Donald Trump Cuba Warning: ડોનાલ્ડ ટ્રમ્પની ક્યુબાને આખરી ચેતવણી: સમજુતી કરો નહીં તો તેલ અને નાણાકીય સહાય બંધ

Donald Trump Cuba Warning: અમેરિકી રાષ્ટ્રપતિ ડોનાલ્ડ ટ્રમ્પે રવિવારે ક્યુબાને કડક શબ્દોમાં ચેતવણી આપી છે. ટ્રમ્પે જણાવ્યું હતું કે આ કેરેબિયન દેશે "ખૂબ મોડું થાય તે પહેલાં" યુનાઇટેડ સ્ટેટ્સ સાથે સમજૂતી કરી લેવી જોઈએ, અન્યથા ક્યુબાને તેલ કે નાણાકીય સહાય મળશે નહીં.

ટ્રમ્પની સોશિયલ મીડિયા પોસ્ટ પોતાના સોશિયલ મીડિયા પ્લેટફોર્મ 'ટ્રુથ સોશિયલ' પર એક પોસ્ટમાં ટ્રમ્પે લખ્યું, "હવેથી ક્યુબાને કોઈ તેલ કે નાણાં આપવામાં આવશે નહીં – ઝીરો! હું તેમને ભારપૂર્વક સૂચન કરું છું કે તેઓ સમય રહેતા સમજૂતી કરી લે."

વેનેઝુએલા સાથેના સંબંધો પર પ્રહાર

ટ્રમ્પે વધુમાં ઉમેર્યું કે ક્યુબા વર્ષો સુધી વેનેઝુએલા પાસેથી વિપુલ પ્રમાણમાં નાણાં અને તેલ મેળવીને જીવતું હતું. બદલામાં ક્યુબા વેનેઝુએલાના છેલ્લા બે સરમુખત્યારોને સુરક્ષા સેવાઓ પૂરી પાડતું હતું, પરંતુ હવે તે બંધ થઈ ગયું છે. 

ટ્રમ્પે દાવો કર્યો હતો કે ગયા અઠવાડિયે યુએસ સૈન્ય હુમલામાં ઘણા ક્યુબન લોકો માર્યા ગયા છે અને હવે વેનેઝુએલાને આ "ગુંડાઓ" થી સુરક્ષાની જરૂર નથી.

ક્યુબાની અર્થવ્યવસ્થા પર સંકટ

ક્યુબા માટે વેનેઝુએલા તેલનો સૌથી મોટો સપ્લાયર છે. વેનેઝુએલા દરરોજ આશરે 27,000 બેરલ તેલ ક્યુબાને મોકલતું હતું, જે ક્યુબાની તેલની અછતના 50% ભાગને પૂર્ણ કરતું હતું.

જોકે, અમેરિકી સૈન્ય દ્વારા નિકોલસ માદુરોની ધરપકડ બાદ, ટ્રમ્પ વહીવટીતંત્રે વચગાળાના રાષ્ટ્રપતિ ડેલસી રોડ્રિગ્ઝ પર તેલ અમેરિકા મોકલવા માટે દબાણ કર્યું છે.

આ પણ વાંચો | ટ્રમ્પ ટેરિફથી આ રાજ્યમાં જઈ શકે છે 30 લાખ નોકરીઓ 

અમેરિકી ઇન્ટેલિજન્સ રિપોર્ટ્સ મુજબ, ક્યુબાની અર્થવ્યવસ્થા અત્યારે ભારે તણાવમાં છે. વોશિંગ્ટન દ્વારા શરૂ કરાયેલ 'ઓપરેશન એબ્સોલ્યુટ રિઝોલ્વ' નો મુખ્ય ઉદ્દેશ્ય વેનેઝુએલાને માદુરો શાસનથી મુક્ત કરવાનો અને અમેરિકાના હિતોનું રક્ષણ કરવાનો છે.