સાબરકાંઠા: બે હાઇ સ્પીડ બાઈક સામસામે અથડાઈ, ચાર લોકોના મોત

Sabarkantha Road Accident: સાબરકાંઠા જિલ્લામાં રવિવારે સવારે એક મોટો માર્ગ અકસ્માત થયો હતો. આ અકસ્માતમાં 4 લોકોના મોત થયા છે. ગુજરાત-રાજસ્થાન સરહદ નજીક બે મોટરસાયકલ વચ્ચે ટક્કર થવાને કારણે આ અકસ્માત થયો હતો. પોલીસે આ માહિતી આપી છે.

કેવી રીતે થયો અકસ્માત?

ખેરોજ પોલીસ સ્ટેશનના એક અધિકારીએ જણાવ્યું કે, આ ઘટના જિલ્લાના પોશીના તાલુકાના આદિવાસી બહુલ વિસ્તારમાં સવારે 5.30 વાગ્યાની આસપાસ બની હતી. "બે હાઇ-સ્પીડ મોટરસાયકલ એકબીજા સાથે અથડાઈ હતી, આ ટક્કર એટલી ગંભીર હતી કે ત્રણ લોકોના ઘટનાસ્થળે જ મોત થયા, જ્યારે ચોથા વ્યક્તિનું હોસ્પિટલમાં મોત થયું.

આ અકસ્માત ગુજરાત-રાજસ્થાન સરહદ પર આવેલા એક ગામ પાસે થયો હતો. પોલીસના જણાવ્યા અનુસાર, બંને મોટરસાયકલ સામસામેની દિશામાંથી આવી રહી હતી. અકસ્માતમાં જીવ ગુમાવનારા લોકો સાબરકાંઠા અને બનાસકાંઠા જિલ્લાના રહેવાસી હતા. તેમાં કહેવામાં આવ્યું છે કે મૃતદેહોને પોસ્ટમોર્ટમ માટે મોકલવામાં આવ્યા છે અને કેસની તપાસ ચાલુ છે.

આ પણ વાંચો: ગુજરાતના 5 જિલ્લામાં ગરમીનું એલર્ટ, રાજ્યના કેટલાક જિલ્લાઓમાં હીટવેવની આગાહી

21 ફેબ્રુઆરીએ કચ્છમાં મોટો અકસ્માત સર્જાયો હતો

આ પહેલા 21 ફેબ્રુઆરીના રોજ ગુજરાતના કચ્છ જિલ્લામાં શુક્રવારે એક દુ:ખદ અકસ્માત થયો હતો. અહીં એક ખાનગી બસ અને ટ્રક વચ્ચે થયેલી ભયાનક ટક્કરમાં પાંચ લોકોના મોત થયા હતા અને 23 લોકો ઘાયલ થયા હતા. અધિકારીઓએ જણાવ્યું હતું કે અકસ્માત કેરા ગામ નજીક હાઇવે પર બપોરે લગભગ 1 વાગ્યે થયો હતો.

કચ્છ પશ્ચિમના પોલીસ અધિક્ષક વિકાસ સુંડાએ જણાવ્યું હતું કે, 'મુન્દ્રાથી ભુજ આવી રહેલી એક ટ્રક એક ખાનગી બસ સાથે અથડાઈ હતી.' ચાર લોકોના ઘટનાસ્થળે જ મોત થયા હતા, જ્યારે એક મુસાફરનું હોસ્પિટલમાં મોત થયું હતું. કુલ પાંચ લોકોના મોત થયા હતા. અધિકારીએ જણાવ્યું હતું કે અકસ્માતમાં 23 લોકો ઘાયલ થયા હતા અને તેમને ભુજની જેકે જનરલ હોસ્પિટલમાં સારવાર આપવામાં આવી હતી.