India vs Bangladesh 2nd Test Day 4 Score, ભારત વિ. બાંગ્લાદેશ બીજી ટેસ્ટ સ્કોર : ભારતે બાંગ્લાદેશ સામેની બીજી ટેસ્ટના ચોથા દિવસે પકડ મજબૂત બનાવી લીધી છે. ચોથા દિવસના અંતે બાંગ્લાદેશે બીજા દાવમાં 26 રનમાં 2 વિકેટ ગુમાવી દીધી છે. બાંગ્લાદેશ હજુ લીડથી 26 રન પાછળ છે અને તેની 8 વિકેટો બાકી છે. દિવસના અંતે શદનામ ઇસ્લામ 7 અને મોમિનુલ હક 00 રને રમતમાં છે. બન્ને વિકેટ અશ્વિને ઝડપી છે. આ પહેલા ભારતે પ્રથમ દાવમાં 34.4 ઓવરમાં 9 વિકેટે 285 રન બનાવી દાવ ડિકલેર કર્યો હતો. ભારતને પ્રથમ ઇનિંગ્સમાં 52 રનની લીડ મળી હતી.
યશસ્વી જયસ્વાલ-કેએલ રાહુલની અડધી સદી
ભારત તરફથી યશસ્વી જયસ્વાલે 51 બોલમાં 12 ફોર 2 સિક્સર સાથે 72 રન બનાવ્યા હતા. કેએલ રાહુલે 43 બોલમાં 7 ફોર 2 સિક્સર સાથે 68 રન બનાવ્યા હતા. આ સિવાય રોહિત શર્માએ 23, શુભમન ગિલે 39, વિરાટ કોહલીએ 47 રન બનાવ્યા હતા.
ભારતે 24.4 ઓવરમાં 200 રન બનાવી રેકોર્ડ બનાવ્યો
ભારતીય ક્રિકેટ ટીમે 148 બોલ (24.4 ઓવર)માં 200 રનનો આંકડો સ્પર્શ કર્યો હતો. આ ટેસ્ટ મેચમાં કોઈપણ ટીમ દ્વારા સૌથી ઝડપી 200 રન બનાવવાનો રેકોર્ડ છે. આ સાથે ભારતે 2017માં સિડનીમાં પાકિસ્તાન સામે ઓસ્ટ્રેલિયા દ્વારા બનાવેલા રેકોર્ડને પાછળ છોડી દીધો છે. તે સમયે ઓસ્ટ્રેલિયાએ 28.1 ઓવર (બીજી ઇનિંગ્સ)માં 200 રનનો આંકડો વટાવી લીધો હતો.
આ પણ વાંચો – બીજી ટેસ્ટ : ટીમ ઇન્ડિયાએ ટેસ્ટમાં સૌથી ફાસ્ટેસ્ટ અડધી સદી અને સદીનો રેકોર્ડ બનાવ્યો
મોમિનુલ હકના અણનમ 107 રન
પ્રથમ દાવમાં બાંગ્લાદેશે 233 રન બનાવ્યા હતા. જેમાં મોમિનુલ હકે અણનમ 107 રન બનાવ્યા હતા. નઝમુલ હસન શાંતોએ 31, શાદમાન ઇસ્લામે 24 અને મેહદી હસન મિરાજે 20 રન બનાવ્યા હતા. ભારત તરફથી જસપ્રીત બુમરાહે 3 વિકેટ ઝડપી હતી. આકાશદીપ, મોહમ્મદ સિરાજ અને રવિચંદ્રન અશ્વિને 2-2 વિકેટ લીધી હતી. રવિન્દ્ર જાડેજાએ 1 વિકેટ લીધી હતી આ સાથે તેણે ટેસ્ટ ક્રિકેટમાં 300 વિકેટ પૂરી કરી હતી.
