Olympics Games : ભારત 2036માં ઓલિમ્પિક ગેમ્સની યજમાની કરવા આતુર, 140 ભારતીયોનું સપનું છે : પીએમ નરેન્દ્ર મોદી

PM Narendra Modi Say India Bids Olympics Games 2036 : વર્લ્ડ કપ 2023 ક્રિકેટ મેટ ટુર્નામેન્ટ બાદ હવે ઓલિમ્પિક ગેમ્સનું આયોજન કરવાનું સ્વપ્ન ભારત જોઇ રહ્યુ છે. વડા પ્રધાન નરેન્દ્ર મોદીએ શનિવારે કહ્યું હતું કે ભારતમાં 2036 ઓલિમ્પિકનું આયોજન કરવાના પ્રયાસોમાં ભારત કોઈ કસર છોડશે નહીં કારણ કે તે 140 કરોડ ભારતીયોનું સ્વપ્ન છે. મુંબઈમાં ઈન્ટરનેશનલ ઓલિમ્પિક કમિટીના સત્રનું ઉદ્ઘાટન કરતી વખતે વડાપ્રધાન મોદીએ કહ્યું, 'હું તમારી સમક્ષ 140 કરોડ ભારતીયોની ભાવનાઓ રજૂઆત કરવા માંગુ છું. ભારત તેની ધરતી પર 2036 ઓલિમ્પિકનું આયોજન કરવાના તેના પ્રયાસોમાં કોઈ કસર છોડશે નહીં.

તેમણે કહ્યું, 'આ 140 કરોડ ભારતીયોનું સ્વપ્ન અને આકાંક્ષા છે. અમે તમારા સહયોગથી આ સપનું પૂરું કરવા માંગીએ છીએ. આ પહેલા ભારત 2029માં યોજાનારી યુથ ઓલિમ્પિકની યજમાની કરવા પણ ઉત્સુક છે. વડાપ્રધાન મોદીએ કહ્યું, 'મને વિશ્વાસ છે કે ભારતને IOC તરફથી સતત સમર્થન મળતું રહેશે. ભારત મોટા પાયે વૈશ્વિક કાર્યક્રમનું આયોજન કરવા તૈયાર છે. જી-20 યજમાની દરમિયાન દુનિયાએ આ જોયું છે.

ભારતમાં IOC સેશન યોજવું એ અમારા માટે ગર્વની વાત છે: PM મોદી

તેમણે વધુમાં કહ્યું કે, 'ભારતમાં આંતરરાષ્ટ્રીય ઓલિમ્પિક સમિતિનું 141મું સત્ર યોજવું ખૂબ જ ખાસ છે. 40 વર્ષ પછી ભારતમાં IOC સેશનનું આયોજન કરવું અમારા માટે ખૂબ જ ગર્વની વાત છે. તેમણે કહ્યું, 'વર્ષોથી, ભારતે તમામ પ્રકારની વૈશ્વિક રમતગમત ટૂર્નામેન્ટનું આયોજન કરવાની ક્ષમતા સાબિત કરી છે. અમે તાજેતરમાં ચેસ ઓલિમ્પિયાડનું આયોજન કર્યું હતું જેમાં વિશ્વના 186 દેશોએ ભાગ લીધો હતો. અમે મહિલા ફૂટબોલ અંડર-17 વર્લ્ડ કપ, મેન્સ હોકી વર્લ્ડ કપ, શૂટિંગ વર્લ્ડ કપનું પણ આયોજન કર્યું હતું.

તેમણે ઉમેર્યું કે, 'ભારત દર વર્ષે વિશ્વની સૌથી મોટી ક્રિકેટ લીગ (IPL)નું પણ આયોજન કરે છે. હાલમાં ભારતમાં ક્રિકેટ વર્લ્ડ કપ 2023 પણ ચાલી રહ્યો છે. ઉત્તેજનાનાં આ વાતાવરણમાં, દરેક વ્યક્તિ એ સાંભળીને ખુશ પણ છે કે IOC એક્ઝિક્યુટિવ બોર્ડે 2028 ઓલિમ્પિકમાં ક્રિકેટનો સમાવેશ કરવાનો પ્રસ્તાવ મૂક્યો છે.

અમને જલ્દી સારા સમાચાર મળવાની આશા : પીએમ મોદી

તેમણે કહ્યું કે, 'અમને આશા છે કે આ અંગે ટૂંક સમયમાં સારા સમાચાર સાંભળવા મળશે.' અમદાવાદમાં વર્લ્ડ કપ 2023માં ભારતની પાકિસ્તાન સામેની જીતનો ઉલ્લેખ કરતાં તેણે કહ્યું કે, 'થોડી મિનિટો પહેલાં જ અમદાવાદમાં વિશ્વના સૌથી મોટા સ્ટેડિયમમાં ભારતે ખૂબ જ શાનદાર જીત હાંસલ કરી છે. હું આ ઐતિહાસિક જીત માટે ટીમ ઈન્ડિયા અને તમામ ભારતીયોને અભિનંદન આપું છું.

