પાકિસ્તાનમાં બ્લાસ્ટ: બલૂચિસ્તાનમાં મસ્જિદ પાસે આત્મઘાતી હુમલો, 52 થી વધુના મોત, 70થી વધુ ઘાયલ

પાકિસ્તાનના બલૂચિસ્તાનના મસ્તુંગ જિલ્લામાં શુક્રવારે એક મસ્જિદ પાસે થયેલા વિસ્ફોટમાં ઓછામાં ઓછા 34 લોકો માર્યા ગયા અને 70 લોકો ઘાયલ થયા. મસ્તુંગના આસિસ્ટન્ટ કમિશનર અતાહુલ મુનીમે જણાવ્યું કે, જ્યારે લોકો અલફલાહ રોડ પર મદીના મસ્જિદ પાસે ઈદ મિલાદુન નબીના જુલૂસ માટે ભેગા થઈ રહ્યા હતા ત્યારે વિસ્ફોટ થયો હતો.

બલૂચિસ્તાનના મસ્તુંગ જિલ્લામાં અલ-ફલાહ મસ્જિદ પાસે ઈદ મિલાદ-ઉલ-નબીના જુલૂસને નિશાન બનાવીને વિસ્ફોટ કરવામાં આવ્યો છે. વિસ્ફોટ બાદ હોસ્પિટલોમાં ઈમરજન્સી જાહેર કરવામાં આવી છે અને હોસ્પિટલના સ્ટાફને તાત્કાલિક પહોંચી જવાની સૂચના આપવામાં આવી છે. વિસ્ફોટમાં એક ડીએસપીનું પણ મોત થયું છે.

DSPની કારની બાજુમાં હુમલાખોરે પોતાને ઉડાવી દીધો

મસ્તુંગના આસિસ્ટન્ટ કમિશનર (AC) અત્તાહુલ મુનિમે જણાવ્યું કે, જ્યારે લોકો અલફલાહ રોડ પર મદીના મસ્જિદ પાસે ઈદ મિલાદુન નબીના જુલૂસ માટે ભેગા થઈ રહ્યા હતા ત્યારે વિસ્ફોટ થયો હતો. તેમણે પુષ્ટિ કરી કે વિસ્ફોટ ડીએસપી ગિશકોરીની કારમાંથી આવ્યો હતો, જેઓ સરઘસની બાજુમાં રહેવાના હતા. એસએચઓ લેહરીએ જણાવ્યું હતું કે વિસ્ફોટ આત્મઘાતી વિસ્ફોટ હતો અને હુમલાખોરે ડીએસપી ગિશકોરીની કારની બાજુમાં પોતાને ઉડાવી દીધો હતો.

બલૂચિસ્તાનના વચગાળાના માહિતી મંત્રી જાન અચકઝાઈએ કહ્યું કે બચાવ ટીમો મસ્તુંગ મોકલવામાં આવી છે. તેમણે કહ્યું કે ગંભીર રીતે ઘાયલ લોકોને ક્વેટા ખસેડવામાં આવી રહ્યા છે અને તમામ હોસ્પિટલોમાં ઈમરજન્સી લાદવામાં આવી છે. અચકઝાઈએ કહ્યું, "દુશ્મન વિદેશી મદદ સાથે બલૂચિસ્તાનમાં ધાર્મિક સહિષ્ણુતા અને શાંતિને નષ્ટ કરવા માંગે છે." તેમણે વધુમાં જણાવ્યું હતું કે કાર્યકારી મુખ્યમંત્રી અલી મર્દાન ડોમકીએ અધિકારીઓને વિસ્ફોટ માટે જવાબદાર લોકોની ધરપકડ કરવાનો નિર્દેશ આપ્યો છે.

બચાવ કામગીરી ચાલુ છે

દરમિયાન, વચગાળાના ગૃહ પ્રધાન સરફરાઝ અહેમદ બુગતીએ વિસ્ફોટની સખત નિંદા કરી હતી અને જાનહાનિ પર શોક વ્યક્ત કર્યો હતો. આતંકવાદીઓને કોઈ આસ્થા કે ધર્મ નથી તેમ જણાવતા બુગતીએ કહ્યું કે બચાવ કામગીરી દરમિયાન તમામ સંસાધનોનો ઉપયોગ કરવામાં આવી રહ્યો છે. તેમણે કહ્યું કે ઘાયલોની સારવારમાં કોઈ કસર બાકી રાખવામાં આવશે નહીં અને આતંકવાદી તત્વો કોઈ છૂટને પાત્ર નથી.

એક અધિકારીએ જણાવ્યું કે વિસ્ફોટ એક મસ્જિદ પાસે થયો જ્યાં લોકો ઈદ મિલાદુન નબીની ઉજવણી માટે એકઠા થઈ રહ્યા હતા. અગાઉ સપ્ટેમ્બરની શરૂઆતમાં, પાકિસ્તાનના મસ્તુંગ જિલ્લામાં એક વિસ્ફોટમાં જમિયત ઉલેમા-એ-ઈસ્લામ-ફઝલ (JUI-F) નેતા હાફિઝ હમદુલ્લા સહિત ઓછામાં ઓછા 11 લોકો ઘાયલ થયા હતા.