America Is Back: ડોનાલ્ડ ટ્રમ્પનું US સંસદમાં પ્રથમ ભાષણ - તમારું કામ આગળ વધશે જાતિ કે રંગ નહીં, બિડેન અમેરિકાના સૌથી ખરાબ રાષ્ટ્રપતિ

Donald Trump Address US Parliament Congress: ડોનાલ્ડ ટ્રમ્પ અમેરિકાના રાષ્ટ્રપતિ બન્યા બાદ પહેલીવાર સંસદના સંયુક્ત સત્રને સંબોધિત કર્યું છે. પોતાના ભાષણની શરૂઆત કરતા ડોનાલ્ડ ટ્રમ્પે કહ્યું કે, America Is Back. અમેરિકાની સંસદ કોંગ્રેસને સંબોધિત કરતા ડોનાલ્ડ ટ્રમ્પે કહ્યું કે 43 દિવસ પહેલા જ્યારે મેં દેશની કમાન સંભાળી હતી, ત્યારે એક નવા યુગની શરૂઆત થઈ હતી. અમારી સરકાર છેલ્લા 43 દિવસથી આ દિશામાં કામ કરી રહી છે.

અમેરિકાના ઈતિહાસમાં સૌથી ખરાબ રાષ્ટ્રપતિ છે જો બિડેન : ટ્રમ્પ

ડોનાલ્ડ ટ્રમ્પે અગાઉના જો બિડેન સરકાર પર આરોપ લગાવતા કહ્યું કે, બિડેન અમેરિકાના ઇતિહાસમાં સૌથી ખરાબ રાષ્ટ્રપતિ હતા. તેમના કાર્યકાળ દરમિયાન, ગેરકાયદેસર ઘૂસણખોરી વધી હતી. ટ્રમ્પે કહ્યું કે અમે ગેરકાયદેસર ઘૂસણખોરી બંધ કરી દીધી છે. તેમણે ઇમિગ્રન્ટની ઘણી સમસ્યાઓ પર નિયંત્રણો મૂક્યા. ટ્રમ્પે કહ્યું કે અમેરિકા યોગ્ય દિશામાં આગળ વધી રહ્યું છે. અમેરિકાનો વિશ્વાસ અને આદર પાછો ફરી રહ્યો છે.

અમેરિકામાં તમારું કામ આગળ વધશે, જાતિ - રંગ નહીં : ટ્રમ્પ

ડોનાલ્ડ ટ્રમ્પે કહ્યું કે, "આપણે અમેરિકન અર્થવ્યવસ્થાને બચાવવી પડશે. હવે મોટાં સપનાં જોવાનો સમય આવી ગયો છે. બિડેનનો કાયદો અમેરિકન વિકાસમાં અવરોધરૂપ હતો. અમારો આત્મવિશ્વાસ પાછો આવી ગયો છે. અર્થતંત્રને મજબૂત બનાવવું એ પ્રાથમિકતા રહેશે અને અમેરિકાને મારામાં વિશ્વાસ છે, એમ તેમણે કહ્યું હતું. અમેરિકામાં તમારું કામ તમને આગળ ધપાવશે, તમારી જાતિ અથવા રંગને નહીં.

અમેરિકાના રાષ્ટ્રપતિ ડોનાલ્ડ ટ્રમ્પની ટીમને સરહદ પર કામ ચાલુ રાખવા માટે વધારાના ભંડોળની જરૂર છે. ટીમને વધુ ફ્લાઇટ્સ માટે ભંડોળની જરૂર છે. આ ઉપરાંત સૌથી ખરાબ પરિસ્થિતિ પર ધ્યાન કેન્દ્રિત કરવા માટે પણ નાણાંની જરૂર પડે છે. ટ્રમ્પ આ અંગે મોટી જાહેરાત પણ કરી શકે છે.

કેનેડા અને મેક્સિકો પર ટેરિફને લઇને મોટી જાહેરાત થઇ શકે છે.

ડોનાલ્ડ ટ્રમ્પે તાજેતરમાં જ કહ્યું હતું કે કેનેડા અને મેક્સિકો પર લાદવામાં આવેલા ટેરિફને ઘટાડી શકાય નહીં. જો કે કેટલાક નવા ટેરિફની જાહેરાત પણ થઇ શકે છે. કેનેડા પણ ટેરિફ વોર વચ્ચે મૂંઝવણ અનુભવી રહ્યું છે.

હાલમાં જ વ્હાઈટ હાઉસમાં ટ્રમ્પ અને યુક્રેનના રાષ્ટ્રપતિ વોલોડિમીર ઝેલેન્સકી વચ્ચે ઉગ્ર વાતચીત થઈ હતી. આ પછી રશિયા-યુક્રેન યુદ્ધ અંગે પણ ચર્ચાઓ શરૂ થઈ હતી. યુક્રેન સાથે અમેરિકાની એનર્જી ડીલ અંગે સંસદમાં પણ મોટી જાહેરાત થઈ શકે છે. યુક્રેનના રાષ્ટ્રપતિ પણ એક સોદા માટે સંમત થયા છે.

આ પણ વાંચો | અમેરિકાએ યુક્રેનને મદદ રોકતા ઝેલેન્સકી ઘૂંટણિયે, કહ્યું – હું ટ્રમ્પ સાથે કામ કરવા તૈયાર છું

ભાષણને સ્ટેટ ઓફ યુનિયન કેમ કહેવામાં આવતું નથી?

પરંપરા અનુસાર, સ્ટેટ ઓફ ધ યુનિયન એડ્રેસનો અર્થ પાછલા વર્ષ પર ચિંતન કરવાનો છે. ડોનાલ્ડ ટ્રમ્પે 20 જાન્યુઆરીએ બીજી ટર્મ માટે શપથ લીધા બાદથી તેઓ એક મહિનાથી પણ ઓછા સમયથી આ પદ પર છે. આ કારણોસર, ભાષણને સત્તાવાર રીતે સ્ટેટ ઓફ ધ યુનિયન તરીકે લેબલ આપવામાં આવ્યું નથી. તેના બદલે, નવા શપથ લેનારા પ્રમુખ તેમના એજન્ડા માટે વાતાવરણ બનાવવા અને તેમની પ્રાથમિકતાઓને પ્રતિબિંબિત કરવા માટે તેમના પ્રથમ સંયુક્ત કોંગ્રેસના સંબોધનનો ઉપયોગ કરે છે. કોંગ્રેસ રિસર્ચ સર્વિસના જણાવ્યા અનુસાર, પ્રથમ વર્ષના સરેરાશ સંબોધનમાં લગભગ 42 પોલિસી વિનંતીઓનો સમાવેશ થાય છે.