Trump Zelenskyy: અમેરિકાએ યુક્રેનને મદદ રોકતા ઝેલેન્સકી ઘૂંટણિયે, કહ્યું - હું ટ્રમ્પ સાથે કામ કરવા તૈયાર છું

Trump Zelenskyy Controversy: અમેરિકાના રાષ્ટ્રપતિ ડોનાલ્ડ ટ્રમ્પ સાથે ટેલિવિઝન પર થયેલી જોરદાર ચર્ચા બાદ અમેરિકાએ યુક્રેનના રાષ્ટ્રપતિ પર આક્રમક વલણ અપનાવ્યું હતું. ટ્રમ્પ વહીવટીતંત્રે અમેરિકા તરફથી યુક્રેનને અપાતી મદદ બંધ કરવાની જાહેરાત પણ કરી હતી, પરંતુ આ જાહેરાતના થોડા કલાકો બાદ જ ઝેલેન્સ્કીનું વલણ નરમ પડી ગયું હતું. તેમણે કહ્યું કે શાંતિ સ્થાપિત કરવા માટે તેઓ ડોનાલ્ડ ટ્રમ્પના મજબૂત નેતૃત્વ હેઠળ કામ કરવા તૈયાર છે.

યુક્રેનના રાષ્ટ્રપતિ વોલોડિમીર ઝેલેન્સ્કીએ કહ્યું કે, રશિયા સાથે ચાલી રહેલા યુદ્ધ વચ્ચે યુક્રેન હવે શક્ય તેટલી વહેલી તકે વાટાઘાટોના ટેબલ પર આવવા તૈયાર છે. તેણે તેના સોશિયલ મીડિયા પ્લેટફોર્મ એક્સ પર એક પોસ્ટમાં જણાવ્યું હતું કે, "આપણા માંથી કોઈ પણ લાંબા યુદ્ધો ઇચ્છતું નથી." યુક્રેનના લોકોથી વધારે શાંતિ કોઈ ઈચ્છતું નથી.

ઝેલેસ્કીએ યુદ્ધવિરામની યોજના જણાવી

યુક્રેનના રાષ્ટ્રપતિ વોલોદિમીર ઝેલેન્સકી સોશિયલમ મીડિયા એક્સ પર તેમની પોસ્ટમાં જણાવ્યું હતું કે, "અમે યુદ્ધનો અંત લાવવા માટે ઝડપથી કાર્યવાહી કરવા તૈયાર છીએ, અને પ્રથમ તબક્કો કેદીઓની મુક્તિ અને હવાઈ ક્ષેત્રમાં યુદ્ધવિરામ હોઈ શકે છે. આ અંતર્ગત મિસાઈલ, લાંબા અંતરના ડ્રોન, ઉર્જા પર બોમ્બ અને અન્ય નાગરિક ઈન્ફ્રાસ્ટ્રક્ચર પર પ્રતિબંધ લગાવી શકાય છે. સાથે જ જો રશિયા કરશે તો સમુદ્રમાં તાત્કાલિક યુદ્ધવિરામ થઈ શકે છે.

યુક્રેનના રાષ્ટ્રપતિ ઝેલેન્સ્કીએ કહ્યું કે પ્રથમ તબક્કા પછી અમે ખૂબ જ ઝડપથી આગળના તમામ તબક્કાઓ તરફ આગળ વધવા માંગીએ છીએ અને મજબૂત અંતિમ કરાર પર સંમત થવા માટે અમેરિકા સાથે કામ કરવા માંગીએ છીએ.

વ્હાઇટ હાઉસમાં ચર્ચા પર અફસોસ

તેમણે રાષ્ટ્રપતિ ટ્રમ્પ સાથે વ્હાઇટ હાઉસની ચર્ચિત ચર્ચા પર પણ અફસોસ વ્યક્ત કર્યો હતો અને કહ્યું હતું કે શુક્રવારે વોશિંગ્ટનમાં વ્હાઇટ હાઉસમાં અમારી બેઠક જેવી હોવી જોઈએ તેવી થઈ ન હતી. આ અફસોસજનક છે. હવે બાબતોને યોગ્ય રીતે મૂકવાનો સમય આવી ગયો છે. અમે ઇચ્છીએ છીએ કે ભવિષ્યમાં સહકાર અને સંચાર રચનાત્મક બની રહે.

ખનીજોના સોદા માટે ઝેલેન્સકી તૈયાર

યુક્રેનના રાષ્ટ્રપતિ વોલોદિમીર ઝેલેન્સકીએ કહ્યું કે યુક્રેન તેના દુર્લભ ખનિજો સાથે વ્યવહાર કરવા માટે સંપૂર્ણ રીતે તૈયાર છે. તેમણે કહ્યું કે યુક્રેન કોઈપણ સમયે અને કોઈપણ અનુકૂળ ફોર્મેટમાં ખનિજો અને સુરક્ષા અંગેના કરાર પર હસ્તાક્ષર કરવા તૈયાર છે.

ઝેલેન્સકી અને ટ્રમ્પ ખનિજોના એક મહત્વના સોદા પર હસ્તાક્ષર કરવાના હતા, જેને યુક્રેનને આશા હતી કે યુનાઇટેડ સ્ટેટ્સ તરફથી વધુ સુરક્ષા સહાય મળશે, જ્યારે વ્હાઇટ હાઉસે તેને રશિયા સાથેના યુદ્ધમાં શાંતિ પ્રાપ્ત કરવાની દિશામાં એક મહત્વપૂર્ણ પગલા તરીકે જોયું હતું. સાથે જ બંને વચ્ચે ચર્ચાના કારણે આ સોદા અંગે અનિશ્ચિતતા ઉભી થઇ ગઈ હતી.