Covid in China: ચીનમાં બ્લડ અને દવાની અછત, રોજના 5000 મોતનો અંદાજ, 10 પોઈન્ટમાં જાણો ચીનની સ્થિતિ

Covid in China: ચીનમાં કોરોના વાયરસે ફરી એકવાર હાહાકાર મચાવ્યો છે. જેમ જેમ કોવિડ વિસ્ફોટ વચ્ચે ચીનની હોસ્પિટલોમાં મૃતદેહોના ઢગલા થવાનું શરૂ થયું છે, ત્યાં દવા માટે પણ ઝપાઝપી થઈ રહી છે. આ દરમિયાન, સમાચાર છે કે ચીનમાં લોહીની પણ અછત સર્જાઈ છે. દેશમાં કોરોનાનું સંક્રમણ એટલી ઝડપથી ફેલાઈ રહ્યું છે કે, મેડિકલ સ્ટોરમાં દવાઓ મેળવવી પણ મુશ્કેલ થઈ ગઈ છે. એટલું જ નહીં, હોસ્પિટલોમાં સારવાર માટે ભીડ જોવા મળી રહી છે અને લોકોને સારવાર માટે પોતાનો વારો લેવા માટે લાંબી લાઈનોમાં રાહ જોવી પડે છે.

એક એનાલિટિક્સ કંપનીના નવા અંદાજ મુજબ, ચીનમાં દરરોજ એક મિલિયનથી વધુ નવા કેસ અને ઓછામાં ઓછા 5,000 મૃત્યુ થઈ રહ્યા છે. લંડન સ્થિત એરફિનિટી દ્વારા નવા અંદાજો આપવામાં આવ્યા હતા, જે મુજબ ચીનમાં જાન્યુઆરીના મધ્યમાં અને માર્ચની શરૂઆતમાં કોરોનાના બે પીક વેવ આવી શકે છે.

1 - અનુમાન લગાવવામાં આવ્યું છે કે, આ વખતે ચીનમાં કોરોનાને કારણે 20 લાખથી વધુ લોકોના મોત થશે, જ્યારે 23 કરોડથી વધુ લોકો તેનાથી સંક્રમિત થઈ શકે છે.

2 - ચીને દેશભરમાં તબીબી પુરવઠાના ઉત્પાદનમાં વધારો કરવાનો પ્રયાસ કર્યો છે કારણ કે, લાખો લોકો COVID-19 કેસોમાં વધારાને કારણે મૂળભૂત દવાઓ અને પરીક્ષણ કીટ મેળવવા માટે સંઘર્ષ કરી રહ્યા છે.

3 - કોરોના વિસ્ફોટને કારણે ચીનમાં શરદી અને ફ્લૂની દવાઓ ઉપલબ્ધ નથી. આટલું જ નહીં, હોસ્પિટલોમાં કોરોના દર્દીઓની વધતી સંખ્યાને કારણે, બેડની અછત સર્જાઈ છે અને દવાઓની પણ અછત છે. દવાઓની અછતને કારણે તેની કિંમતોમાં અનેકગણો વધારો થયો છે.

4 - ચીનમાં કોરોના વાયરસના ઓમિક્રોન વેરિઅન્ટના નવા સબ-વેરિઅન્ટથી સંબંધિત ચેપના કેસોમાં નોંધપાત્ર વધારો જોવા મળ્યો છે. દેશ હાલમાં મુખ્યત્વે બે પેટા પ્રકારો BA.5.2 અને BF.7 થી પ્રભાવિત છે.

5 - ગ્લોબલ ટાઈમ્સના અહેવાલ મુજબ, ચીનના શહેર ગુઆંગઝૂમાં દરરોજ બ્લડની માંગને પહોંચી વળવા માટે લગભગ 1,200 રક્તદાતાઓની જરૂર છે.

6 - કોરોના દર્દીઓની વધતી સંખ્યાને કારણે બેઇજિંગની હોસ્પિટલોમાં ડોક્ટરો અને નર્સોની અછત સર્જાઈ છે. આવી સ્થિતિમાં, પૂર્વીય પ્રાંતોના સેંકડો ડોકટરો અને નર્સોને રાજધાનીમાં ફરજ પર બોલાવવામાં આવ્યા છે. પૂર્વી ચીનના શેનડોંગ પ્રાંતના ઓછામાં ઓછા 500 ડોકટરો અને નર્સો તેમજ જિયાંગસુના ડઝનેક ડોકટરોને બેઇજિંગની હોસ્પિટલોમાં મોકલવામાં આવ્યા છે.

7 - સ્થાનિક મીડિયાના જણાવ્યા અનુસાર, સત્તાવાળાઓએ એક ડઝનથી વધુ ચાઇનીઝ ફાર્માસ્યુટિકલ કંપનીઓને દવાની અછતને દૂર કરવા માટે દવાઓનો સપ્લાય કરવામાં મદદ કરવા કહ્યું છે.

8 - સ્થાનિક અહેવાલોમાં જણાવાયું છે કે, 42 લાઇસન્સ પ્રાપ્ત ટેસ્ટિંગ કીટ ઉત્પાદકોમાંથી 11 પાસે તેમના ઉત્પાદનનો ભાગ સરકાર દ્વારા જપ્ત કરવામાં આવ્યો છે અથવા તેમને રાજ્ય તરફથી ઓર્ડર મળ્યા છે.

9 - વર્લ્ડ હેલ્થ ઓર્ગેનાઈઝેશન (WHO) એ કહ્યું છે કે, તે ચીનમાં કોવિડ-19ની સ્થિતિને લઈને ખૂબ જ ચિંતિત છે. WHOનું કહેવું છે કે, તાવની દવાઓની સતત અછત અને દેશમાં સંક્રમણની લહેર આવવાની આશંકા વચ્ચે વાયરસનો પ્રકોપ આખા દેશમાં અનિયંત્રિત રીતે ફેલાઈ રહ્યો છે.

10 - અધિકારીઓએ હળવા લક્ષણો ધરાવતા લોકોને ઘરે રહેવા અને ઘરે સારવાર લેવા વિનંતી કરી છે. જેમાં દવાઓથી લઈને ઝડપી એન્ટિજેન ટેસ્ટ સુધીની દરેક બાબતોનો સમાવેશ થાય છે.