શું કાયમી યુદ્ધવિરામ થશે? કતાર મંત્રણા બાદ પાકિસ્તાન અને અફઘાનિસ્તાન તાત્કાલિક સીઝફાયર પર સહમત

Pakistan-Afghanistan News : કતારના વિદેશ મંત્રાલયે રવિવારે કહ્યું હતું કે પાકિસ્તાન અને અફઘાનિસ્તાન ઘણા દિવસોની સરહદ પારની ભીષણ અથડામણ બાદ તાત્કાલિક યુદ્ધવિરામ માટે સહમત થયા છે. અગાઉના યુદ્ધવિરામ બાદ પાકિસ્તાની હવાઈ હુમલામાં ઓછામાં ઓછા 10 લોકો માર્યા ગયા બાદ આ ઘોષણા કરવામાં આવી છે.

કતારના વિદેશ મંત્રાલયે એક નિવેદનમાં જણાવ્યું હતું કે, "વાતચીત દરમિયાન, બંને પક્ષો તાત્કાલિક યુદ્ધવિરામ અને બંને દેશો વચ્ચે કાયમી શાંતિ અને સ્થિરતા સુનિશ્ચિત કરવા માટે મિકેનિઝમની સ્થાપના પર સહમત થયા હતા." ”

તણાવ ઘટાડવા માટે બંને પક્ષોના અધિકારીઓ શનિવારે દોહામાં મળ્યા હતા. કાબુલે અગાઉ ઇસ્લામાબાદ પર 48 કલાકના યુદ્ધવિરામનો ભંગ કરવાનો આરોપ લગાવ્યો હતો, જેમાં લગભગ એક અઠવાડિયા સુધી ચાલેલી લડાઈ ટૂંક સમય માટે અટકાવી હતી, જેમાં બંને પક્ષોના ડઝનેક સૈનિકો અને નાગરિકો માર્યા ગયા હતા.

પાકિસ્તાનના સુરક્ષા અધિકારીઓએ જણાવ્યું હતું કે અફઘાન સરહદી વિસ્તારોમાં તાજેતરના હુમલામાં પાકિસ્તાની તાલિબાન સાથે જોડાયેલા એક ઉગ્રવાદી જૂથને નિશાન બનાવવામાં આવ્યું હતું. તેમણે કહ્યું કે આ હુમલો પાકિસ્તાની અર્ધલશ્કરી દળો પર થયેલા હુમલાના જવાબમાં કરવામાં આવ્યો હતો.

તાલિબાને કહ્યું કે દોહામાં પાકિસ્તાનના પ્રતિનિધિમંડળમાં સંરક્ષણ પ્રધાન ખ્વાજા આસિફ અને ગુપ્તચર ચીફ જનરલ અસીમ મલિક સામેલ છે, જ્યારે અફઘાન પક્ષનું નેતૃત્વ સંરક્ષણ પ્રધાન મોહમ્મદ યાકૂબ કરી રહ્યા છે.

તાલિબાનના વિદેશ મંત્રી આમિર મુત્તાકીની ભારત મુલાકાત દરમિયાન કાબુલમાં થયેલા વિસ્ફોટના થોડા દિવસો બાદ 11 ઓક્ટોબરે હિંસા ફાટી નીકળી હતી. ત્યારબાદ તાલિબાન લડવૈયાઓએ પાકિસ્તાનની દક્ષિણ સરહદ પર હુમલા કર્યા હતા, જેના કારણે ઇસ્લામાબાદે જવાબી કાર્યવાહી કરી હતી.