Air Taxi: દુનિયાની પ્રથમ એર ટેક્સી આ દેશમાં શરૂ થશે, જાણો રૂટ અને સ્પીડ સહિત તમામ વિગત

Air Taxi Service : એર ટેક્સી સર્વિસ ટુંક સમયમાં હકીકત બનવા જઇ રહી છે. દુનિયામાં સૌથી પહેલી એર ટેક્સી સર્વિસ દુબઇમાં શરૂ થવાની તૈયારીમાં છે. પરિવહનની આ સુવિધા સાથે, રહેવાસીઓ અને પ્રવાસીઓને શહેરના મુખ્ય સ્થળો વચ્ચે ઝડપી, સલામત અને અનુકૂળ મુસાફરી કરવાની તક મળશે. આ હવાઇ ટેક્સી સેવા સાથે, દુબઇ ઇન્ટરનેશનલ એરપોર્ટ અને પામ જુમેરાહ વચ્ચેનું લગભગ 36 કિલોમીટરનું અંતર માત્ર 10 મિનિટમાં કાપવામાં આવશે. હાલમાં, કાર દ્વારા આ અંતર કાપવામાં લગભગ 45 મિનિટનો સમય લાગે છે.

જોબી એવિએશન દ્વારા વિકસાવવામાં આવી રહેલી દુબઈની એરિયલ ટેક્સી મુખ્ય વિસ્તારો, વ્યવસાયિક જિલ્લાઓ અને પર્યટક સ્થળો વચ્ચેની કનેક્ટિવિટીને વધુ વધારશે. ગયા વર્ષે, દુબઇ એર શો 2025 એ યુએઈમાં બે સ્થળો વચ્ચે પ્રથમ ક્રૂ ઇલેક્ટ્રિક વર્ટિકલ ટેક ઓફ અને લેન્ડિંગ (eVTOL) એરિયલ ટેક્સી ફ્લાઇટ સફળતાપૂર્વક પૂર્ણ કરી હતી. એર ટેક્સી દુબઇ રોડ એન્ડ ટ્રાન્સપોર્ટ ઓથોરિટી (આરટીએ) દ્વારા જોબી એવિએશનની મદદથી ઉડાવવામાં આવી હતી.

આ ઇલેક્ટ્રિક એરિયલ ટેક્સી એ માર્ધમ માં જોબી ની ટેસ્ટ ફેસિલિટીથી ઉડાન ભરી હતી. અને 17 મિનિટની ઉડાન બાદ અલ મકતૂમ ઇન્ટરનેશનલ એરપોર્ટ પર ઉતરી હતી.

એર ટેક્સી દુબઇ 2026

16 નવેમ્બર 2025 ના રોજ એક નિવેદનમાં, દુબઇ RTA ના જનરલ મેનેજર અને એક્ઝિક્યુટિવ ડિરેક્ટર્સના બોર્ડના અધ્યક્ષ અલ તાયરે જણાવ્યું હતું કે, "આરટીએ 2026 માં એરિયલ ટેક્સી સર્વિસના વ્યવસાયિક લોન્ચિંગ તરફ આગળ વધી રહ્યું છે. દુબઈને ભવિષ્યના શહેર અને ઇનોવેશન અને ટકાઉ શહેરી ગતિશીલતા ઉકેલો માટે વૈશ્વિક કેન્દ્ર તરીકે સ્થાન આપવું જે જીવનના ઉચ્ચ ધોરણ સાથે કાર્યક્ષમ માળખાકીય સુવિધાઓને જોડે છે. ”

તેમણે વધુમાં જણાવ્યું હતું કે આ સેવા વિવિધ જાહેર પરિવહનના વિકલ્પ અને ઇલેક્ટ્રિક સ્કૂટર અને સાયકલ જેવા વ્યક્તિગત ગતિશીલતાના વિકલ્પો સાથે એકીકરણમાં પણ વધારો કરશે, અવરોધરહિત મલ્ટિમોડલ મુસાફરીને સક્ષમ બનાવશે અને સમગ્ર શહેરમાં કનેક્ટિવિટી મજબૂત કરશે. જેથી મુસાફરોને સરળ અને આરામદાયક અનુભવ પ્રદાન કરી શકાય.

દુબઇ એર ટેક્સી સર્વિસ ક્યા રૂટ પર ઉડશે? 

શરૂઆતમાં, દુબઈમાં એર ટેક્સી સર્વિસ દુબઈ ઇન્ટરનેશનલ એરપોર્ટ, ડાઉનટાઉન દુબઈ, દુબઇ મરિના અને પામ જુમેરાહ નજીકના ચાર સ્થળોથી ઉડવાની અપેક્ષા છે. "એરિયલ ટેક્સી સ્ટેશનોને દુબઈની સ્કાયલાઇનમાં એક ખાસ મોડલ સ્વરૂપે જોવામાં આવશે, જે યુનિક અને વિશિષ્ટ ડિઝાઇન વાળા હશે.”

RTA એ ડિસેમ્બર 2024 માં તેના માસિક મેગેઝિનમાં એક નિવેદનમાં જણાવ્યું હતું કે આ ચાર માળના માળખામાં ટેક ઓફ અને લેન્ડિંગ માટે બે અલગ ઝોન, એર કન્ડિશન્ડ પેસેન્જર લાઉન્જ, એરિયલ ટેક્સી અને વાહનો માટે પાર્કિંગની સુવિધા હશે. આ સિવાય ટેક્સીઓ માટે ચાર્જિંગ સ્ટેશન પણ ઉપલબ્ધ થશે. દરેક સ્ટેશનમાં વાર્ષિક લગભગ 42,000 લેન્ડિંગને સમાવવાની અપેક્ષા છે.

આ પણ વાંચો  | ભારતની સૌથી સસ્તી 7 સીટર કાર લોન્ચ, બોલ્ડ લુક અને 6 એરબેગ સાથે ઘણા AI ફીચર્સ

દુબઇ એર ટેક્સી સર્વિસની સ્પીડ શું હશે?

દુબઈની એર ટેક્સી સર્વિસની સ્પીડ 321 કિમી પ્રતિ કલાક હોવાની અપેક્ષા છે. માહિતી અનુસાર, "એરિયલ ટેક્સી મોડેલ Joby S4 માં શાનદાર સુવિધાઓ છે. તેમા વર્ટિકલ ટેક-ઓફ અને લેન્ડિંગ ક્ષમતા, 161 કિલોમીટરની રેન્જ અને 321 કિમી / કલાક સુધીની મહત્તમ ગતિનો સમાવેશ થાય છે. અત્યાધુનિક વૈશ્વિક ઇનોવેશનો સમાવેશ કરીને, તેની ડિઝાઇનમાં છ રોટર અને ચાર બેટરી પેક આપવામાં આવ્યા છે. ”

દુબઇ એર ટેક્સીના વર્ટીપોર્ટ્સ ત્રણ સ્થળોએ વિકસાવવામાં આવી રહ્યા છે. આમાં ઝબીલ દુબઇ મોલ પાર્કિંગ એરિયાનો સમાવેશ થાય છે, જે ઇમાર પ્રોપર્ટીઝ દ્વારા સંચાલિત છે.