ફાસ્ટ બોલર મોહમ્મદ શમી આઈપીએલ 2024માંથી બહાર, ગુજરાત ટાઇટન્સને ફટકો

IPL 2024 : આઈપીએલ 2024 પહેલા ગુજરાત ટાઇટન્સને મોટો ફટકો પડ્યો છે. ભારતનો ફાસ્ટ બોલર મોહમ્મદ શમી ડાબા પગની ઘૂંટણમાં થયેલી ઈજાના કારણે ઈન્ડિયન પ્રીમિયર લીગ (આઈપીએલ) 2024માંથી બહાર થઈ ગયો છે. આ માટે તે બ્રિટનમાં સર્જરી કરાવશે. ન્યૂઝ એજન્સી પીટીઆઈએ બીસીસીઆઈના એક સૂત્રને ટાંકીને આ માહિતી આપી છે. 33 વર્ષીય મોહમ્મદ શમી ઈંગ્લેન્ડ સામે ચાલી રહેલી ટેસ્ટ શ્રેણીનો ભાગ નથી. તે છેલ્લે નવેમ્બર 2023માં ઓસ્ટ્રેલિયા સામેની વન ડે વર્લ્ડ કપની ફાઈનલમાં ભારત તરફથી રમ્યો હતો.

શમી આઈપીએલ 2024 નહીં રમી શકે

બીસીસીઆઈના એક સૂત્રએ નામ ન આપવાની શરતે કહ્યું હતું કે શમી જાન્યુઆરીના છેલ્લા અઠવાડિયામાં પગના ઘૂંટણનું વિશેષ ઇન્જેક્શન લેવા માટે લંડનમાં હતો. તેને કહેવામાં આવ્યું છે કે તે ત્રણ અઠવાડિયા પછી લાઇટ રન શરૂ કરી શકે છે અને આ પછી તેને લઈ શકે છે. પરંતુ ઇન્જેક્શન કામ કરતું નથી અને હવે એકમાત્ર વિકલ્પ સર્જરી છે. તે ટૂંક સમયમાં જ સર્જરી માટે ઇંગ્લેન્ડ જવા રવાના થશે. આવી સ્થિતિમાં આઈપીએલ 2024 માં રમવાનો પ્રશ્ન ઉભો થતો નથી.

આ પણ વાંચો - આઈપીએલ 2024ની સિઝન 22 માર્ચથી શરૂ થશે, લોકસભાની ચૂંટણી વચ્ચે દેશમાં જ રમાશે મેચો

શમીને દર્દ હોવા છતા આઈસીસી વનડે વર્લ્ડ કપ 2023માં રમ્યો હતો

શમીને દર્દ હોવા છતા આઈસીસી વનડે વર્લ્ડ કપ 2023માં રમ્યો હતો. તેને તેના લેન્ડિંગમાં સમસ્યા થઈ રહી હતી, પરંતુ તેણે તેના પ્રદર્શન પર તેની અસર થવા દીધી ન હતી. શમીએ વર્લ્ડ કપ 2023માં 24 વિકેટ ઝડપી હતી. હાલમાં જ શમીને અર્જુન એવોર્ડથી સન્માનિત કરવામાં આવ્યો છે. શમીએ એક દશકની લાંબી કારકિર્દીમાં અત્યાર સુધીમાં 229 ટેસ્ટ, 195 વન ડે અને 24 ટી-20 વિકેટ ઝડપી છે.

શમી 2013થી આઇપીએલમાં રમી રહ્યો છે

શમી 2013થી આઇપીએલમાં રમી રહ્યો છે, પરંતુ વર્ષ 2022માં જ્યારે ટીમે આ લીગમાં પ્રવેશ કર્યો ત્યારે તે ગુજરાત ટાઇટન્સ સાથે જોડાયો હતો. વર્ષ 2022માં આ ટીમ હાર્દિક પંડ્યાની કેપ્ટનશિપમાં ચેમ્પિયન બની હતી અને વર્ષ 2023માં આ ટીમ રનર્સ અપ રહી હતી. શમીની બોલિંગ આ બંને સિઝનમાં ઘણી સારી રહી હતી અને વર્ષ 2022માં જ્યાં તેણે 16 મેચમાં 20 વિકેટ ઝડપી હતી. જ્યારે તેણે 2023માં રમાયેલી 17 મેચમાં 28 વિકેટ ઝડપી હતી. તેણે આઈપીએલમાં રમાયેલી 110 મેચમાં કુલ 123 વિકેટ ઝડપી છે.