BCCI પૂર્વ અધ્યક્ષ ઈન્દ્રજીત સિંહ બિન્દ્રાનું નિધન, 84 વર્ષની વયે અંતિમ શ્વાસ લીધા, આજે અંતિમ સંસ્કાર થશે

BCCI Former President Inderjit Singh Bindra Death: ભારતીય ક્રિકેટ કંટ્રોલ બોર્ડ (બીસીસીઆઈ)ના પૂર્વ અધ્યક્ષ ઈન્દ્રજીત સિંહ બિન્દ્રાનું 84 વર્ષની વયે નિધન થયું છે. તેમણે દિલ્હી સ્થિત તેમના નિવાસસ્થાને અંતિમ શ્વાસ લીધા હતા. તેઓ લાંબા સમયથી બીમાર હતા. રવિવારે બપોર પછી તેમની હાલત વધુ ખરાબ થઇ હતી અને સાંજે 6.30 વાગ્યે તેમણે અંતિમ શ્વાસ લીધા હતા. સોમવારે બપોરે લોધી સ્મશાનગૃહમાં તેમના અંતિમ સંસ્કાર કરવામાં આવશે.

1993 થી 1996 સુધી BCCI અધ્યક્ષ રહ્યા

અનુભવી પ્રશાસક અને ભારતીય ક્રિકેટના વિકાસમાં મહત્વની ભૂમિકા ભજવનાર આઇએસ બિન્દ્રા 1993 થી 1996 દરમિયાન બીસીસીઆઇના પ્રમુખ હતા. તેમણે 1978 થી 2014 વચ્ચે 36 વર્ષ સુધી પંજાબ ક્રિકેટ એસોસિએશનના વડા તરીકે પણ સેવા આપી હતી. આ જવાબદારી બાદ જ તેઓ ક્રિકેટ એડમિનિસ્ટ્રેશન માંથી નિવૃત્ત થયા હતા. તેમણે મોહાલીના પીસીએ સ્ટેડિયમના વિકાસમાં મહત્વની ભૂમિકા ભજવી હતી. આ કારણોસર મોહાલીના સ્ટેડિયમનું નામ તેમના નામ પર રાખવામાં આવ્યું હતું.

1987 વર્લ્ડ કપની યજમાની તેમની આગેવાનીથી જ મળી

આઈએસ બિન્દ્રાએ આંતરરાષ્ટ્રીય ક્રિકેટમાં ભારતનું યોગદાન વધારવામાં મહત્વની ભૂમિકા ભજવી હતી. 1987 વર્લ્ડ કપની યજમાની ભારત અને પાકિસ્તાને સંયુક્ત રીતે કરી હતી. આઈએસ બિન્દ્રાએ ભારતને આ વર્લ્ડ કપના હોસ્ટિંગ રાઈટ્સ અપાવવામાં મહત્વની ભૂમિકા ભજવી હતી. આ પહેલીવાર હતું જ્યારે આ ટુર્નામેન્ટ ઇંગ્લેન્ડની બહાર યોજાઈ હતી.

ક્રિકેટ બ્રોડકાસ્ટિંગને લગતી અરજી દાખલ

1994 માં, બિન્દ્રાએ સુપ્રીમ કોર્ટમાં એક અરજી દાખલ કરી હતી જેણે ક્રિકેટ પ્રસારણ પર દૂરદર્શનની એકાધિકારને સમાપ્ત કરવા માટે કામ કર્યું હતું. બિન્દ્રાનો પ્રયાસ એક વળાંક સાબિત થયો. અનુકૂળ નિર્ણયથી તેમના જૂથને વૈશ્વિક પ્રસારણકર્તાઓ લાવવામાં અને ભારતને રમતગમતનું સૌથી મોટું ટેલિવિઝન બજાર બનાવવામાં મદદ મળી.

BCCI એ બિન્દ્રાના નિધન પર શોક વ્યક્ત કર્યો

આઈએસ બિન્દ્રાના નિધન પર શોક વ્યક્ત કરતા બીસીસીઆઈએ લખ્યું, "BCCI બીસીસીઆઈના પૂર્વ અધ્યક્ષ આઈએસ બિન્દ્રાના નિધન પર શોક વ્યક્ત કરે છે. બોર્ડની પ્રાર્થના તેમના પરિવાર અને પ્રિયજનો સાથે છે. ”

The BCCI mourns the passing of former BCCI President - Mr IS Bindra. 🙏

The Board's thoughts and prayers are with his family and loved ones. pic.twitter.com/boNAhwNSnL

— BCCI (@BCCI) January 25, 2026

આઈસીસીના અધ્યક્ષ અને બીસીસીઆઈના પૂર્વ સચિવ જય શાહે પણ આઈએસ બિન્દ્રાને શ્રદ્ધાંજલિ આપી છે. તેમણે કહ્યું કે, "બીસીસીઆઈના પૂર્વ અધ્યક્ષ અને ભારતીય ક્રિકેટ પ્રશાસનની મહત્વપૂર્ણ વ્યક્તિ શ્રી આઈએસ બિન્દ્રાના નિધનથી ખૂબ દુઃખ થયું છે. તેમનો વારસો આવનારી પેઢીઓને પ્રેરણા આપે. ઓમ શાંતિ. ”