પાકિસ્તાન ક્રિકેટના કંગાળ દિવસ, 1 લાખ રૂપિયાથી સીધી 10 હજાર થઇ મેચ ફી, સસ્તી હોટલમાં રોકાશે ખેલાડી

Pakistan Cricket : પાકિસ્તાન ક્રિકેટ બોર્ડે (પીસીબી) ડોમેસ્ટિક ક્રિકેટમાં ખર્ચમાં કાપ મૂકવાનો નિર્ણય લીધો છે, જેમાં ખેલાડીઓની મેચ ફીમાં કાપ મૂકવાનો પણ સમાવેશ થાય છે, જેના કારણે પીસીબીની આર્થિક સ્થિતિ સામે પ્રશ્નાર્થ સર્જાયો છે. પાકિસ્તાન ક્રિકેટ બોર્ડે નેશનલ ટી-20 ચેમ્પિયનશિપમાં ભાગ લેનારા ક્રિકેટરોની મેચ ફી પ્રતિ મેચ 1,00,000 રૂપિયાથી ઘટાડીને 10,000 રૂપિયા પ્રતિ મેચ કરી દીધી છે.

રિઝર્વ પ્લેયર્સને મેચ દીઠ 5000 રૂપિયા મળશે. આ ટૂર્નામેન્ટ 14 માર્ચથી શરૂ થશે. મેચ ફીમાં ઘટાડાને કારણે ખેલાડીઓમાં ચિંતાનો માહોલ સર્જાયો છે. બોર્ડ ડોમેસ્ટિક ક્રિકેટના વિકાસ પાછળ ઓછો ખર્ચ કરવા અંગે પણ વિચારણા કરી રહ્યું છે.

ન્યૂઝ એજન્સી પીટીઆઈએ સૂત્રોને ટાંકીને જણાવ્યું છે કે પીસીબીમાં ડોમેસ્ટિક ક્રિકેટના વડા અબ્દુલ્લા ખુર્રમ નિયાજી છેલ્લા કેટલાક મહિનાઓથી ઘરેલુ ખેલાડીઓ માટે સુવિધાઓમાં કાપ મુકી રહ્યા છે. સૂત્રએ કહ્યું કે જે ખેલાડીઓને પહેલા ફાઇવ સ્ટાર અને ફોર સ્ટાર હોટલોમાં રહેવાની સગવડ આપવામાં આવતી હતી તેમને હવે સસ્તી સુવિધા આપવામાં આવી રહી છે. તેમના માટે ફી ઉપરાંત હવાઈ મુસાફરીની કિંમતમાં પણ ઘટાડો કરવામાં આવ્યો છે.

ખેલાડીઓ અને અમ્પાયરોને ગત સિઝનની બાકી નીકળતી રકમ ચૂકવવાની બાકી છે

અન્ય એક સૂત્રએ જણાવ્યું હતું કે ખેલાડીઓ અને અમ્પાયરોને અગાઉની સિઝન માટે બાકી નીકળતી રકમ ચૂકવવાની બાકી છે. વધુમાં પીસીબીએ હજુ સુધી બોર્ડની નીતિ અનુસાર ભૂતપૂર્વ ટેસ્ટ ક્રિકેટરો માટે વાર્ષિક પેન્શનમાં વધારો કરવાનો અમલ કર્યો નથી. એક સૂત્રએ જણાવ્યું હતું કે વક્રોક્તિ એ છે કે જ્યારે ખેલાડીઓની મેચ ફીમાં ઘટાડો કરવામાં આવી રહ્યો છે, ત્યારે આ નિર્ણયો લેનારા અધિકારીઓને માસિક પગાર લાખોમાં મળી રહ્યો છે.

મિસ્બાહ-વકારને દર મહિને 50 લાખ રૂપિયા આપવામાં આવી રહ્યા છે

પીસીબી રાષ્ટ્રીય પસંદગીકારો અને તાજેતરમાં સમાપ્ત થયેલા ચેમ્પિયન્સ કપ માટે નિયુક્ત મેન્ટર્સને ઘણો માસિક પગાર ચૂકવી રહ્યું છે. મેન્ટર મિસ્બાહ ઉલ હક, વકાર યુનુસ, શોએબ મલિક, સરફરાઝ અહમદ અને સકલીન મુસ્તાકને બે વર્ષના કોન્ટ્રાક્ટ પર દર મહિને આશરે રુપિયા 50 લાખ ચૂકવવામાં આવે છે. પીસીબીએ ચેમ્પિયન્સ ટ્રોફી માટે લાહોરના ગદ્દાફી સ્ટેડિયમ, કરાચીના નેશનલ સ્ટેડિયમ અને રાવલપિંડી ક્રિકેટ સ્ટેડિયમને અપગ્રેડ કરવા માટે પણ આશરે 1.8 અબજ રૂપિયાનો ખર્ચ કર્યો છે.