Suresh Raina – Shikhar Dhawan : એન્ફોર્સમેન્ટ ડિરેક્ટોરેટે કથિત ગેરકાયદેસર સટ્ટાબાજીની સાઇટના સંચાલન સાથે સંબંધિત મની લોન્ડ્રિંગની તપાસના ભાગરૂપે ભારતના ભૂતપૂર્વ ક્રિકેટર સુરેશ રૈના અને શિખર ધવનની 11.14 કરોડ રૂપિયાની સંપત્તિ જપ્ત કરી છે. પીટીઆઈએ સત્તાવાર સૂત્રોને ટાંકીને ગુરુવારે આ માહિતી આપી હતી.
ઇડીના સૂત્રોએ જણાવ્યું હતું કે ઓનલાઇન સટ્ટાબાજી સાઇટ 1xBet સામેના કેસમાં ધવનની 4.5 કરોડ રૂપિયાની સ્થાવર સંપત્તિ અને રૈનાના 6.64 કરોડ રૂપિયાના મ્યુચ્યુઅલ ફંડને પ્રિવેન્શન ઓફ મની લોન્ડરિંગ એક્ટ (પીએમએલએ) હેઠળ જપ્ત કરવાનો પ્રોવિઝનલ ઓર્ડર જારી કરવામાં આવ્યો છે.
રૈના અને ધવને જાણી જોઈને કરાર કર્યા હતા
ઇડીની તપાસમાં જાણવા મળ્યું છે કે રૈના અને ધવને જાણી જોઈને 1xBet ના પ્રમોશન માટે વિદેશી સંસ્થાઓ સાથે જાહેરાત કરાર કર્યા હતા. આ બંને સિવાય ઇડીએ અન્ય બે પૂર્વ ક્રિકેટરો યુવરાજ સિંહ અને રોબિન ઉથપ્પાની સાથે અભિનેતા સોનુ સૂદ, ઉર્વશી રૌતેલા, મિમી ચક્રવર્તી (તૃણમૂલ કોંગ્રેસના પૂર્વ સાંસદ) અને અંકુશ હાઝરા (બંગાળી અભિનેતા)ની પણ પૂછપરછ કરી છે.
અનેક રાજ્યોમાં કેસ નોંધાયા
કાયદેસરની જાહેરાતની આવક હોવાનું જણાય તે માટે આ ભંડોળ અનેક વિદેશી વચેટિયાઓ દ્વારા ભારતીય ખાતાઓમાં મોકલવામાં આવ્યું હતું. આ તપાસ 1xBet ના ઓપરેટરો વિરુદ્ધ વિવિધ રાજ્ય પોલીસ એજન્સીઓ દ્વારા દાખલ કરવામાં આવેલી અનેક એફઆઈઆર પર આધારિત છે. તપાસમાં બહાર આવ્યું છે કે કંપની હજારો ગેરકાયદેસર ખાતાઓ અને ચકાસાયેલ ચુકવણી ગેટવે દ્વારા ભારતીય વપરાશકર્તાઓને ઓનલાઇન સટ્ટાબાજીની સુવિધા આપી રહી હતી.
આ પણ વાંચો – મહિલા વર્લ્ડ કપ વિજેતા ભારતીય ટીમને ટાટા મોટર્સની ભેટ, દરેક ખેલાડીને મળશે આ લક્ઝરી કાર
6 હજારથી વધુ ફેક એકાઉન્ટ્સનો ઉપયોગ
એજન્સીના જણાવ્યા અનુસાર ભારતીય યુઝર્સ પાસેથી ડિપોઝિટ એકત્રિત કરવા માટે 6,000 થી વધુ ફેક એકાઉન્ટનો ઉપયોગ કરવામાં આવ્યો હતો. ત્યારબાદ આ નાણાં સાથે અનેક સ્તરની લેવડદેવડ થઈ હતી. જેથી તે કાયદેસર લાગે છે. ઇડીએ કહ્યું કે ભંડોળની હિલચાલ અને નકલી બિઝનેસ પ્રોફાઇલ્સ 1,000 કરોડ રૂપિયાથી વધુની મની લોન્ડરિંગનો સંકેત આપે છે. તાજેતરમાં ચાર પેમેન્ટ ગેટવે પર સર્ચ ઓપરેશન હાથ ધરવામાં આવ્યું હતું, જેના પરિણામે 4 કરોડ રુપિયાથી વધારાની ધન રાશિ અને 60 બેંક ખાતાઓ ફ્રીઝ કરવામાં આવ્યા છે. આ શોધખોળમાં ગેરકાયદેસર વ્યવહારો સંબંધિત ગુનાહિત દસ્તાવેજો અને ડિજિટલ પુરાવાઓ પણ મળી આવ્યા હતા.
