Gujarati News 25 March 2025 : કુણાલ કામરાની કમેન્ટ પર એકનાથ શિંદેની પહેલી પ્રતિક્રિયા સામે આવી

લોકસભામાં ફાઇનાન્સ બિલ 2025 પાસ થઈ ગયું છે. નાણામંત્રી નિર્મલા સીતારમણે સુધારેલું નાણા બિલ 2025 રજૂ કર્યું, જે પાસ થઈ ગયું છે. આ સુધારાઓમાં ઓનલાઈન જાહેરાત પર 6 ટકા ડિજિટલ ટેક્સ અથવા ગુગલ ટેક્સ નાબૂદ કરવાનો સમાવેશ થાય છે. આ ઉપરાંત 34 અન્ય સુધારાઓનો સમાવેશ થાય છે. હવે આ બિલને રાજ્યસભામાં રજૂ કરવામાં આવશે.

છત્તીસગઢના દંતેવાડામાં સુરક્ષા દળો અને માઓવાદીઓ વચ્ચે અથડામણ થઇ છે. આમાં ત્રણ નક્સલીઓ માર્યા ગયા છે. આ લિસ્ટમાં 25 લાખ રૂપિયાનું ઇનામ ધરાવતો નક્સલી પણ સામેલ છે. સુરક્ષા દળો લાંબા સમયથી સુધીર ઉર્ફે મુરલીને શોધી રહ્યા હતા, તે શોધમાં તેના પર મોટું ઈનામ પણ રાખવામાં આવ્યું હતું. મંગળવારે સુરક્ષાદળોએ તેને ઠાર કર્યો છે. હાલ દંતેવાડામાં સર્ચ ઓપરેશન ચાલી રહ્યું છે અને અન્ય નક્સલવાદીઓની શોધખોળ ચાલી રહી છે. સ્થળ પરથી દારૂગોળો અને મોટી માત્રામાં ઇન્સાસ રાઇફલ જપ્ત કરવામાં આવી છે.

સુપ્રીમ કોર્ટ દ્વારા રચવામાં આવેલી ત્રણ સભ્યોની આંતરિક સમિતિએ મંગળવારે દિલ્હી હાઇકોર્ટના જસ્ટિસ યશવંત વર્મા સાથે જોડાયેલા કથિત રોકડ રિકવરી વિવાદની તપાસ શરૂ કરી હતી. સૂત્રોએ આ માહિતી આપી હતી. આ સમિતિમાં પંજાબ અને હરિયાણા હાઈકોર્ટના મુખ્ય ન્યાયાધીશ શીલ નાગુ, હિમાચલ પ્રદેશ હાઈકોર્ટના મુખ્ય ન્યાયાધીશ જી એસ સંધાવાલિયા અને કર્ણાટક હાઈકોર્ટના ન્યાયાધીશ અનુ શિવરામનનો સમાવેશ થાય છે. સૂત્રોએ જણાવ્યું હતું કે સમિતિના ત્રણેય સભ્યો જસ્ટિસ વર્માના 30, તુગલક ક્રેસેન્ટ ખાતેના સત્તાવાર નિવાસસ્થાને પહોંચ્યા હતા. તેમણે જણાવ્યું હતું કે, ત્રણેય ન્યાયાધીશો લગભગ 30-35 મિનિટ સુધી જસ્ટિસ વર્માના સત્તાવાર નિવાસસ્થાનની અંદર હતા અને નિરીક્ષણ કર્યું હતું.

દિલ્હીના મુખ્યમંત્રી રેખા ગુપ્તાએ નવી સરકારનું પ્રથમ બજેટ વિધાનસભામાં રજૂ કર્યું. દિલ્હીનું બજેટ હવે 1 લાખ કરોડને પાર કરી ગયું છે. આ બજેટમાં ઐતિહાસિક વધારો કરવામાં આવ્યો છે. અગાઉ 76 હજાર કરોડનું બજેટ રજૂ કરવામાં આવ્યું હતું. પરંતુ આ વખતે આ રકમ 1 લાખ કરોડ રૂપિયાને વટાવી ગઈ છે. એટલે કે બજેટમાં 31.5 ટકાનો વધારો થયો છે.

મહારાષ્ટ્રના નાયબ મુખ્યપ્રધાન એકનાથ શિંદે પર વિવાદાસ્પદ ટિપ્પણી પર થયેલા હોબાળા વચ્ચે ડેપ્યુટી સીએમની પહેલી પ્રતિક્રિયા સામે આવી છે. કોમેડિયન કામરાએ માફી માંગવાનો ઇનકાર કર્યા પછી, શિંદેએ કહ્યું કે અભિવ્યક્તિની સ્વતંત્રતા છે; આપણે કટાક્ષ સમજીએ છીએ, પરંતુ તેની એક મર્યાદા હોવી જોઈએ.

