PHOTOS : ગાંધીનગર અક્ષરધામ 10,000 દીવડાથી જગમગી ઉઠ્યું, 31 વર્ષથી દીવડાનો પરંપરાગત અલૌકીક દિપાવલી ઉત્સવ

Gandhinagar Akshardham Diwali Deepotsav 2023 : ગાંધીનગર સ્વામિનારાયણ અક્ષરધામ મંદિર ખાતે 10,000 દીવડાઓનો અલૌકીક ઉત્સવ શરૂ કરવામાં આવ્યો. ગાંધીનગર અક્ષરધામ ખાતે આવતીકાલ દિવાળીથી તમામ દર્શનાર્થીઓ આ દિપાવલીના નયન રમ્ય દિવાથી જગમગ અક્ષરધામના દર્શનનો લાભ લઈ શકશે.

સ્વામી નારાયણ સંતે કહ્યું, દીપાવલી - અજ્ઞાનરૂપ અંધકારમાંથી જ્ઞાનરૂપ પ્રકાશ પ્રાપ્ત કરવાનો અલૌકિક ઉત્સવ. તમને જણાવી દઈએ કે, ગાંધીનગર સ્વામિનારાયણ અક્ષરધામ આ ઉત્સવ સતત 31 વર્ષથી પરંપરાગત શૈલીથી 10,000 દીવડાઓ પ્રગટાવી મનાવે છે.

અક્ષરધામ પ્રત્યેક મનુષ્યને જીવનમાં સદાચાર - સંયમ - સત્ય - દયા - અહિંસા - અસ્તેય - ધર્મ - જ્ઞાન - વૈરાગ્ય - ભગવાનની મહિમાએ સહિત ભક્તિ જેવા અગણિત દીવડાઓ પ્રગટાવી જીવનને દિવ્ય બનાવવાનો સંદેશ આપી રહ્યું છે.

અક્ષરધામ સંસ્થા દ્વારા જણાવવામાં આવ્યું છે કે, આ વર્ષે પણ દીપાવલીના આ અલૌકિક પર્વે દર્શનાર્થીઓ રવિવાર, તા. 12-11-2023 થી રવિવાર, તા. 19-11-2023 સુધી દરરોજ સાંજે 6.00 થી 7.45 દરમિયાન નયનરમ્ય દીવડાઓ તેમજ ગ્લો ગાર્ડનથી આલોકિત અક્ષરધામ દર્શનનો આસ્વાદ માણી શકશે. સોમવાર, તા. 13-11-2023 ના રોજ પ્રદર્શન ખંડો, વોટર શો સહિત અક્ષરધામના તમામ આકર્ષણો ખુલ્લાં રહેશે.

ઉલ્લેખનીય છે કે, દેશ-વિદેશના તમામ બીએપીએસ સ્વામિનારાયણ મંદિરોમાં દીપોત્સવ પર્વની ઉજવણીનું ધામધૂમપૂર્વક આયોજન કરવામાં આવે છે. આ શૃંખલામાં બીએપીએસ સ્વામિનારાયણ મંદિર - અમદાવાદ ખાતે આ વર્ષે દિવાળી, અન્નકૂટ અને નૂતનવર્ષે અનેકવિધ કાર્યક્રમોનું આયોજન કરવામાં આવ્યું છે. આ સિવાય પારિવારિક, સામાજિક અને આધ્યાત્મિક મૂલ્યોને ઉજાગર કરતું "સનાતન સંસ્કૃતિ દર્શન" નામક સુંદર પ્રદર્શનનું આયોજન પણ કરવામાં આવ્યું છે.

બીએપીએસ મંદિરોના દિવાળીના તહેવારોના કાર્યક્રમની વિગત આપતા કહેવામાં આવ્યું છે કે…
દિવાળી - ચોપડાપૂજન
તારીખ - 12/11/23
વાર - રવિવાર
સમય - સાંજે 5.30 થી 7.30
અન્નકૂટોત્સવ તેમજ "સનાતન સંસ્કૃતિ દર્શન" પ્રદર્શન
તારીખ - 13/11/2023
વાર - સોમવાર
સમય - સવારે 10.30 થી સાંજે 07.00
નૂતન વર્ષ - મહાપૂજા
તારીખ - 14/11/2023
વાર - મંગળવાર
સમય - સવારે 8.00 થી 10.00