દીપુ દાસ પછી બાંગ્લાદેશમાં વધુ એક હિન્દુ યુવકની માર મારીને હત્યા

Bangladesh : બાંગ્લાદેશમાં વધુ એક હિન્દુ યુવકની માર મારીને હત્યા કરવામાં આવી છે. યુવકનું નામ અમૃત મંડલ ઉર્ફે સમ્રાટ છે. અમૃત મંડલને માર મારવાની આ ઘટના રાજબારી જિલ્લામાં બની છે. મંડલની ઉંમર 29 વર્ષની હતી.

પોલીસે જણાવ્યું હતું કે પાંગ્શા ઉપનગરના હોસૈંદંગા જૂના બજારમાં રાત્રે 11 વાગ્યે અમૃત મંડલ પર હુમલો કરવામાં આવ્યો હતો. આ હુમલામાં તેનું મોત થયું હતું. પાંગ્શા મોડલ પોલીસ સ્ટેશનના પ્રભારી અધિકારી શેખ મોઇનુલ ઇસ્લામે જણાવ્યું હતું કે સ્થાનિકોએ અમૃત મંડલ પર ખંડણીનો આરોપ લગાવ્યો હતો.

થોડા દિવસો પહેલા દીપુ ચંદ્ર દાસ નામના યુવકની પણ ટોળાએ હત્યા કરી હતી. આ અંગે ભારતના તમામ ભાગોમાં વિરોધ પ્રદર્શન થઈ રહ્યા છે. ટોળાએ મૈમનસિંહ વિસ્તારમાં નિંદાના આરોપમાં દીપુ ચંદ્ર દાસને માર મારીને હત્યા કરી હતી.

અમૃત 'સમ્રાટ વાહિની' ગેંગ ચલાવતો હતો

સ્થાનિક લોકોએ બાંગ્લાદેશી મીડિયા આઉટલેટ ધ ડેઇલી સ્ટારને જણાવ્યું હતું કે અમૃત મંડલ 'સમ્રાટ વાહિની' નામની ગુનાહિત ગેંગનો સરગના હતો. આ ગેંગ ખંડણી ઉઘરાવતી હતી. સમ્રાટ ગયા વર્ષે શેખ હસીનાની સરકારના પતન પછી  દેશ છોડીને ભાગી ગયો હતો અને તાજેતરમાં જ પરત ફર્યો હતો.

બુધવારે સાંજે તે અને તેની ગેંગના કેટલાક અન્ય સભ્યો શાહિદુલ ઇસ્લામ નામના ગ્રામજનના ઘરે તેની પાસેથી પૈસા વસૂલવા માટે ગયા હતા. પરિવારના સભ્યોએ શોર મચાવ્યો કે આ બધા લોકો લૂંટારુ હતા. ગ્રામજનોએ સમ્રાટને પકડ્યો અને તેને માર મારીને હત્યા કરી દીધી હતી. જ્યારે બાકીની ગેંગ ભાગી ગઈ હતી. પોલીસે સમ્રાટના સાથી મોહમ્મદ સલીમની ધરપકડ કરી છે.

બુધવારે બોમ્બ વિસ્ફોટમાં એક વ્યક્તિનું મોત થયું હતું

બાંગ્લાદેશની રાજધાની ઢાકામાં બુધવારે થયેલા બોમ્બ વિસ્ફોટમાં એક વ્યક્તિનું મોત થયું હતું. આ વિસ્ફોટ ઢાકાના મોગબજાર વિસ્તારમાં થયો હતો. આ ઘટના ક્રિસમસની પૂર્વસંધ્યાએ બની હતી. આ ઘટનાઓએ બાંગ્લાદેશની સુરક્ષા વ્યવસ્થા પર મોટા સવાલો ઉભા કર્યા છે.

આ પણ વાંચો -  અમેરિકા અને પશ્ચિમ દેશો સાથે ‘ટ્રેડ ટેન્શન’ વચ્ચે ઓમાન ડીલથી મોદી સરકારે ભારતને કેવી રીતે આપી મજબૂતી?

તારિક રહેમાન ઢાકા પરત ફર્યા

બાંગ્લાદેશ રાષ્ટ્રવાદી પાર્ટી (બીએનપી)ના કાર્યકારી અધ્યક્ષ તારિક રહેમાન ગુરુવારે ઢાકા પરત ફર્યા છે. તેઓ પૂર્વ વડાપ્રધાન ખાલિદા ઝિયાના પુત્ર છે. રહેમાન લગભગ 17 વર્ષથી લંડનમાં રહેતા હતા