ભારતની પ્રાચીન રમત પરંપરાનો ઉલ્લેખ કરતાં તેમણે કહ્યું, 'ભારતમાં રમતગમત આપણી સંસ્કૃતિ અને આપણી જીવનશૈલીનો મહત્વનો ભાગ રહી છે. આપણા દરેક ઉત્સવ ભારતના ગામડાઓમાં રમત-ગમત વગર અધૂરા છે. આપણે ભારતીયો માત્ર રમતપ્રેમી નથી પરંતુ આપણે રમતગમતમાં જીવતા લોકો છીએ અને આ આપણા હજારો વર્ષોના ઇતિહાસમાં પ્રતિબિંબિત થાય છે.

તેમણે કહ્યું કે, 'સિંધુ ખીણની સંસ્કૃતિ હોય, હજારો વર્ષ પહેલાનો વૈદિક સમય હોય, રમતગમતને લગતો ભારતનો વારસો દરેક સમયગાળામાં સમૃદ્ધ રહ્યો છે. આપણે ત્યાં હજારો વર્ષ પહેલાં લખાયેલા ગ્રંથોમાં વ્યક્તિ ચોસઠ વિદ્યાઓમાં પારંગત હોવાની વાત કહેવામાં આવી છે, જેમાંથી ઘણી રમતો જેવી કે ઘોડેસવારી, તીરંદાજી, તરવું, કુસ્તી વગેરે સાથે સંબંધિત છે.

રમતગમતમાં કોઈ હારતું નથી, માત્ર વિજેતા અને શીખનારા હોય છેઃ પીએમ મોદી

તેમણે કહ્ કેયું, 'રમતમાં કોઈ હારતું નથી. રમતમાં ફક્ત વિજેતાઓ અને શીખનારાઓ છે. રમતની ભાષા અને ભાવના સાર્વત્રિક છે. રમતગમત માત્ર સ્પર્ધા નથી, તે માનવતાને પોતાને વિસ્તારવાની તક આપે છે. જે કોઈ રેકોર્ડ તોડે છે, આખી દુનિયા તેનું સ્વાગત કરે છે. પ્રધાનમંત્રીએ કહ્યું, 'રમત પણ આપણી 'વસુધૈવ કુટુંબકમ'ની ભાવનાને મજબૂત કરે છે. તેથી અમારી સરકાર દરેક સ્તરે રમતગમતને પ્રોત્સાહન આપવા માટે કામગીરી કરી રહી છે. ખેલો ઈન્ડિયા યુનિવર્સિટી ગેમ્સ, ખેલો ઈન્ડિયા યુથ ગેમ્સ, ખેલો ઈન્ડિયા વિન્ટર ગેમ્સ અને ટૂંક સમયમાં આયોજિત થનારી ખેલો ઈન્ડિયા પેરા ગેમ્સ તેના ઉદાહરણો છે.

રમતગમત વિશ્વને જોડતું શક્તિશાળી માધ્યમ છે

પીએ મોદીએ કહ્યું કે રમતગમત એ વિશ્વને જોડવાનું બીજું શક્તિશાળી માધ્યમ છે. 'રમત એ માત્ર મેડલ જીતવાનું માધ્યમ નથી પરંતુ દિલ જીતવાનું પણ માધ્યમ છે. રમતગમત દરેકની અને દરેકની છે. રમતગમત માત્ર ચેમ્પિયન જ પેદા કરતી નથી પરંતુ વિશ્વને શાંતિ, પ્રગતિ અને કલ્યાણ તરફ પણ લઈ જાય છે.

આ પણ વાંચો | ભારત-પાકિસ્તાન વચ્ચે વર્લ્ડ કપની મેચમાં બીજી વખત બોલર બન્યો પ્લેયર ઓફ ધ મેચ, 24 વર્ષ પહેલા આ બોલર બન્યો હતો હીરો

આ પહેલા આઈઓસીના પ્રમુખ થોમસ બેચે હિન્દીમાં 'નમસ્તે'થી પોતાનું સંબોધન શરૂ કરતા વડાપ્રધાન મોદીને કહ્યું, 'તમારું ખૂબ સ્વાગત છે.' તેમણે કહ્યું, 'ભારત એક પ્રેરણાદાયી સ્થળ છે. સમગ્ર ઓલિમ્પિક સમુદાયને એશિયન ગેમ્સમાં ભારતના પ્રદર્શન પર ગર્વ છે. તેમણે એમ પણ કહ્યું કે આર્ટિફિશિયલ ઈન્ટેલિજન્સ અને ઈ-સ્પોર્ટ્સ ઓલિમ્પિક ચળવળ માટે બે નવી તકો છે. તેમણે કહ્યું કે પેરિસ ઓલિમ્પિક્સ 2024 પૂર્વ આર્ટિફિશિયલ ઈન્ટેલિજન્સ યુગમાં છેલ્લું ઓલિમ્પિક હશે.