IPL Flashback KKR vs RR : આઈપીએલ 2024ની 31મી મેચમાં કોલકાતા નાઇટ રાઇડર્સ અને રાજસ્થાન રોયલ્સ વચ્ચે મુકાબલો થશે. આ મેચ 16 એપ્રિલના રોજ સાંજે 7.30 કલાકે કોલકાતાના ઇડન ગાર્ડન્સ સ્ટેડિયમમાં રમાશે. રાજસ્થાન રોયલ્સ આ સિઝનમાં 6 મેચ રમ્યું છે. જેમાં 5 મેચમાં વિજય મેળવ્યો છે અને 1 મેચમાં પરાજય થયો છે. બીજી તરફ કોલકાતા નાઇટ રાઇડર્સનો 5 મેચમાંથી 4 માં વિજય થયો છે અને 1 મેચમાં પરાજય થયો છે. આઈપીએલમાં કોલકાતા અને રાજસ્થાન વચ્ચે રમાયેલા અત્યાર સુધીના મુકાબલાની વાત કરવામાં આવે તો બન્ને ટીમનું સમાન પ્રભુત્વ જોવા મળે છે.
રાજસ્થાન રોયલ્સ અને કોલકાતા નાઇટ રાઇડર્સ હેડ ટુ હેડ
આઈપીએલમાં રાજસ્થાન અને કોલકાતા વચ્ચે અત્યાર સુધીમાં 28 મેચો રમાઇ છે. જેમાં 14 મેચમાં કોલકાતાનો વિજય થયો છે અને 13 મેચમાં રાજસ્થાનનો વિજય થયો છે. એક મેચ રદ થઇ હતી. બન્ને વચ્ચેના મુકાબલામાં કોલકાતાનો હાઈએસ્ટ સ્કોર 210 અને લોએસ્ટ સ્કોર 125 રન છે. જ્યારે રાજસ્થાનનો હાઇએસ્ટ સ્કોર 217 અને લોએસ્ટ સ્કોર 81 રન છે. 2023ની સિઝનમાં બન્ને વચ્ચે એક મેચ રમાઇ હતી. જેમાં રાજસ્થાનનો વિજય થયો હતો.
આ પણ વાંચો – સનરાઇઝર્સ હૈદરાબાદે 20 ઓવરમાં 287 રન બનાવ્યા, આઈપીએલમાં પોતાનો જ હાઇએસ્ટ સ્કોરનો રેકોર્ડ તોડ્યો
હોમગ્રાઉન્ડમાં રાજસ્થાન અને કોલકાતાનો રેકોર્ડ
કોલકાતા નાઇટ રાઇડર્સના હોમગ્રાઉન્ડ ઇડન ગાર્ડન્સ સ્ટેડિયમમાં બન્ને ટીમોના રેકોર્ડની વાત કરવામાં આવે તો આ મેદાનમાં બન્ને વચ્ચે 10 મેચો રમાઇ છે. જેમાં 6 મેચમાં કોલકાતાનો અને 3 મેચમાં રાજસ્થાનનો વિજય થયો છે. એક મેચ રદ થઇ હતી. બીજી તરફ રાજસ્થાનના હોમગ્રાઉન્ડ સવાઇ માનસિંહ સ્ટેડિયમની વાત કરવામાં આવે તો બન્ને વચ્ચે 6 મેચ રમાઇ છે. જેમાં રાજસ્થાનનો 3 મેચમાં અને કોલકાતાનો 3 મેચમાં વિજય થયો છે.
તટસ્થ સ્થળની વાત કરવામાં આવે તો રાજસ્થાન અને કોલકાતા વચ્ચે 12 મેચો રમાઇ છે. જેમાં 5 મેચમાં કોલકાતાનો અને 7 મેચમાં રાજસ્થાનનો વિજય થયો છે.
