજરાતની જૂનાગઢ મ્યુનિસિપલ કોર્પોરેશન (JMC), 68 નગરપાલિકાઓ અને ત્રણ તાલુકા પંચાયતો અને 1 મહાનગર પાલિકા બેઠકોની ચૂંટણી માટે આજે મતદાન શરૂ થઇ ગયું છે. આજે 1677 બેઠકો પર ચૂંટણી યોજાઇ રહી છે, જેમા 4374 ઉમેદવારોની રાજકીય ભવિષ્ય નક્કી થશે. ચૂંટણી પહેલા વિવિધ 66 નગરપાલિકાઓના 461 વોર્ડ પૈકી કુલ 24 બોર્ડ બિનહરિફ જાહેર થયા છે.