Motivational Story: પુણેના એક રહેવાસીએ ઝોમેટોમાંથી ખાવાનું મંગાવ્યું પરંતુ તેમાં કંઈક ઓછુ હતું. જ્યારે તેણે આ અંગે રેસ્ટોરન્ટને ફરિયાદ કરી ત્યારે તેમણે કહ્યું કે તેઓ ડિલિવરી બોય દ્વારા છૂટી ગયેલી વસ્તુ ફરીથી મોકલશે. જોકે સમસ્યા એ હતી કે ડિલિવરી બોયનું કામ પૂર્ણ થઈ ગયું હતું, તેથી હવે પ્રશ્ન એ હતો કે છૂટી ગયેલો ઓર્ડર કોણ લાવશે? જ્યારે ડિલિવરી બોયને આ વિશે ખબર પડી ત્યારે તેનો જવાબ આશ્ચર્યજનક હતો.
ગ્રાહકે ઝોમેટો ડિલિવરી એજન્ટની કહાની જણાવી
શ્રીપાલ ગાંધી નામના વ્યક્તિએ ઝોમેટો પર સબવેથી પનીર ટિક્કા સેન્ડવિચ, બિન્ગો ચિપ્સ અને ઓટ કિસમિસ કૂકીઝનો ઓર્ડર આપ્યો હતો, પરંતુ ફક્ત સેન્ડવિચ જ ડિલિવરી કરવામાં આવી હતી. સોશિયલ મીડિયા પર લખેલી પોસ્ટમાં શ્રીપાલ ગાંધીએ કહ્યું, “મેં ડિલિવરી કરનારને કહ્યું, ‘ચિપ્સ અને કૂકીઝ નથી.’ તે હચમચી ઉઠ્યો અને કોઈ જવાબ આપી શક્યો નહીં. થોડીવાર પછી તેણે કહ્યું, ‘તમે રેસ્ટોરન્ટને ફોન કરો.'”
જ્યારે સબવે રેસ્ટોરન્ટમાં ફોન કરવામાં આવ્યો ત્યારે તેમણે પુષ્ટિ કરી કે બાકીની વસ્તુઓ ભૂલથી પેક કરવામાં આવી નથી. તે રેસ્ટોરન્ટની ભૂલ હતી. ત્યારબાદ રેસ્ટોરન્ટે ડિલિવરી એજન્ટને બાકીની વસ્તુઓ ગ્રાહકને પરત કરવા અને તેને બદલામાં રૂ. 20 આપવાની ઓફર કરી. પરંતુ ડિલિવરી એજન્ટ એક વાર પણ અચકાયો નહીં. ભલે તે ઝોમેટો માટે કામ કરતો હતો અને રેસ્ટોરન્ટ માટે નહીં, તે તરત જ રેસ્ટોરન્ટની ભૂલ સુધારવા સંમત થયો.
આ પણ વાંચો: વિશાલ મેગા માર્ટના સ્થાપકની સફળતાની કહાની, નાનકડી દુકાન ચલાવનારે બનાવી દીધી હજારો કરોડની કંપની
‘હું ઇચ્છું છું કે ગ્રાહકો ખુશ રહે’
ડિલિવરી એજન્ટે કહ્યું, “સાહેબ, તે મારી જવાબદારી છે. હું ઇચ્છું છું કે ગ્રાહકો ખુશ રહે.” પછી તે રેસ્ટોરન્ટમાં પાછો ગયો, વસ્તુઓ ઉપાડી અને હસતા-હસતા ડિલિવરી કરવા પાછો ફર્યો. તેણે રેસ્ટોરન્ટ દ્વારા ઓફર કરાયેલ રૂ.20 લેવાની પણ ના પાડી.
તેણે શ્રીપાલ ગાંધીને કહ્યું, “ભગવાનએ મને ઘણું આપ્યું છે. બીજા કોઈની ભૂલ માટે હું આ પૈસા કેમ લઉં?”
પછી ડિલિવરી એજન્ટની કહાની સામે આવી
શ્રીપાલ ગાંધી દ્વારા પૂછવામાં આવતા, એજન્ટે જણાવ્યું કે તે એક સમયે શાપૂરજી પલોનજીમાં બાંધકામ સુપરવાઇઝર તરીકે કામ કરતો હતો, જ્યાં તેને દર મહિને ₹ 1.25 લાખનો પગાર મળતો હતો. એક કાર અકસ્માતે તેનું જીવન બદલી નાખ્યું, તેના શરીરનો ડાબો ભાગ લકવાગ્રસ્ત થઈ ગયો અને તેણે નોકરી ગુમાવી દીધી. એજન્ટે જણાવ્યું કે આ અકસ્માત પછી તેને નોકરી માટે ઘણો સંઘર્ષ કરવો પડ્યો અને તે ઘરે-ઘરે ભટકતો રહ્યો. પછી ઝોમેટોએ તેને બીજી તક આપી.
એજન્ટે કહ્યું કે ઝોમેટોએ મારા પરિવારને જીવંત રાખવામાં મદદ કરી. ભલે હું હવે અપંગ છું, મને કામ કરવાની તક મળી. તેથી જ હું ક્યારેય ઝોમેટોનું નામ બદનામ થવા દઈશ નહીં. તેમણે વધુમાં કહ્યું કે તેમની પુત્રી હવે BDS (બેચલર ઓફ ડેન્ટલ સર્જરી) કરી રહી છે.
શ્રીપાલ ગાંધીએ લખ્યું કે આ ડિલિવરી એજન્ટ ક્યારેય બીજા કોઈને દોષ આપતો નથી કે તેની સ્થિતિ વિશે ફરિયાદ કરતો નથી. “તેમણે હસીને કહ્યું, ‘ભગવાન મારી સાથે છે, તો હું શા માટે ચિંતા કરું?'” શ્રીપાલ ગાંધીએ પોતાની પોસ્ટમાં ઝોમેટોના સીઈઓ દીપિન્દર ગોયલને ટેગ કરીને લખ્યું, “વિકલાંગ લોકોને યોગ્ય તકો આપવા બદલ કંપનીનો આભાર.”
