એસોસિએશન ફોર ડેમોક્રેટિક રિફોર્મ્સ (ADR)- જે રાજકીય પાર્ટીના ચૂંટણી ખર્ચ, રાજકીય પક્ષોને ફંડિંગ, ગુનાહિત ઇતિહાસ અને નેતાઓની સંપત્તિ પર નજર રાખે છે, તેણે એક રિપોર્ટ જાહેર કર્યો છે.ADRના રિપોર્ટ અનુસાર દેશના વર્તમાન 30 મુખ્યમંત્રીઓમાંથી 29 કરોડપતિ છે.ADRએ મુખ્યમંત્રીની કુલ જાહેર કરેલી સંપત્તિના આધારે આ રિપોર્ટ જારી કર્યો છે. દેશભરના મુખ્યમંત્રીઓની સરેરાશ સંપત્તિ 33.96 કરોડ રૂપિયા હોવાનું કહેવાય છે.આંધ્રપ્રદેશના મુખ્યમંત્રી જગન મોહન રેડ્ડી દેશના સૌથી અમીર મુખ્યમંત્રી છે.પશ્ચિમ બંગાળના મુખ્યમંત્રી મમતા બેનર્જી સૌથી ઓછી સંપત્તિ ધરાવતા મુખ્યમંત્રી છે.સૌથી વધુ સંપત્તિ ધરાવતા ટોચના ત્રણ મુખ્ય પ્રધાનોમાં આંધ્ર પ્રદેશના જગન મોહન રેડ્ડી, અરુણાચલ પ્રદેશના પેમા ખાંડુ અને ઓડિશાના નવીન પટનાયકનો સમાવેશ થાય છે.ADRની અનુસાર, જગન મોહનની કુલ સંપત્તિ 510 કરોડ રૂપિયાથી વધુ છે.અરુણાચલના મુખ્યમંત્રી પેમા ખાંડુ આ યાદીમાં બીજા ક્રમે છે. તેમની પાસે 163 કરોડથી વધુની સંપત્તિ છે.સૌથી અમીર મુખ્યમંત્રીઓની યાદીમાં નવીન પટનાયક ત્રીજા સ્થાને છે અને તેમની સંપત્તિ 63 કરોડ રૂપિયાથી વધુ છે.ADRના રિપોર્ટ અનુસાર દેશના આઠ રાજ્યોના મુખ્યમંત્રીઓની સંપત્તિ 10 કરોડથી 50 કરોડ રૂપિયાની વચ્ચે છે. જ્યારે 18 મુખ્યમંત્રીઓની સંપત્તિ એક કરોડથી 10 કરોડની વચ્ચે છે. માત્ર એક મુખ્યમંત્રીની સંપત્તિ 1 કરોડથી ઓછી હોવાનો ઉલ્લેખ કરવામાં આવ્યો છે.પશ્ચિમ બંગાળના મુખ્યમંત્રી મમતા બેનર્જીનું નામ સૌથી ઓછી સંપત્તિ ધરાવતા મુખ્યમંત્રીઓમાં સામેલ છે. તેમની કુલ સંપત્તિ 15 લાખ 38 હજાર રૂપિયાથી વધુ છે.કેરળના મુખ્યમંત્રી પિનરાઈ વિજયન સૌથી ઓછા અમીર મુખ્યમંત્રીઓની યાદીમાં બીજા ક્રમે છે. તેમની કુલ સંપત્તિ 1 કરોડ 18 લાખ છે.