દક્ષિણ કોરિયાના વિપક્ષી નેતા લી જે મ્યુંગ પર પ્રેસ કોન્ફરન્સ દરમિયાન હુમલો, ગરદન પર અનેક વખત ચપ્પાના ઘા ઝીંક્યા

દક્ષિણ કોરિયામાં વિપક્ષી નેતા લી જે-મ્યુંગ પર ભીડવાળી પ્રેસ કોન્ફરન્સમાં હુમલો કરવામાં આવ્યો હતો. જ્યારે તેઓ પત્રકારોને સંબોધિત કરી રહ્યા હતા ત્યારે એક વ્યક્તિએ તેમના ગળા પર છરી વડે હુમલો કર્યો હતો. આ ઘટના દક્ષિણ બંદર શહેર બુસાનની મુલાકાત દરમિયાન બની હતી. આ ઘટનામાં તેઓ ગંભીર રીતે ઘાયલ થયા હતા. દક્ષિણ કોરિયાની ન્યૂઝ એજન્સી યોનહાપ અનુસાર જે-મ્યુંગ બુસાનમાં પ્રસ્તાવિત એરપોર્ટની મુલાકાત લઈ રહ્યા હતા ત્યારે પ્રેસ કોન્ફરન્સ દરમિયાન એક અજાણ્યા વ્યક્તિએ તેમના ગળામાં હથિયાર વડે હુમલો કર્યો હતો.

સોશિયલ મીડિયા પર વાયરલ થઈ રહેલી તસવીરમાં જોઈ શકાય છે કે તે આંખો બંધ કરીને જમીન પર સૂઈ રહ્યો છે. તેમની પાસે અધિકારીઓનું ટોળું પણ ઉભું છે. લોહી વહેતું બંધ કરવા માટે લોકોએ તેના ગળામાં કપડું બાંધ્યું છે.

આરોપીની ધરપકડ

લી જે-મ્યુંગ પર હુમલો કરનાર આરોપીની પોલીસે સ્થળ પર જ ધરપકડ કરી હતી. જો કે હજુ સુધી હુમલાખોર વિશે વધુ માહિતી સામે આવી નથી. લી જે-મ્યુંગ દક્ષિણ કોરિયાની મુખ્ય વિપક્ષી ડેમોક્રેટિક પાર્ટીના વડા છે.