પહેલગામ હુમલા પરના નાટકમાં 'આતંકવાદી' બનેલી છોકરીઓએ બુરખો પહેર્યો, શાળાનો વીડિયો વાયરલ થતા હંગામો

ભાવનગરની એક શાળાનો વીડિયો સોશિયલ મીડિયા પર હાલમાં ખુબ જ વાયરલ થઈ રહ્યો છે. સ્વતંત્રતા દિવસ નિમિત્તે શાળામાં પહેલગામ આતંકવાદી હુમલા પર એક નાટક રજૂ કરવામાં આવ્યું હતું. આ વીડિયોમાં કેટલીક વિદ્યાર્થિનીઓએ નાટકમાં આતંકવાદીઓની ભૂમિકા ભજવી હતી. આ દરમિયાન તેઓએ બુરખો પહેર્યો હતો. આ વીડિયો વાયરલ થતા વિવાદ ઉભો થયો છે અને લોકો વીડિયોને લઈ કોમેન્ટો કરી રહ્યા છે.

આ નાટક કથિત રીતે પહેલગામ હુમલા અને ઓપરેશન સિંદૂર પર આધારિત હતું. શરૂઆતમાં કેટલીક વિદ્યાર્થિનીઓ સફેદ સલવાર-કુર્તા અને નારંગી દુપટ્ટો પહેરીને શાંતિપ્રિય કાશ્મીરના ગીત પર નૃત્ય કરી રહી હતી. આ પછી બુરખો પહેરેલી છોકરીઓ હથિયારો સાથે પ્રવેશ કરે છે અને નૃત્ય કરતી છોકરીઓ પર ગોળીબાર શરૂ કરે છે. વીડિયો વાયરલ થયા પછી લોકોએ આ પગલાને સાંપ્રદાયિક લાગણીઓને ઠેસ પહોંચાડનારું ગણાવ્યું અને તેની ટીકા કરી. આ વીડિયોને હાલમાં Muslim Spaces નામના એક ઈન્સ્ટાગ્રામ યુઝર્સે પોસ્ટ કર્યો છે. જેના કોમેન્ટ બોક્સમાં લોકો અલગ-અલગ પ્રતિક્રિયાઓ આપી રહ્યા છે.

શાળા વહીવટીતંત્રની પ્રતિક્રિયા

આ સમગ્ર ઘટના પર શાળાના આચાર્ય રાજેન્દ્ર દવેએ કહ્યું કે નાટકનો હેતુ દેશભક્તિ અને સશસ્ત્ર દળોનું મહત્વ સમજાવવાનો હતો. તેમણે કહ્યું કે વિદ્યાર્થિનીઓએ આતંકવાદીઓ, સૈનિકો અને પીડિત મહિલાઓની ભૂમિકા ભજવી હતી. તેમણે કહ્યું, "જે વિદ્યાર્થિનીઓને આતંકવાદીઓની ભૂમિકા આપવામાં આવી હતી તેમને કાળા કપડાં પહેરવાનું કહેવામાં આવ્યું હતું, પરંતુ તેઓએ બુરખો પહેર્યો હતો. અમારો હેતુ કોઈપણ સમુદાયને નુકસાન પહોંચાડવાનો નહોતો. આ નાટક વિદ્યાર્થીઓમાં દેશભક્તિ અને સ્વતંત્રતા દિવસ પ્રત્યે આદર જગાડવા માટે કરવામાં આવ્યું હતું."

આ પણ વાંચો: ગુજરાતમાં 3 દિવસ ભારે વરસાદની ચેતવણી

પ્રશાસને તપાસ શરૂ કરી

ભાવનગર મ્યુનિસિપલ કોર્પોરેશન પ્રાથમિક શિક્ષણ સમિતિના અધિકારી મુંજાલ બલદાણીએ જણાવ્યું હતું કે આ મામલો સોશિયલ મીડિયા પરથી પ્રકાશમાં આવ્યો છે. તેમણે કહ્યું કે તપાસ શરૂ કરવામાં આવી છે. તેમણે કહ્યું, "વીડિયોની તપાસ કરવામાં આવી રહી છે. તપાસ પૂર્ણ થયા પછી શાળાના આચાર્ય અને શિક્ષકોને કારણ બતાવો નોટિસ જારી કરવામાં આવશે. શાળા મ્યુનિસિપલ કોર્પોરેશન દ્વારા સંચાલિત હોવાથી, પ્રાથમિક શિક્ષણ સમિતિ દ્વારા આગળની કાર્યવાહી કરવામાં આવશે."