પુતિને રશિયા આવવા મોદીને આમંત્રણ આપ્યું, રશિયન રાષ્ટ્રપતિએ વિદેશ મંત્રી જયશંકરને કહ્યું- તેમને યુક્રેનની સ્થિતિ અંગે આપી છે દરેક અપડેટ

Ukraine Rassia war, Putin Modi updates : રશિયાના રાષ્ટ્રપતિ વ્લાદિમીર પુતિને વડાપ્રધાન નરેન્દ્ર મોદીને આવતા વર્ષે રશિયાની મુલાકાત લેવા આમંત્રણ આપ્યું છે. વિદેશ મંત્રી એસ જયશંકરે બુધવારે રશિયાના રાષ્ટ્રપતિ ભવન ક્રેમલિનમાં પુતિન સાથે મુલાકાત કરી હતી. આ દરમિયાન પુતિને જયશંકરને કહ્યું કે અમે અમારા મિત્ર વડાપ્રધાન મોદીને રશિયામાં જોઈને ખુશ થઈશું. વિદેશ મંત્રી એસ જયશંકર રશિયાની મુલાકાતે પહોંચ્યા છે.

રશિયાની પાંચ દિવસીય સત્તાવાર મુલાકાતે આવેલા વિદેશ મંત્રી જયશંકરે અગાઉ તેમના રશિયન સમકક્ષ સર્ગેઈ લવરોવ સાથે મુલાકાત કરી હતી. લવરોવ સાથેની વાતચીત બાદ સંયુક્ત પત્રકાર પરિષદને સંબોધતા જયશંકરે કહ્યું કે તેમને વિશ્વાસ છે કે વડાપ્રધાન મોદી અને રાષ્ટ્રપતિ પુતિન આવતા વર્ષે વાર્ષિક સમિટમાં મળશે. અગાઉ એસ જયશંકરે કહ્યું હતું કે બંને નેતાઓ સતત સંપર્કમાં છે.

વિદેશ મંત્રી જયશંકરે રશિયાના રાષ્ટ્રપતિ સાથે મુલાકાત કરી

"આજે સાંજે રાષ્ટ્રપતિ વ્લાદિમીર પુતિનને મળ્યા," જયશંકરે સોશિયલ મીડિયા પ્લેટફોર્મ 'X' પર એક પોસ્ટમાં કહ્યું. વડાપ્રધાન નરેન્દ્ર મોદી વતી તેમને અભિનંદન પાઠવ્યા અને વ્યક્તિગત સંદેશ આપ્યો. નાયબ વડા પ્રધાન ડેનિસ માન્તુરોવ અને વિદેશ પ્રધાન સર્ગેઈ લવરોવ સાથેની મારી ચર્ચાઓ વિશે રાષ્ટ્રપતિ પુતિનને જાણ કરી. બંને દેશો વચ્ચેના સંબંધોને આગળ લઈ જવા અંગેના તેમના માર્ગદર્શનની પ્રશંસા કરી.

અત્યાર સુધીમાં ભારત અને રશિયા વચ્ચે એકાંતરે 21 વાર્ષિક સમિટ યોજાઈ ચૂકી છે. છેલ્લી સમિટ ડિસેમ્બર 2021માં નવી દિલ્હીમાં યોજાઈ હતી. પુતિને એમ પણ કહ્યું કે રશિયા અને ભારત વચ્ચે વેપાર વધી રહ્યો છે, ખાસ કરીને ક્રૂડ ઓઈલ અને ઉચ્ચ ટેકનોલોજી ક્ષેત્રોમાં. તેમણે કહ્યું, “અમારો વ્યવસાય સતત બીજા વર્ષે સ્થિર ગતિએ વધી રહ્યો છે. આ વર્ષે વિકાસ દર ગત વર્ષ કરતા પણ વધુ છે.