કોમેડિયન કુણાલ કામરાની ટિપ્પણી પર નાયબ મુખ્યમંત્રી એકનાથ શિંદેએ કહ્યું કે કોઈની વિરુદ્ધ બોલવા માટે સોપારી લેવા જેવું છે. દરમિયાન, શિવસેનાના કાર્યકરો દ્વારા કરવામાં આવેલી તોડફોડ પર શિંદેએ કહ્યું, “સામેની વ્યક્તિએ પણ ચોક્કસ ધોરણ જાળવવું જોઈએ, નહીં તો કાર્યવાહીની પ્રતિક્રિયા છે.”

મહારાષ્ટ્રના નાયબ મુખ્યમંત્રી એકનાથ શિંદે પર વિવાદાસ્પદ ટિપ્પણી કરનાર કોમેડિયન કુણાલ કામરાની મુસીબતોનો અંત આવવાના કોઈ સંકેત દેખાઈ રહ્યા નથી. હવે મુંબઈ પોલીસે કુણાલ કામરાને સમન્સ મોકલ્યું છે. મુંબઈ પોલીસે કુણાલ કામરાને 11 વાગે પૂછપરછ માટે બોલાવ્યા છે. જોકે, કુણાલ મુંબઈમાં નથી, તેથી સમન્સ કૃણાલના પિતાને સોંપવામાં આવ્યું છે. પોલીસે કુણાલ કામરાને વોટ્સએપ દ્વારા સમન્સ પણ મોકલ્યું હતું અને તેને પૂછપરછ માટે તપાસ અધિકારી સમક્ષ હાજર થવા જણાવ્યું હતું.

ગત રવિવારે અમદાવાદ મુંબઈ બુલેટ ટ્રેન પ્રોજેક્ટની કામગીરી દરમિયાન ક્રેઈન દુર્ઘટના થઈ હતી. અમદાવાદ-મુંબઈ ડાઉન લાઈન પર ક્રેન પડી હતી, જેના કારણે ટ્રેક અને રેલવેના ઓવરહેડ વાયરને નુકસાન થયું હતું. ક્રેન દુર્ઘટનાને પગલે નેશનલ હાઇ સ્પીડ રેલવે કોર્પોરેશન લિમિટેડ (NHSRCL) દ્વારા ક્રેનને ઉતારવાની અને રિપેરિંગની કામગીરી તાત્કાલિક ધોરણે શરૂ કરવામાં આવી હતી. 30 કલાક બાદ બધી મહેનત બાદ અમદાવાદ – મુંબઈ વચ્ચેનો ટ્રેન વ્યવહાર ફરી શરુ થયો છે.

જમ્મુ-કાશ્મીરના કઠુઆમાં સુરક્ષાદળો અને આતંકવાદીઓ વચ્ચે અથડામણ થઈ હતી. હવે સુરક્ષાકર્મીઓએ રવિવારે કઠુઆમાં સુરક્ષા દળો સાથેની અથડામણમાં સામેલ આતંકવાદીઓની શોધ તેજ કરી દીધી છે. સોમવારે જમ્મુ અને કાશ્મીરના પોલીસ મહાનિર્દેશક (ડીજીપી) નલિન પ્રભાત સહિતના ટોચના અધિકારીઓ ગાઢ જંગલોમાં સર્ચ ઓપરેશનમાં જોડાયા હતા. કોઈ પોલીસ વડા માટે આ પ્રકારના ઓપરેશનમાં સામેલ થવું દુર્લભ છે અને એવું માનવામાં આવે છે કે 30 થી વધુ વર્ષોમાં આ પ્રથમ વખત છે જ્યારે જમ્મુ અને કાશ્મીરના ઉચ્ચ પોલીસ અધિકારીએ આવું કર્યું છે.

સ્ટેન્ડ અપ કોમેડિયન કુણાલ કામરા પોતાના નિવેદનોને કારણે ચર્ચામાં છે. તે ફરી એકવાર વિવાદોમાં ફસાઈ છે. તેમણે ગઈ કાલે મહારાષ્ટ્રના નાયબ મુખ્ય પ્રધાન એકનાથ શિંદે પર વિવાદાસ્પદ ટિપ્પણી કરી હતી, જેના પછી ભારે હોબાળો મચી ગયો હતો.

હાસ્ય કલાકારે માત્ર એકનાથ શિંદે પર ટિપ્પણી કરી ન હતી પરંતુ શિવસેના અને ભાજપ પર પણ આકરા પ્રહારો કર્યા હતા. જે બાદ રાજકીય વર્તુળોમાં આ મામલો ગરમાયો હતો. લોકો એક પછી એક પ્રતિક્રિયા આપવા લાગ્યા. જ્યારે શિવસૈનિકોએ તોડફોડ કરી અને કાર્યવાહીની માંગ કરી, વિપક્ષી નેતાઓ કામરા સાથે સંમત થયા. આ હંગામા વચ્ચે કુણાલ કામરાની પહેલી પ્રતિક્રિયા સામે આવી છે. કોમેડિયને માફી માંગવાનો ઈન્કાર કરી દીધો છે.