America Vs Venezuela : અમેરિકા સાથે કોણ છે? વેનેઝુએલાને કોનું સમર્થન છે? સરળ શબ્દોમાં સમજો વૈશ્વિક રાજકારણ

America Attack Venezuela : વેનેઝુએલા પર અમેરિકાના હુમલા બાદ સમગ્ર દુનિયા બે જૂથોમાં વહેંચાયેલી હોય તેવું લાગે છે. એક જૂથ વેનેઝુએલાના સમર્થનમાં મજબૂતીથી ઉભું છે અને રાષ્ટ્રપતિ નિકોલસ માદુરોના અપહરણ કરવાની યુએસની કાર્યવાહીને ખોટી ગણાવી રહ્યું છે. બીજી બાજુ, કેટલાક દેશો એવા છે જે અમેરિકાની આ કાર્યવાહીને ટેકો આપી રહ્યા છે અથવા ન્યાયી ઠેરવી રહ્યા છે.

અહીં અમે આ સમગ્ર મુદ્દાના વૈશ્વિક રાજકારણને સરળ શબ્દોમાં સમજવાનો પ્રયાસ કરી રહ્યા છીએ અને તે જાણવાનો પ્રયાસ કરીશું કે કયા દેશો હાલમાં વેનેઝુએલાની સાથે ઉભા છે અને કોણ અમેરિકી રાષ્ટ્રપતિ ડોનાલ્ડ ટ્રમ્પની કાર્યવાહીની તરફેણમાં દેખાઈ રહ્યા છે.

વેનેઝુએલાના સમર્થનમાં ક્યા દેશો છે?

રશિયાના વિદેશ મંત્રાલયે વેનેઝુએલાના રાષ્ટ્રપતિ નિકોલર માદુરો અને તેમની પત્ની વિરુદ્ધ અમેરિકાની કાર્યવાહીની આકરી ટીકા કરી છે. રશિયાએ સ્પષ્ટપણે કહ્યું છે કે અમેરિકાએ પોતાના નિર્ણય પર ફેરવિચારણા કરવી જોઈએ. મોસ્કો સૂચવે છે કે આ વિવાદને વાતચીત અને કૂટનીતિ દ્વારા ઉકેલવો જોઈએ.

ચીને અમેરિકા પર પણ આકરા પ્રહારો કર્યા છે. ચીને અમેરિકાને સરમુખત્યારશાહી રાજ્ય ગણાવ્યું છે અને કહ્યું કે, વેનેઝુએલા પર હુમલો આંતરરાષ્ટ્રીય કાયદા અને સંયુક્ત રાષ્ટ્રના ચાર્ટરનું ઉલ્લંઘન છે. ચીનના જણાવ્યા અનુસાર, વેનેઝુએલા એક સાર્વભૌમ દેશ છે અને તેના રાષ્ટ્રપતિને આ રીતે અટકાયતમાં રાખવો સંપૂર્ણપણે ખોટું છે.

ક્યુબાના રાષ્ટ્રપતિ મિગુએલ ડિયાઝ-કેનેલે અમેરિકાની કાર્યવાહીને ગુનાહિત હુમલો ગણાવ્યો છે. તેમણે સોશિયલ મીડિયા પર લખ્યું હતું કે, "આ માત્ર વેનેઝુએલા પર જ નહીં, પરંતુ સમગ્ર લેટિન અમેરિકા પર હુમલો છે અને તેને રાજ્ય પ્રાયોજિત આતંકવાદ કહી શકાય છે." ક્યુબાએ પણ આંતરરાષ્ટ્રીય સમુદાયને વેનેઝુએલાની મદદ માટે આગળ આવવાની અપીલ કરી છે. ક્યુબાના વિદેશ પ્રધાન બ્રુનો રોડ્રિગ્ઝે આ કાર્યવાહીને "કાયરતા" ગણાવી હતી.

ઈરાને પણ ખુલ્લેઆમ વેનેઝુએલાને ટેકો આપ્યો છે અને યુએસ હુમલાની કડક નિંદા કરી છે. ઈરાને કહ્યું છે કે કોઈ પણ દેશની સાર્વભૌમત્વ અને પ્રાદેશિક અખંડિતતાનું ઉલ્લંઘન થવું જોઈએ નહીં. તેહરાનના જણાવ્યા અનુસાર, આવી સૈન્ય કાર્યવાહી વૈશ્વિક ધોરણોની વિરુદ્ધ છે અને શાંતિ માટે ગંભીર ખતરો બની શકે છે.

બ્રાઝિલે પણ અમેરિકાના હુમલાની નિંદા કરી છે. બ્રાઝિલના રાષ્ટ્રપતિએ તેને ખૂબ જ ખતરનાક પગલું ગણાવ્યું હતું અને કહ્યું હતું કે કોઈ દેશના રાષ્ટ્રપતિની ધરપકડ કરવી એ મોટી લાલ રેખા પાર કરવા જેવું છે. તેમણે સોશિયલ મીડિયા પર લખ્યું હતું કે, આ કોઈ પણ ભોગે સ્વીકાર્ય નથી અને તેનાથી વેનેઝુએલાનું અપમાન થાય છે તેમજ આંતરરાષ્ટ્રીય સમુદાયને ખોટો સંદેશ જાય છે.

અમેરિકાની કાર્યવાહીને ટેકો આપતા દેશો

આર્જેન્ટિના અને ઇક્વાડોરે યુએસના વલણને ખુલ્લેઆમ સમર્થન આપ્યું છે. આર્જેન્ટિનાના રાષ્ટ્રપતિ જેવિયર મિલેઇ એ એક ડગલું આગળ વધીને તેને "આઝાદી ઝિંદાબાદ" ગણાવ્યું હતું. ઇક્વાડોરના રાષ્ટ્રપતિએ પણ એક નિવેદન આપતા કહ્યું હતું કે હવે ગુનેગારોનું સામ્રાજ્ય લાંબો સમય ટકી શકશે નહીં.

આ પણ વાંચો | વેનેઝુએલા પછી અમેરિકા કયા દેશ પર કબજો કરશે? ડોનાલ્ડ ટ્રમ્પના સહયોગીએ આપ્યો સંકેત

ઇટાલીના વડા પ્રધાન જ્યોર્જિયા મેલોનીએ આ મુદ્દે મિશ્ર પ્રતિક્રિયા આપી છે. તેમણે સોશિયલ મીડિયા પર લખ્યું હતું કે, ઇટાલીએ ક્યારેય માદુરોની ચૂંટણી જીતને માન્યતા આપી નથી અને તેઓ તેમના શાસનની ટીકા કરી રહ્યા છે. જો કે, તે એમ પણ કહે છે કે લશ્કરી કાર્યવાહી હંમેશાં ખોટા કામને દૂર કરવાની યોગ્ય રીત નથી.